Joani 19 - La Bible en Otetela (Bible K'Ekila) 1991

“Enda, Untu One”

¹ Pilata akose Jesu, akokomola eshingo.

² Alimbi wakele dembo dia kusu diʼatende, wakulimbedio lʼote, wakolotsha ukutu wa tilili.

³ Vo wakayi la le ndi, wakawemula vati; Moyo Khumʼekanga kʼasi Juda! wakokomola mbala.

⁴ Pilata akatumbi ntu, akawatela ati: Nyulungi, dimi lambuya la ndi le nyu, ne dia nyu mbeya nyati: Dimi hambutanyi la unungu.

⁵ Ku Jesu akatumbi olotshi dembo dia kusu diʼatende la ukutu wa tilili. Pilata akawatela ati: Nyendi untu one!

⁶ Lamʼakawenyi elombedi a waki la alami, vo wakahangohango vati: Udiaki lʼutamba a mpeketanya! Udiaki lʼutamba a mpeketanya. Pilata akawatela ati: Nyuwose nyame, nyudiaki, ne dia dimi hambutanyi la unungu.

⁷ Asi Juda wakûkaluya diui vati: Shu la olembe, ku uma lu olembe ako, dieli la ndi dia mvo; ne dia ndi akayaete Ona a Unyashungu.

⁸ Lamʼakuki Pilata diui so, ndi akuki woma efula.

⁹ Ndi akoto lu luudu lʼelumbwelu, akambula Jesu ati: Uma lendi uyeye na? Keli Jesu kumbukaluya diui.

¹⁰ Ku Pilata akawumbula ati: We hamvutela diui? We heyi wati: Dimi la wulu wa nkutshungula, ndu la wulu wa nkudiaka lu utamba a mpeketanya?

¹¹ Jesu akûkaluya diui ati: Utunduyala vo kunkusha wulu uma lʼulungu, tshiki we kema la wo wa ntshelami dikambu. Okone one lakankimwi le ye, keli la dikambu diuleki kolo.

¹² Dia diui diako, Pilata akayangi mbutshungula. Keli asi Juda wakahangohango vati: Naka we ambutshungula untu one, keti we kema ongenyi wa Kayisa. Untu tshe layaete khumʼekanga, ambonyola Kayisa.

¹³ Lamʼakuki Pilata aui aso, ndi akatumbi la Jesu, akadjase lu kiti kʼelumbwelu lu dihuli diakawetaka vati: Mbalasa ka Ave, keli lʼoteketa wʼasi Heberu ati: Ngabata.

¹⁴ Elongoswelo ka dambu diʼElekanelu kakakuki. Unya aki lʼatei wʼote. Ndi akatela asi Juda ati: Nyendi khumʼekanga kanyu!

¹⁵ Ku vo wakahangohango vati: Uwunya! Uwunya! Udiaki lʼutamba a mpeketanya! Pilata akawambula ati: Dimi layudiaka Khumʼekanga kanyu lʼutamba a mpeketanya? Elombedi a waki wakâkaluya diui vati: Shu kema la khumʼekanga, paka Kayisa.

¹⁶ Ku ndi akakimwelandi, dia vo mbudiaka lʼutamba a mpeketanya.

Wambuhane Jesu lʼUtamba a Mpeketanya

¹⁷ Vo wakose Jesu. Ndi akatumbi ayembe utamba andi a mpeketanya utsha lu dihuli dietawo vati: Dihuli dia Lombo, lʼoteketa wʼasi Heberu ati: Ngolongota.

¹⁸ Vo wakuhane lʼutamba a mpeketanya leko, kame la akina ahendi: omotshi lene, omotshi lene, ku Jesu lʼatei.

¹⁹ Pilata akafundi efundelu, akakimami lʼutamba a mpeketanya. Loko kakafundami ati: “JESU YʼUSI NAZARETA, KHUMʼEKANGA KʼASI JUDA.”

²⁰ Asi Juda efula wakali efundelu kako, ne dia dihuli diakawahane Jesu lʼutamba a mpeketanya diaki lasuki la ngelu. Aui aso wakafundama lʼoteketa wʼasi Heberu, la wʼasi Romo ndu wʼasi Ngirika.

²¹ Ku elombedi a waki wʼasi Juda wakatela Pilata vati: Tufundaki wati: Khumʼekanga kʼasi Juda, keli ufundi wati: Ndi kakataka ati: Dimi Khumʼekanga kʼasi Juda.

²² Pilata akâkaluya diui ati: Uku akamafundji, mbakamafundji. “Enda, Onʼaye Uku” … “Enda, Nyo Uku”

²³ Lamʼakawahane Jesu lʼutamba a mpeketanya, alimbi wakose ahondo, wakakahanya lu elui enei, dimbi wandi, dimbi wandi. Ndu ukutu, tawaki la etelelo. Vo wakelama tshe uma ladiku pulu ndu lʼesi.

²⁴ Ku vo wakatanela vati: Tatuwatulaki, tuwuki uwali, teyi layuyala kangawo. Ne dia diui dia afundelu diashidiyami ati: Wakakahana ahondo ami, Wakuki ukutu ami uwali.

²⁵ Akambu aso mbakatshi alimbi. Keli nyangu, la onangu nyangu la umuntu, Mariya wadi a Kelopa, la Mariya wʼusi Mangadala, wakemala lasuki la utamba a mpeketanya wa Jesu.

²⁶ Lamʼakenyi Jesu nyangu la umbeki wakandalangaka wemadi lasuki, ndi akatela nyangu ati: Umuntu, enda Onʼaye!

²⁷ Ku ndi akatela umbeki ati: Enda nyo! Umaka etena keso, umbeki ako akawose lakandi.

“Ambushila”

²⁸ Lʼokongo diku, Jesu akeyi ati: Kakiane akambu tshe wambushila (dia diui diʼafundelu nshidiyama), ndi akati ati: Dimi la pusa.

²⁹ Donga diaki leko too la wanu wʼukayi. Vo wakose dimbu, dioloyami tshe la wanu ako wʼukayi lu tshamba yʼusasi, wakumamidio lʼunyo.

³⁰ Lamʼakalete Jesu wanu wʼukayi, ndi akati ati: Ambushila. Ku ndi akakole ote, akakitshiya.

“Nduku Weka Andi Wayoko”

³¹ Lushi loso, laki lushi lʼElongoswelo. Okone asi Juda wakalombe Pilata dia mbaokola pelohelo, la mbanya, ne dia edu tawutshikalaki lʼetamba a mpeketanya lushi lʼekila (ne dia lushi lʼekila laki lushi la wuki).

³² Ku alimbi wakayi, wakokola ekulu wa one la ntundu la wa ukina lakawahane la ndi lu utamba a mpeketanya.

³³ Keli lamʼakawayi le Jesu, vo wakenyi vati: Ndi ambushila mvo. Okone vo kumbokola ekulu.

³⁴ Dimbi dimotshi akuhiki dikonga lu luhandju, kema edja dikila la ashi wakatumbi.

³⁵ One lakenyi dikambu so, akaditi; diui diandi dieko mete. Ndi mbeyaka ati: Mete katami dia ndu nyu mbetawo.

³⁶ Akambu aso wakayala ne dia diui diʼafundelu nshidiyama ati: Nduku weka andi wayoko.

³⁷ Ntu afundelu kekina ambuta ati: Vo wayenda one lakawahiki dikonga.

Wambukhunde Jesu

³⁸ Lʼokongo wʼakambu aso, Josefu ya la Arimatiya, laki umbeki a Jesu lu usheshe ne dia woma wʼasi Juda, akalombe Pilata dia minya udu a Jesu. Ku Pilata aketawo. Ku ndi akayi, akanya udu.

³⁹ Ndu Nikodemo, lakayi le Jesu lʼutshu ntundu, akayi la diango diʼupumu dia nshimba udu mpondadiaki la wutshu wa livere lukama.

⁴⁰ Ku vo wakose udu a Jesu, wakawombe ahondo wa linene, kame la diango diʼupumu, uku etshelu kʼasi Juda ka nkhunde antu.

⁴¹ Lu dihuli diakawadiaki Jesu lu utamba a mpeketanya, aki ekambo kemotshi. Lu ekambo kako, kaki diumbu diʼuyuyu diahatakhundama nduku untu.

⁴² Lushi lʼElongoswelo lʼasi Juda, ne dia diumbu diaki lasuki, ku vo waketamia Jesu loko.