Joani 4 - La Bible en Otetela (Bible K'Ekila) 1991

Umuntu Usi Samariya

¹ Lamʼakenyi Khumadiondjo ati: Afarise wambuka vati: Jesu ndeka Joani mbete antu ambeki la mbabatiza

² (kuyanga Jesu ndame kumbatizaka antu, keli paka ambeki andi),

³ ndi akamo uma la Judiya, akatshu utsha la Ngalili ntu.

⁴ Diaki la ndi dia mbeta la Samariya.

⁵ Ku ndi akakumi lʼusumba omotshi wa la Samariya, lukumbu lawo Sukara, lasuki la etenyi ka kete kakasha Jakoba onʼandi Josefu.

⁶ Eteko kʼashi ka Jakoba kaki leko. Jesu akakomo la lokendo, ku ndi akadjase lʼokenge wʼeteko. Aki lasuki la unya lʼatei ote.

⁷ Umuntu usi Samariya akayi dia ndjuduwula ashi. Jesu akawutela ati: Umbisha ashi wa no.

⁸ Ne dia laso ku ambeki andi wakatshwi lʼusumba, dia ntusumba mbu ya nde.

⁹ Ku umuntu usi Samariya akawumbula ati: We usi Juda, ukundi anombaye ashi, dimi umuntu usi Samariya na? ne dia asi Juda hawosohanaka la asi Samariya.

¹⁰ Jesu akûkaluya diui ati: Utuyeya ushasha a Unyashungu, ndu one lakalomba ashi a no, we utolomba, tshiki ndi utukusha ashi a lumu.

¹¹ Umuntu akawutela ati: Khumadiondjo, we kema la engo ka ndjuwula ashi, ndu eteko keko ohongo, ku uma lendi eye la ashi a lumu?

¹² We ndeka tshesu Jakoba lakatusha eteko, kakandanokaka ndame ndu anʼandi, ndu dungalunga diandi uka?

¹³ Jesu akûkaluya diui ati: Untu tshe layono ashi ane, ayuka pusa ntu.

¹⁴ Keli untu tshe layono ashi wayumuwusha, huki pusa pundju. Keli ashi wayumuwusha, wayuyala lʼutema andi uku eteko kʼashi, kambumbela utsha lu lumu la pundju.

¹⁵ Umuntu akawutela ati: Khumadiondjo, umbisha ashi aso, mbahamukaka pusa, ndu mbahumuyakaka etali lindu dia ndjuduwula.

¹⁶ Jesu akawutela ati: Utshu, uteli umeye, kuyi lindu.

¹⁷ Umuntu akûkaluya diui ati: Dimi kema la umi. Jesu akawutela ati: We ambuta mete, wati: Dimi kema la umi.

¹⁸ Ne dia we aki la waumi atanu, one leli laye kakiane, kema umeye. Osoku, mete kataye.

¹⁹ Umuntu akawutela ati: Khumadiondjo, dimi lambeya nti: Umvutshi mbeye.

²⁰ Watshesu wakatemolaka lʼukungu one, ku nyu mvutaka nyati: La Jerusalema keli dihuli diahumba antu ntemola.

²¹ Jesu akawutela ati: Umuntu, etawo diui diami. Etena kambukuka, kahanyotemola Papa paka lʼukungu one, kuyanga la Jerusalema.

²² Nyu nyatotemolaka kahanyeyi. Shu tatotemolaka keyasu, ne dia panda keko uma le asi Juda.

²³ Keli etena kambukuka, keko kakiane, atemodi wa mete wayotemola Papa lu Nyuma la lu mete, ne dia antu wa wuhu oso mbalanga Papa ndjala atemodi andi.

²⁴ Unyashungu eko Nvuma. Wane watotemolaka, dieli la wo dia mbotemola lu Nyuma la lu mete.

²⁵ Umuntu akawutela ati: Dimi mbeyaka nti: Mesiya lundjayi (letawo vati: Kristu). Lamʼayunduya, ndi ayututela akambu tshe.

²⁶ Jesu akawutela ati: Dimi ako one, lateketa la ye.

“Omotshi Atuneka, Ukina Atunaka”

²⁷ Ambeki wa Jesu wakayi lʼetena kako. Vo wakambi, ne dia ndi akateketaka la umuntu, keli nduku untu akawumbula ati: Kayangaye na? kana okoko wana wateketaye la ndi?

²⁸ Okone umuntu akatshiki mbaka kandi kʼashi. Ndi akatshu lʼusumba, akatutela antu ati:

²⁹ Nyuyi, nyuyendi untu lambumvutela akambu tshe wakamatshaka. Aha Kristu oso?

³⁰ Vo wakunela uma lʼusumba, wakayi le ndi.

³¹ Etena kako, ambeki andi wakosengasenga vati: Umbetsha, ole.

³² Keli ndi akawatela ati: Dimi leko la mbu ya nde, yahanyeyi.

³³ Ku ambeki wakambwana vati: Undi, untu kuwela mbu ya nde?

³⁴ Jesu akawatela ati: Ma diami, dieli ntsha lulangu la one lakantumi, la dia nshidiya ulimu andi.

³⁵ Nyu hanyututaka nyati: Ambutshikala ngondo nyei, ku dinela ndjala, uka? Nyulungi, dimi lambunyutela nti: Nyedia ashu anyu, nyendi dikambo diambela kasakasa, Jia muna.

³⁶ One latunaka, atulungulaka difutu, atusanganyaka wuhu utsha lu lumu la pundju; dia one latuneka la one latunaka ngenangena kame.

³⁷ Ne dia diui ne dieko mete ati: Omotshi atuneka, ukina atunaka.

³⁸ Dimi lakanyutumi, dia ntuna diango diakinyu kunkamba ulimu. Akina wakakambi ulimu, nyu nyamboto lʼulimu awo.

Asi Samariya Efula Wambetawo Jesu

³⁹ Asi Samariya efula wa lʼusumba oso waketawo Jesu, ne dia diui dia umuntu diakandati ati: Ndi ambumvutela akambu tshe wakamatshaka.

⁴⁰ Okone lamʼakayi asi Samariya le ndi, vo wakosengasenga, dia ndi ntshikala la wo. Ku ndi akatshikala leko nshi hyendi.

⁴¹ Akina efula waketawo dia diui diandi.

⁴² Vo wakatela umuntu vati: Shu tambetawo kakiane, aha ne dia aui aye, keli ne dia shu shame tambuyaukela, ndu tambeya shati: Mete, ndi keli Ushimbedi a wa la kete.

“Umvutshi lu Leke Lawo”

⁴³ Lʼokongo a nshi hyendi, Jesu akamo uma leko, akatshu la Ngalili.

⁴⁴ Jesu ndame akati ati: Umvutshi kema la kenemo u leke lawo.

⁴⁵ Okone lamʼakandayi la Ngalili, asi Ngalili wakulungula, ne dia vo wakenyi akambu tshe wakandatshaka la Jerusalema lu dambu, ne dia ndu vo mbakatshu lu dambu.

Jesu Ambokonoya Untu la Kaperenauma

⁴⁶ Jesu akayi ntu la Kana ka la Ngalili, lene akandahilula ashi wanu. Olohe omotshi aki leko, aki la ona pami, laki le hemo la Kaperenauma.

⁴⁷ Lamʼakanduki ati: Jesu ambumo uma la Judiya, ambuya la Ngalili, ndi akatshu le ndi. Ndi akosengasenga ati: Uyi, uyukonoya onʼami, ne dia ndi uyanga mvo.

⁴⁸ Ku Jesu akawutela ati: Utunduyala hanyenyi tulimbitelu la akambu wa mamba, tshiki nyu hanyetawo.

⁴⁹ Olohe akawutela ati: Khumadiondjo, utayi la ntundu ka onʼami atavu.

⁵⁰ Jesu akawutela ati: Utshu, onʼaye eko la lumu. Pami kako aketawo diui diakawutela Jesu, akatshu.

⁵¹ Lamʼakandatatshokaka, ekambi andi wakahumana la ndi, wakawutela vati: Onʼaye eko la lumu.

⁵² Ku ndi akawambula unya wakatatela ona nkalangana. Vo wakawutela vati: Lui; lamʼaki unya lʼushidi otoi, dimba dja diakukimo.

⁵³ Okone shi akeyi ati: Lu unya ako mete mbakawutela Jesu ati: Onʼaye eko la lumu. Ndame aketawo, ndu wa lu luudu landi tshe.

⁵⁴ Djimbitelu sho, mbaki djimbitelu ya hendi yakatshi Jesu lamʼakandamo uma la Judiya, lamʼakandayi la Ngalili.