Joani 6 - La Bible en Otetela (Bible K'Ekila) 1991

Jesu Ambusha Antu Nunu Tanu Mbu ya Nde

¹ Lʼokongo wʼakambu aso, Jesu akatshu la wedi wʼuduwa a Ngalili, weli uduwa wa Tiberiya.

² Ului a wuki wʼantu wakuyeli, ne dia vo wakenyi tulimbitelu takandatshelaka akanga wʼelandu.

³ Jesu akambela lu dikuna, akatudjase la ambeki andi leko.

⁴ Elekanelu, dambu diʼasi Juda, aki lasuki.

⁵ Ku Jesu akedia ashu, akenyi ului a wuki wʼantu wayayi uya le ndi. Ndi akambula Filipo ati: Lendi ayutusumba ma dia antu aku nde?

⁶ Ndi akawumbula osoku dia mbedika, ne dia ndame akeyi dikambu diakandalangi ntsha.

⁷ Filipo akâkaluya diui ati: Ma aia denariyo kama hyendi hadiukuki dia untu la untu nungula yema.

⁸ Umbeki andi omotshi, Andere, onangu Simona Petero, akawutela ati:

⁹ Dikenda dieko lane la ekama etanu wa epunga, la nsi hyendi. Keli diango ne dieli na lʼatei wʼantu efula okone?

¹⁰ Jesu akati ati: Nyudjasha antu. Aki adiyu efula lu dihuli diako. Okone apami wakadjase, waki uku nunu tanu.

¹¹ Ku Jesu akose ekama. Lamʼakanduki lusaka, ndi akekahanya le wane wakadjase, ndu nsi efula uku akawalangi.

¹² Lamʼakawaluti, ndi akatela ambeki andi ati: Nyotongone betshi diutshikadi, diaha nduku engo nshisho.

¹³ Ku wakaditongona, wakaludia asaka dikumi la ahendi too la betshi uma lʼekama etanu wa epunga, wakatshikala uma le wane wakau

¹⁴ Lamʼakenyi antu djimbiti lu sho yakandatshi, vo wakati vati: Mete, umvutshi a wuhu one mbahumba ndja la kete.

¹⁵ Lamʼakeyi Jesu ati: Vo wuyanga mundami dia mbidjami lu khumʼekanga la wulu, ndi akatshu lu dikuna ntu ndame.

Jesu Ambokendakenda Ladiku Dia Uduwa

¹⁶ La dikolo, ambeki a Jesu wakahulo utsha lʼuduwa.

¹⁷ Vo wakoto lu watu, wakatatshokaka utsha la Kaperenauma. Akayala udjima, ku Jesu atakumi le wo.

¹⁸ Asukhu wakayala ne dia lopepe la wulu lakapepe.

¹⁹ Lamʼakawaduki uku kilometere tshanu kana shamalu, vo wakenyi Jesu ayakendakenda ladiku dia uduwa, ayayi uya la watu, ku vo wakuki woma.

²⁰ Keli ndi akawatela ati: Dime, tanyukaki woma.

²¹ Ku vo wakalangi mbotshiya lu watu. Kemʼedja, watu wakekama lu umamu wa lene akawatatshokaka.

Ambutela Antu Dia Ma Dia Lumu

²² La wedi a pindju, antu wakemala la wedi wʼuduwa wakenyi vati: Nduku watu ukina weko, paka otoi. Vo wakenyi ntu vati: Jesu komboto la ambeki andi lu watu, keli ambeki andi wakatshu vame.

²³ Keli watu ekina uma la Tiberiya wakayi lasuki la dihuli diakawali ma, lamʼakuki Khumadiondjo lusaka.

²⁴ Okone lamʼakenyi ului wʼantu vati: Jesu la ambeki andi kema lindu, vo wakoto lu watu eso, wakayi la Kaperenauma, watayangi Jesu.

²⁵ Lamʼakawawenyi la wedi wʼuduwa, vo wakawumbula vati: Umbetsha, unya laandi akayayi lindu?

²⁶ Jesu akâkaluya diui ati: Mete, mete, kanyutelami nti: Nyu hanyunyangi ne dia tulimbitelu takanyenyi, keli ne dia nyu nyakali ma, nyakaluti, mbanyanganyu.

²⁷ Tanyukambelaki ma diatulanaka ulimu, keli nyukambeli ma diayutshikala edja ndu lu lumu la pundju, diayunyusha Onʼa untu, ne dia Papa, Unyashungu ndame, akukitsha djimbitelu.

²⁸ Ku vo wakawumbula vati: Katshasu na dia utsha ulimu a Unyashungu?

²⁹ Jesu akâkaluya diui ati: Ulimu a Unyashungu eko okone: nyetawo one lakandatumi.

³⁰ Ku vo wakawumbula vati: Na djimbitelu yatshaye, tendi, keli tuketawo? Ulimu akona watshaye?

³¹ Watshesu wakalekaka mana lʼusui, uku ambufundama ati: Ndi akawasha ma dia nde uma lʼulungu.

³² Ku Jesu akawatela ati: Mete, mete, kanyutelami nti: Aha Mose kakanyusha ma uma lʼulungu, keli Papa katunyushaka ma dia nde uma lʼulungu.

³³ Ne dia ma dia Unyashungu diatuyakaka uma lʼulungu, diatushaka wa la kete lumu.

³⁴ Ku vo wakawutela vati: Khumadiondjo, kutushaki ma diako la lushi la lushi.

³⁵ Jesu akawatela ati: Ma dia lumu mbemi. One laya le mi, huka ndjala, lambetawo, huka pusa pundju.

³⁶ Keli dimi lakanyutela nti: Nyakamenyi, keli hanyumbetawo.

³⁷ Tshe wakambisha Papa, wayuya le mi. Dimi halatshanya one laya le mi.

³⁸ Ne dia dimi lakayi uma lʼulungu, aha dia ndjutsha lulangu lami, keli lulangu la one lakantumi.

³⁹ Lulangu la one lakantumi eli diaha dimi nshisha nduku otoi a wane wakandambisha, keli dia mbaulula lushi lʼekumelu.

⁴⁰ Lulangu la Papa lone, dia untu tshe lenda Ona, lawetawo, ayali la lumu la pundju. Ku dimi layuwulula lushi lʼekumelu.

Asi Juda Wambungunanguna, Wambudjana Tamu

⁴¹ Asi Juda wakangunangunela Jesu ne dia ndi akati ati: Dimi leko ma diakayi uma lʼulungu.

⁴² Vo wakati vati: One aha Jesu, onʼa Josefu, leyasu shi la nyangu uka? Ya ukundi atandi ati: Uma lʼulungu kuyemi?

⁴³ Jesu akâkaluya diui ati: Tanyungunangunaki lʼatei anyu.

⁴⁴ Nduku untu leya ndja le mi, tshikima Papa lakantumi kukutudi. Ku dimi layuwulula lushi lʼekumelu.

⁴⁵ Ambufundama lu afundelu wʼamvutshi ati: Tshe wayetshama uma le Unyashungu. Untu tshe latukaka ndu lateyaka aui uma le Papa, ndi atuyakaka le mi.

⁴⁶ Keli nduku untu lakenyi Papa, tshikima one luyi uma le Unyashungu, ndi kakenyi Papa.

⁴⁷ Mete, mete, kanyutelami nti: One letawo, eko la lumu la pundju.

⁴⁸ Ma dia lumu mbemi.

⁴⁹ Watshenyu wakalekaka mana lʼusui, ku wakavu.

⁵⁰ One eko ma diambuya uma lʼulungu, dia untu ladile, tavokaki.

⁵¹ Dimi leko ma dia lumu, diakayi uma lʼulungu. Naka untu ayole ma ne, ndi ayulumba pundju. Ee, ma diayumukimo ne dia lumu la wa la kete, mbeli dimba diami.

⁵² Ku asi Juda wakadjana tamu lʼatei awo vati: Ukundi weya untu one ntusha dimba diandi dia shu dile?

⁵³ Jesu akawatela ati: Mete, mete, kanyutelami nti: Nyu hanyuyala la lumu la pundju lʼetema anyu, naka hanyuli dimba dia Onʼa untu, ndu hanyonwe dikila diandi.

⁵⁴ One lale dimba diami, ndu lano dikila diami, ndjalaka la lumu la pundju. Dimi layuwulula lushi lʼekumelu,

⁵⁵ ne dia dimba diami dieko engo ka nde ka mete, dikila Jiami dieko enono ka mete.

⁵⁶ One lale dimba diami, lano dikila diami, ndi eko lʼutema ami, la dimi leko lʼutema andi.

⁵⁷ Uku akantumi Papa leli la lumu, mbemi la lumu uma le Papa. Okone one layonde, Ju ndi ayuyala la lumu uma le mi.

⁵⁸ One eko ma diakayi uma lʼulungu, aha wuhu wakali watshenyu, ku vo wakavu. One lale ma ne, ayulumba pundju.

⁵⁹ Akambu aso mbakandati lʼetemwelo lamʼakandetshaka antu la Kaperenauma.

Ambeki Efula Wamboseka Jesu; Petero Ati: “Le Na Atshosu?”

⁶⁰ Ambeki wa Jesu efula, lamʼakawuki diui so, wakati vati: Diui so wulu. Eya dietawo na?

⁶¹ Keli Jesu akeyi lʼutema andi ati: Ambeki andi wambungunanguna dia diui so. Ndi akawambula ati: Undi, dikambu so diambunyutakanya?

⁶² Ukundi ayunyutsha lamʼayunyena Onʼa untu atambela utsha lene akindi na?

⁶³ Nyuma katushanyaka lumu; dimba hatshi dikambu. Aui wakamanyutedi mbeli Nyuma la lumu.

⁶⁴ Keli nyu amotshi hanyetawo; ne dia Jesu akeyaka uma lʼetatelu waku waki kumbetawo, ndu one layufunga.

⁶⁵ Ndi akati ati: Dia dikambu ne mbanyutelami nti: Untu heyi ndja le mi, tshikima Papa kuwusha wulu uku.

⁶⁶ Lʼokongo a dikambu so, ambeki wa Jesu efula wakakalula ekongokongo, kumengola la ndi ntu.

⁶⁷ Ku Jesu akambula ambeki dikumi la ahendi ati: Ndu nyu mbalanga ntsho?

⁶⁸ Simona Petero akawumbula ati: Khumadiondjo, le na atshosu? We keli la aui wa lumu la pundju.

⁶⁹ Shu taketawo; shu mbeyaka shati: We keli lʼEkila la Unyashungu.

⁷⁰ Jesu akâkaluya diui ati: Dimi kunyosonola dikumi la ahendi, ku omotshi eko uhimbanyi?

⁷¹ Ndi akataka dia Judasi, onʼa Simona Isakariyote, ne dia ndi kaki la dikambu dia mbufunga. Ndi aki omotshi a lu dikumi la ahendi.