Joani 5 - La Bible en Otetela (Bible K'Ekila) 1991

Jesu Ambokonoya Untu la Betezata

¹ Lʼokongo wʼakambu aso, dambu diʼasi Juda diakayala, ku Jesu akatshu la Jerusalema.

² La Jerusalema, lasuki la eotwelo kʼekoko, kaki ungunda, wakawole lʼoteketa wʼasi Heberu vati: Betezata. Vo waki la samvu tshanu.

³ Lu samvu sho kaketamaka ului wʼakanga wa hemo, tutshungu, tshumbi, ndu dikhusi, wakakungelaka efungushelu kʼashi:

⁴ ne dia ondjelo wa Khumadiondjo akahuloka tena dimotshi lʼungunda, dia ndjufungusha ashi. Lamʼakandafungushaka ashi, ku untu tshe lotwe loko ntundu, mbeyaka nkono uma lu hemo kandi tshe.

⁵ Pami kemotshi aki leko, laki la hemo deku akumi asatu la enanei.

⁶ Lamʼakawenyi Jesu etami, ndi akeyi ati: Ndi aya la dikambu ne edja. Ndi akawumbula ati: We nangaka nkono?

⁷ Kanga hemo akûkaluya diui ati: Khumadiondjo, lamʼayufungusha ondjelo wa Unyashungu ashi, laha la untu lambidja lʼungunda. Keli ndjalaka lakatshu, ku ukina ambundekana.

⁸ Jesu akawutela ati: Unela, embe tangi kaye, okendekende.

⁹ Kemʼedja, untu ako akakono, akembe tangi kandi, akakendakenda. Lushi loso, laki lushi lʼekila.

Wambosongwela Jesu ne Dia Ndi Akalanya Lushi lʼEkila

¹⁰ Ku asi Juda wakatela one lakakono vati: Elo, eko lushi lʼekila. Memba tangi kaye, eko ekila.

¹¹ Keli ndi akâkaluya diui ati: Lakakonodi kumvutedi ati: Embe tangi kaye, okendekende.

¹² Vo wakawumbula vati: Untu akona akakutedi ati: Embe tangi, okendekende?

¹³ Keli lakakono, kumbeya one lakokonoya, ne dia ului wʼantu waki lu dihuli diako, la Jesu akanganyi.

¹⁴ Lʼokongo diku, Jesu akutani lʼetemwelo; akawutela ati: Ulungi, we ambokono. Tutshaki kolo ntu, dikambu diuleki dia ntundu, diatukuya le ye.

¹⁵ Untu ako akatshu, akatutela asi Juda ati: Jesu kakankonodi.

¹⁶ Dia dikambu so, asi Juda wakahenyahenya Jesu, ne dia ndi akatshi akambu aso lushi lʼekila.

¹⁷ Keli Jesu akâkaluya diui ati: Papa atukambaka edja ndu kakiane, ndu dimi latukambaka.

¹⁸ Dia dikambu so, asi Juda wakaleki nyanga mbudiaka, ne dia ndi akalanya lushi lʼekila, ndu aketi Unyashungu ati: Papa, akayaedimia la Unyashungu.

Jesu Ambuyateketela; Ambuhunula Akambu wa Asongwedi Andi

¹⁹ Jesu akâkaluya diui ati: Mete, mete kanyutelami nti: Ona heyi ntsha nduku dikambu ndame, keli ndi atutshaka uku wenandi Shi atsha, ne dia Ona atutshaka akambu tshe watutshaka Shi.

²⁰ Ne dia Shi atulangaka Ona, ku ndi atuwenyaka akambu tshe watshandi ndame. Ndi ayuwenya akambu wuleki ane waki, ne dia nyu mamba.

²¹ Ne dia Shi atululaka edu, atuwashaka lumu, okone ndu Ona atushaka walangandi lumu.

²² Papa halumbuya untu, keli ndi akasha Ona elumbwelu tshe,

²³ ne dia antu tshe walemia Ona, uku alemiawo Shi. One lahalemia Ona, halemia Shi lakutumi.

²⁴ Mete, mete, kanyutelami nti: One luka diui diami, letawo lakantumi, ndi eko la lumu la pundju. Ndi huya lʼelumbwelu, keli ndi ambeta uma lu nyoi utsha lu lumu.

²⁵ Mete, mete, kanyutelami nti: Etena kambukuka, keko kakiane, kayuka edu diui dia Ona Unyashungu. Wane wetawo, wayuyala la lumu.

²⁶ Uku eli Shi la lumu lʼutema andi ndame, osoku ndi akasha Ona dia ndu ndi ndjala la lumu lʼutema andi.

²⁷ Ndi akawusha wulu wa numbuya akambu ne dia ndi eko Onʼa untu.

²⁸ Tanyambaki dia dikambu so, ne dia etena kambukuka, kayuka wane weli lu waumbu tshe diui diandi,

²⁹ ku vo wayutumba. Wane wakatshaka ololo, wayulo lu eulwelu ka lumu. Ku wane wakatshaka kolo, wayulo lʼelumbwelu.

³⁰ Dimi haleyi ntsha nduku dikambu. Dimi latulumbuyaka uku atumukaka. Elumbwelu kami keli ololo, ne dia dimi halangi ntsha uku alangami, keli uku alanga one lakantumi.

³¹ Naka dime latuyataka, diui diami kema mete.

³² Ukina katumvutaka; dimi mbeyaka nti: Diamvutandi, dieko mete.

³³ Nyu nyakatumi antu le Joani, ku Joani akati akambu wa mete.

³⁴ Keli diui dialungulami, kema uma le untu. Dimi lambuta akambu ane, dia nyu nshimbamela.

³⁵ Joani aki tala, diakalungulaka, diakahetaka. Nyu nyakalangi ngenangena la usasi adio etenyi.

³⁶ Keli diui diami diambuleka diui dia Joani. Ne dia elimu wakambisha Papa dia dimi nshidiya, watumutshaka, vo mbatumvutaka Papa, lakantumi.

³⁷ Papa lakantumi, ambumvuta. Nyu nyatuki diui diandi nduku etena otoi. Nyu nyatenyi utundu andi.

³⁸ Diui diandi hadiuyala la nyu, ne dia nyu hanyetawo one lakandatumi.

³⁹ Nyu nyatuyangiayangiaka lu afundelu, ne dia nyu nyatukanaka nyati: Leko kesu la lumu la pundiu; ndu afundelu ntu wambumvuta.

⁴⁰ Nyu hanyulangi ndja le mi dia nyu nujala la lumu.

⁴¹ Dimi halungula lutumbu uma le antu.

⁴² Keli dimi nyeyaka nti: Nyu kema la ngandji ka Unyashungu lʼetema anyu.

⁴³ Dimi lambuya lu lukumbu la Papa, keli nyu hanyunungula. Keli naka ukina ayuya lu lukumbu landi, nyu nyayulungula.

⁴⁴ Ukundi weyanyu mbetawo nyu wane watuyatumbulaka, wahatuyangaka lutumbu laya uma le Unyashungu ndame?

⁴⁵ Tanyukanaki nyati: Dimi layunyosongwela le Papa. One layunyosongwela eko, Mose ndame, lakitshanyu elungamelu kanyu le ndi.

⁴⁶ Ne dia utunyetawo Mose, tshiki nyu nyakambetawo, ne aia ndi akafundi dikambu diami.

⁴⁷ Keli naka nyu hanyetawo afundelu andi, ukundi ayunyetawo aui ami?