Joani 15 - La Bible en Otetela (Bible K'Ekila) 1991

“Dimi Utundu wʼOkodi Mete”

¹ Dimi utundu wʼokodi mete. Papa eli ukambi.

² Lutahi lami tshe lahato elua, ndi ayulunya. Lutahi tshe latotokaka elua, ndi ayulolongosola dia lo ndeka nto elua efula.

³ Kakiane nyu nyambuyala pudipudi, ne dia diui diakamanyutela.

⁴ Nyuyali lʼutema ami, dimi ndjali lʼetema anyu. Uku aheyi lutahi nto elua lame, tshikima lo mbeli lʼokodi, osoku ndu nyu hanyeyi nto elua, tshikima nyu mbeli lʼutema ami.

⁵ Dimi leko utundu wʼokodi, nyu nyeko tahi. One layuyala lʼutema ami, la dimi lʼutema andi, ndi ayoto elua efula. Lamʼayunyuyala nyaha la mi, nyu hanyeyi ntsha nduku dikambu.

⁶ Naka untu hayala lʼutema ami, ndi ayukadjema uku lutahi, ayolengela. Antu wayuyitshumanya, wayuyidja lu dja, ku yo yayutshumbama.

⁷ Naka nyu nyambuyala lʼutema ami, la aui ami wambuyala lʼetema anyu, nyolombe tshe kalanganyu, ku wayunyutshelato.

⁸ Uma lu dikambu so, Papa ayutumbwama, dia nyu nto elua efula. Okone nyu nyayuyala ambeki ami.

⁹ Dimi lambunyulanga uku akanangi Papa. Nyuyali lu ngandji kami.

¹⁰ Naka nyu nyambukitanyia elembe ami, nyu nyayuyala lu ngandji kami, uku akamakitanyia elembe a Papa, wemi lu ngandji kandi.

¹¹ Dimi lambunyutela akambu aso, ne dia ongenongeno ami ayali lʼetema anyu, la dia ongenongeno anyu aluli.

Engenyi Ami Mbenyu

¹² One eli olembe ami: nyukani ngandji, uku akamanyuki ngandji.

¹³ Nduku untu la ngandji kuleki kene ka mvwela engenyi andi.

¹⁴ Naka nyu nyambutsha uku anyutelami, keti engenyi ami mbenyu.

¹⁵ Dimi hanyeti ntu nti: Ekambi, ne dia ukambi heyi katsha uwandji andi. Keli dimi lambunyeta nti: Engenyi, ne dia lambunyewuya akambu tshe wakamuki le Papa.

¹⁶ Nyu konsonolami, keli dimi kambunyosonola, lambunyutuma dia nyu nto elua, la elua anyu wayali pundju. Okone Papa ayunyusha kene tshe kayunyolomba lu lukumbu lami.

¹⁷ Dimi lambunyutela akambu aso, dia nyu mbukana ngandji.

¹⁸ Naka wa la kete wambunyuhetsha, nyu mbeyaka nyati: Wakampetsha ntundu watanyuhetsha.

¹⁹ Utunyuyala wa la kete, tshiki wa la kete wutulanga asikawo. Ne dia nyu nyaha wa kete, keli dimi lakanyosonola uma le wa la kete, diako mbanyuhetsha wa la kete.

²⁰ Nyuho diui diakamanyutela nti: Ukambi haleki uwandji andi. Naka vo wakansuya, wayunyusuya ndu nyu. Naka vo wakakitanyia diui diami, wayukitanyia ndu diui dianyu.

²¹ Keli wayunyutshela akambu aso tshe ne dia lukumbu lami, ne dia vo haweyi one lakantumi.

²² Utunduyala dimi kundja, kumbatela diui, tshiki vo kundjala la kolo. Keli kakiane, vo hawukundja luha lu kolo yawo.

²³ One latumpetshaka, atuhetshaka ndu Papa.

²⁴ Utunduyala dimi kuntsha akambu lʼatei awo wahatatshi nduku untu, tshiki vo kundjala la kolo. Keli kakiane, vo wambutena, wambutuhetsha dimi la Papa.

²⁵ Keli dikambu so diambuyala, dia nshidiya diui diufundami lu elembe awo ati: Vo wakampetsha uhetshahetsha.

²⁶ Keli lamʼayuya Ukimanyidi, wayumunyutumela uma le Papa, Nyuma ka mete, ndi ayumvuta.

²⁷ Ndu nyu nyatumvutaka, ne dia nyu nyatuyalaka la mi umakʼetatelu.