Joani 21 - La Bible en Otetela (Bible K'Ekila) 1991

Jesu Ambene le Ambeki lʼUduwa wa Tiberiya

¹ Lʼokongo wʼakambu aso, Jesu akayaenya le ambeki andi ntu lʼUduwa a Tiberiya; okone mbakandayaenya.

² Simona Petero, la Tomasi, lakawetaka vati: Diasa, la Natanyele, usi Kana ka la Ngalili, la ana wa Zebede, la ambeki andi akina ahendi waki kame.

³ Simona Petero akawatela ati: Dimi lambutsho la ntunda nsi. Vo wakawutela vati: Tutshu la ye. Vo wakatshu, wakoto lu watu. Lʼutshu ako, vo kumunda engo.

⁴ Keli lamʼakayangi unya mputo, Jesu akemadi lʼumamu wʼashi. Keli ambeki kumbeya vati: Jesu.

⁵ Ku Jesu akawambula ati: Anʼami, nyu la engo ka nde? Vo wakûkaluya diui vati: Kema.

⁶ Ndi akawatela ati: Nyudji tei lu lunya la pami la watu, ku nyayena nsi. Ku vo wakadji tei, tshinyi tshitshe vo kumbeya nkikutula ne dia nsi efula.

⁷ Ku umbeki wakalangaka Jesu akatela Petero ati: Khumadiondjo one! Lamʼakuki Simona Petero ati: Khumadiondjo oso, ndi akalote ukutu andi, ne dia ndi akukulula, akayatambiya lʼashi.

⁸ Keli ambeki akina wakayi lu yatatu, ne dia okenge taki etali, aki uku aboko akumi atanu, wayakutula tei kuludi la nsi too.

⁹ Lamaʼakawakumi lʼokenge, vo wakenyi akalanga wa dja waheta la nsi yuhanemi la diku diawo, la ukama a ma.

¹⁰ Jesu akawatela ati: Nyela nsi kina yambunyunda kakiane.

¹¹ Ku Simona Petero akatshu, akakutula tei lʼokenge, kuludi la nsi ya waki lukama la akumi atanu la shatu. Kuyanga nsi yaki efula osoku, tei kumbate.

¹² Jesu akawatela ati: Nyuyi, nyuli. Nduku umbeki aki la dihunga dia mbumbula ati: We na? Vo wakeyi vati: Khumadiondjo.

¹³ Jesu akayi, akose ukama a ma, akawashadio, kame la nsi.

¹⁴ Etena ka satu keso kakenama Jesu le ambeki lamʼakandulo uma lu nyoi.

“We Mbukakami Ngandji?”

¹⁵ Lamʼakawali, Jesu akambula Simona Petero ati: Simona, onʼa Joani, we ndeka ane mbukami ngandji? Ndi akawutela ati: Elu, Khumadiondjo. We mbeyaka wati: Dimi nkukaka ngandji. Ndi akawutela ati: Uleshaki anʼami wʼekoko.

¹⁶ Ndi akawumbula etena ka hendi ati: Simona, onʼa Joani, we mbukakami ngandji? Ndi akawutela ati: Elu, Khumadiondjo. We mbeyaka wati: Dimi nkukaka ngandji. Ndi akawutela ati: Ulamaki ekoko ami.

¹⁷ Ndi akawumbula etena ka satu ati: Simona, onʼa Joani, we mbukakami ngandji? Petero akanyangi ne dia ndi akawumbula etena ka satu ati: We mbukakami ngandji? Ndi akawutela ati: Khumadiondjo, we mbeyaka akambu tshe. We mbeyaka wati: Dimi nkukaka ngandji. Jesu akawutela ati: Uleshaki ekoko ami.

¹⁸ Mete, mete, kakutelami nti: Lamʼakiye olongo a pami, we akayalotshaka uya, akakendakendaka lene akayalangaka; keli lamʼayuyuyala usumbi, we ayusimbula anya aye, ku ukina ayukolotsha uya, ayukotola lene ahayalangi.

¹⁹ (Diui so mbakati Jesu, ne dia nimbitshiya wuhu wa nyoi kayundutumbula Unyashungu.) Lamʼakandati osoku, ndi akawutela ati: Undjeli.

²⁰ Petero akasikiso, akenyi umbeki wakalangaka Jesu ayuyeli. Ndi kakawekama ekongokongo lu tulu kandi lamʼakawalekaka ma dia dikolo. Ndi kakawumbula ati: Khumadiondjo, ayukufunga na?

²¹ Lamʼakawenyi Petero, ndi akambula Jesu ati: Khumadiondjo, kayutsha untu one na?

²² Jesu akawutela ati: Lamʼayumulanga nti: Ndi atshikali la lumu edja ndu lamʼayumukalula, dikambu diaye mbedio uka? Undjeli.

²³ Diui diako diakadianeana lʼatei wʼanyawo ati: Umbeki ako huvo. Keli Jesu kumbutela ati: We huvo. Ndi akati ati: Naka dimi layulanga nti: Ndi atshikali la lumu edja ndu lamʼayumukalula, dikambu diaye mbedio?

Umbeki One Akafundi Akambu Aso Mete

²⁴ Umbeki one lakati akambu aso, ndi kakafundi. Shu mbeyaka shati: Diui diandi dieko mete.

²⁵ Jesu akatshi ndu akambu akina efula. Utunduyala dikambu la dikambu diafundami, dimi lambukana nti: Kete yame tshu tutuyeya nkuka abuku tshe wutufundama.