Joani 2 - La Bible en Otetela (Bible K'Ekila) 1991

Tshuki Dia la Kana

¹ Lushi la satu, tshuki diakayala la Kana ka la Ngalili. Nyangu Jesu aki laawo.

² Waketi ndu Jesu la ambeki andi lu tshuki.

³ Lamʼakashili wanu, nyangu Jesu akati ati: Vo kema la wanu.

⁴ Jesu akawutela ati: Umuntu, dikambu diakona diasami la ye? Unya ami atakuki.

⁵ Nyangu akatela ekambi ati: Nyutshi kene tshe kayundunyutela.

⁶ Mbaka shamalu yʼave yaki laawo, yakawakitshaka ne dia mbedia antu, uku aki etshelu kʼasi Juda. Mbaka la mbaka kakotoka tediko tuhendi kana tusatu.

⁷ Jesu akawatela ati: Nyuludia mbaka lʼashi. Vo wakayiludia too ndu lʼenyo.

⁸ Ndi akawatela ati: Nyotekole kakiane; nyotole le olombodi wa dambu. Ku vo wakatole.

⁹ Lamʼakunganela olombodi wa dambu, ashi wakakadimo wanu, wakindi kumbeya lene akiwo (keli ekambi wakatuduwula ashi, wakeyi). Ku olombodi wa dambu aketi utshuki a wadi,

¹⁰ akawutela ati: Untu tshe atukimoka wanu wʼololo ntundu. Lamʼayuwono efula, vo wayukimo wane waha ololo efula. Keli we akalami wanu wʼololo edja ndu kakiane.

¹¹ Dikambu so diakatshi Jesu la Kana ka la Ngalili, mbeli djimbitelu yandi ya ntundu ntunduntundu. Yo yakenya lutumbu landi, ku ambeki andi wakawetawo.

¹² Lʼokongo a dikambu so, Jesu akatshu la Kaperenauma, ndi la nyangu la anangu la ambeki andi. Vo kumpanga leko nshi efula.

Elongoswelo ka Etemwelo

¹³ Elekanelu ka asi Juda kaki lasuki, ku Jesu akatshu la Jerusalema.

¹⁴ Ndi akatani wane wakasundjaka ngombe la ekoko la fudu ya binga, ndu amengudi wa falanga wudjashi lu etemwelo.

¹⁵ Ndi akatshi uhamba wʼeshinga, akawatshanya tshe uma lʼetemwelo, ndu ekoko, ndu ngombe. Ndi akatshula falanga yʼamengudi, akasukula mesa awo.

¹⁶ Ndi akatela waku wakasundjaka fudu ya binga ati: Nyunya diango diku! Tanyuhiluyaki luudu la Papa luudu la atshi wʼukanda.

¹⁷ Ambeki wakuho diui diakafundama ati: Saki ka luudu laye kayonde.

¹⁸ Ku asi Juda wakawumbula vati: Djimbitelu yakona yeli la ye, ya ntenyaye, ya we ntsha dikambu ne?

¹⁹ Jesu akâkaluya diui ati: Nyuhandjuli etemwelo kene, ku dimi layukihika lu nshi shatu.

²⁰ Ku asi Juda wakati vati: Wakahiki etemwelo kene deku akumi anei la samalu, ku we ayukihika lu nshi shatu?

²¹ Keli ndi akati dia etemwelo ka dimba diandi.

²² Lamʼakandulo uma lu nyoi, ambeki andi wakuho diui so diakandati. Vo waketawo afundelu, ndu diui diakati Jesu.

Antu Efula la Jerusalema Wambetawo Jesu

²³ Lamʼaki Jesu la Jerusalema lu lushi la wuki lʼElekanelu, antu efula waketawo lukumbu landi lamʼakawenyi tulimbitelu takandatshaka.

²⁴ Keli Jesu kumbaekama, ne dia ndi akeyi antu tshe.

²⁵ Ndi kumpumba dia untu mbutela diʼakambu wʼantu, ne dia ndame akeyi akambu wa lʼetema wʼantu.