Joani 18 - La Bible en Otetela (Bible K'Ekila) 1991

Judasi Ambufunga Jesu

¹ Lamʼakati Jesu aui aso, ndi akatshu la ambeki andi la wedi a djushi ya Kidirona, lene aki ekambo. Ndi la ambeki wakoto loko.

² Ndu Judasi, lakufungi, akeyaka dihuli so, ne dia Jesu akatshokaka leko tena efula la ambeki andi.

³ Lamʼakalungula Judasi ului wʼalimbi la alami uma le elombedi a waki la Afarise, ndi akatshu leko la atala, la ewa, la dihumo dia ta.

⁴ Jesu akeyi akambu tshe wayanga ndja le ndi, ku ndi akasukana, akawambula ati: Ayanganyu na?

⁵ Vo wakûkaluya diui vati: Jesu yʼusi Nazareta. Jesu akawatela ati: Dimʼone. Ndu Judasi, lakufungi, akemadi la wo.

⁶ Lamʼakandawatela ati: Dimʼone, ku vo wakakalula ekongokongo, wakako la kete.

⁷ Ku ndi akawambula ntu ati: Ayanganyu na? Vo wakati vati: Jesu yʼusi Nazareta.

⁸ Jesu akâkaluya diui ati: Dimi lakanyutedi nti: Dimʼone. Naka dimi kayanganyu, wane watshu;

⁹ dia nshidiya diui diakandati ati: Dimi kunshisha nduku omotshi a wane wakayambisha.

¹⁰ Simona Petero aki la yombo, ku ndi akayisomola, akakote ukambi wʼolombedi a wuki, akuhimbula tui dia lupami. Lukumbu lʼukambi ako laki Malako.

¹¹ Jesu akatela Petero ati: Osome yombo yaye lu dihusu. Dimi hano dikoho diakambisha Papa uka?

Wambunda Jesu

¹² Ului wʼalimbi la olombodi awo, la alami wʼasi Juda wakandi Jesu, wakukeleka.

¹³ Vo wakatshu la ndi ntundu le Anasi, ne dia ndi aki ukilu a Kayifasi, laki olombedi a ladiku eleku keso.

¹⁴ Kayifasi kako kakasha asi Juda yimba ati: Ololo untu otoi mvwela antu.

Petero Ambanguna Je su Langunu la Ntundu

¹⁵ Simona Petero ndu umbeki ukina wakayeli Jesu. Umbeki oso akeyamaka le olombedi a ladiku, akoto la Jesu lu lukumbu lʼolombedi a ladiku,

¹⁶ keli Petero akemala la suku dia lʼandja. Ku umbeki ako, lakeyamaka le olombedi a ladiku, akatumbi, akateketa la usekaseka a umuntu lakalamaka suku, ku ndi akotshiya Petero.

¹⁷ Ku usekaseka a umuntu lakalamaka suku akambula Petero ati: Ndu we keli umbeki omotshi wʼuntu one? Ndi akati ati: Kema.

¹⁸ Ekambi la elami wakemadi leko wahetsha dja yʼakalanga, ne dia aki tshitshi. Vo wakukaka dja, ndu Petero aki la wo emadi uka dja.

Olombedi a Ladiku Ambumbula Jesu

¹⁹ Olombedi a ladiku akambula Jesu diʼambeki andi la wetshelu andi.

²⁰ Jesu akûkaluya diui ati: Dimi lakatela antu diui diami lu seke. Dimi laketshaka antu nshi tshe lu temwelo, ndi lu etemwelo ka wuki lene atusanganaka asi Juda tshe. Dimi kumvuta nduku dikambu lu usheshe.

²¹ Dikambu kuna diamumbulaye na? Umbuli wane wakuki aui ami akambu wakamawatelaka. Ulungi, vo mbeyaka akambu wakamataka.

²² Lamʼakandati diui so, ulami omotshi lakemadi la le ndi, akakomola Jesu luwala; akati ati: Undi, wuhu oso mbambuyukaluya olombedi a ladiku diui?

²³ Jesu akûkaluya diui ati: Naka dikambu dia kolo mbutshimi, uditi. Keli naka dikambu diʼololo, ya ukundi ankomolaye na?

²⁴ Ku Anasi akutumi ukelekami le Kayifasi, olombedi a ladiku.

Petero Ambanguna Jesu Etena ka Hendi la ka Satu

²⁵ Simona Petero akemadi uka dja. Ku vo wakawumbula vati: Ndu we keli umbeki andi omotshi? Ndi akanguna; akati ati: Kema.

²⁶ Ukambi omotshi wʼolombedi a ladiku, laki onangu la lakahimbula Petero tui, akawumbula ati: Dimi kunkena la ndi lʼekambo uka?

²⁷ Ku Petero akanguna ntu. Kemʼedja lekeka lakeki.

Jesu la Ntundu ka Pilata

²⁸ Vo wakamo la Jesu uma laka Kayifasi, wakatshu la ndi lu luudu lʼelumbwelu. Aki la lokese. Vo vame komboto lu luudu lʼelumbwelu, vati: Tutukutuyasanya dia nde dambu diʼElekanelu.

²⁹ Ku Pilata akatumbi, akatshu utsha le wo; akawambula ati: Dikambu diakona diasongwelanyu untu one?

³⁰ Vo wakûkaluya diui vati: Utunduyala untu one aha utshi a kolo, tshiki shu hatukimo lʼanya aye.

³¹ Pilata akawatela ati: Nyuwose nyame, nyulumbuya uku elembe anyu. Asi Juda wakawutela vati: Eko ekila dia shu ndjaka untu,

³² ne dia nshidiya diui diakati Jesu, dia menya wuhu a nyoi kayunduvo.

³³ Ku Pilata akoto lu luudu lʼelumbwelu ntu, aketi Jesu; akawumbula ati: We keli Khumʼekanga kʼasi Juda?

³⁴ Jesu akûkaluya diui ati: Weme kamumbula osoku, kana akina mbakakutela dikambu diami?

³⁵ Pilata akûkaluya diui ati: Usi Juda kemi uka? Wudja aye hita la elombedi a waki mbakakukimo le mi. Kakayatshi na?

³⁶ Jesu akûkaluya diui ati: Diulelu diami diaha dia la kete nye. Utunduyala diulelu diami dia la kete nye mbedio, tshiki antu ami wutondwela ta, diaha dimi nkimwama lʼanya wʼasi Juda. Keli kakiane, diulelu diami diaha dia la kete nye.

³⁷ Ku Pilata akawumbula ati: Okone we eko Khumʼekanga? Jesu akâkaluya diui ati: Kamʼataye aso kedio, Khumʼekanga kemi. Dimi lakuto dia dikambu ne. Dia dikambu ne mbakamayi la kete, dia mvuta akambu wa mete. Kanga akambu wa mete tshe atukaka diui diami.

³⁸ Pilata akawumbula ati: Mete, eli na? Lamʼakandawumbula diui so, ndi akatumbi, akatshu le asi Juda ntu, akawatela ati: Dimi hambutanyi nduku la unungu.

³⁹ Keli nyu nyeko la etshelu ka dimi nyutshungwela untu omotshi lu dambu diʼElekanelu. Okone nyu nangaka dimi nyutshungwela Khumʼekanga kʼasi Juda?

⁴⁰ Vo wakahangohango ntu vati: Aha untu one, paka Baranabasi! Keli Baranabasi aki opotodi.