Joani 13 - La Bible en Otetela (Bible K'Ekila) 1991

Jesu Ambotsha Ekulu wa Ambeki Andi

¹ La ntundu ka dambu diʼElekanelu, Jesu akeyi ati: Etena kami kambukuka ka dimi mumo uma la kete nye utsha le Papa, uku akandalangi antu andi la kete, osoku mbakandalangi edja ndu lʼekumelu.

² Lamʼakawalekaka ma dia dikolo, ku uhimbanyi akashili mboto lʼutema a Judasi Isakariyote, onʼa Simona.

³ Jesu akeyi ati: Papa ambukimo akambu tshe lʼanya ami, la dimi lambuya uma le Unyashungu, ndu layutsho le Unyashungu.

⁴ Ndi akunela uma la mesa, akakulula ahondo. Ndi akose dikundju dia mbudi, akalote.

⁵ Ku ndi akangula ashi lu donga, akatatela mbotsha ekulu wʼambeki, la mbekitula la dikundju dia mbudi.

⁶ Ku ndi akayi le Simona Petero. Petero akawumbula ati: Khumadiondjo, we ayumbotsha ekulu?

⁷ Jesu akawutela ati: We heyi katshami kakiane, keli we ayushihudia lʼokongo diku.

⁸ Petero akawutela ati: We hambotsha ekulu pundju. Jesu akâkaluya diui ati: Naka dimi halakotsha, keti we kema lu leke lami.

⁹ Simona Petero akawutela ati: Khumadiondjo, aha ekulu etu, keli ndu anya ami ndu ote ami.

¹⁰ Jesu akawutela ati: One lambotshama, mpumbaka mbotsha paka ekulu andi etu, ku ndi ayediama tshe. Nyu nyambediama, keli aha nyu tshe.

¹¹ Ne dia ndi akeyi one layufunga, mbakandati ati: Aha nyu tshe mbambediama.

¹² Lamʼakandashili mbaotsha ekulu, ndi akose ahondo andi, akadjase ntu. Ndi akawambula ati: Nyu mbeyaka dikambu diunyutshedimi?

¹³ Nyu mbetakami nyati: Umbetsha la Khumadiondjo. Ololo mbatanyu, osoku mbemi.

¹⁴ Ku naka dimi Khumadiondjo la Umbetsha lakanyotshisha ekulu, ndu nyu nyambuhumba mbotshanya ekulu.

¹⁵ Ne dia dimi lambunyusha djimbitelu ya ndu nyu ntsha, uku unyutshedimi.

¹⁶ Mete, mete, kanyutelami nti: Ukambi haleki uwandji andi. Ndu one lakatumama, haleki one lakutumi.

¹⁷ Naka nyu mbeyaka akambu ane, nyu nyayuyala la otshoko lamʼayunyuwatsha.

¹⁸ Aha nyu tshe mbatami: dimi mbeyaka wane wakamasonola. Keli dieli la afundelu nshidiyama ati: One latolekaka ma diami, kambompota ina.

¹⁹ Dimi lambutanyutedi kamʼahatayala dikambu. Okone lamʼayudiuyala, ku nyu nyayetawo nyati: Dimi oso.

²⁰ Mete, mete kanyutelami nti: Lalungula one latumami, ndi ambunungula. Lanungula, ambulungula one lakantumi.

Jesu Ambuta Untu Layufunga

²¹ Lamʼakati Jesu akambu aso, ndi akadidima lʼutema; akati ati: Mete, mete, kanyutelami nti: Otoi anyu omotshi ayunfunga.

²² Ambeki andi wakendana wadja tamu lʼetema vati: Untu akona atandi na?

²³ Umbeki andi omotshi wakandalangaka aki la ndi lu mesa, uwekami lu tulu.

²⁴ Ku Simona Petero akaweti lʼepapi ka lunya, akawutela ati: Ututeli one latandi.

²⁵ Lamʼakandekami ekongokongo lu tulu ka Jesu, ndi akawumbula ati: Khumadiondjo, na ndi na?

²⁶ Ku Jesu akûkaluya diui ati: One layumosohela ukama a ma, layumuwusha, keli ndi. Ku lamʼakandasohe ukama a ma, ndi akawusha Judasi, onʼa Simona Isakariyote.

²⁷ Lamʼakandose ukama a ma, Satana akoto lʼutema andi. Ku Jesu akawuti la ati: Utshi dikambu diatshaye esadi.

²⁸ Nduku untu laki lu mesa lakeyi dikambu diakandawutela diui so.

²⁹ Ne dia Judasi aki la tapa, ku amotshi wakakani vati: Jesu ambuwutela ati: Usumbi diango diahumbasu ne dia dambu, kuyanga dia nbisha asi wula engo kemotshi.

³⁰ Lamʼakandose ukama, kemʼedja, ndi akatumbi; aki lʼutshu.

Olembe wʼUyuyu

³¹ Lamʼakandatumbi, Jesu akati ati: Kakiane Onʼa untu ambutumbwama, ndu Unyashungu ambutumbwama lʼutema andi.

³² Naka Unyashungu ambutumbwama lʼutema a Jesu, ndu Unyashungu ayutumbwama lʼutema andi. Kemʼedja, ndi ayutumbula.

³³ Ana wa tshitshe, etenyi ka tshitshe ketu kekimi la nyu. Nyu nyayunyanga, keli uku akamatela asi Juda nti: Hanyeyi ntsho lene ayumutsho, osoku mbanyutelami kakiane.

³⁴ Olembe wʼuyuyu mbamumunyusha, dia nyu mbukana ngandji. Nyukani ngandji uku akamanyuki ngandji.

³⁵ Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.

Jesu Ambutela Petero Dia Langunu Landi

³⁶ Simona Petero akambula Jesu ati: Khumadiondjo, lendi atayatshu? Jesu akûkaluya diui ati: Kakiane, we heyi ndjelami lene ayumutsho, keli lʼokongo diku, we ayundjela.

³⁷ Petero akawumbula ati: Khumadiondjo, dikambu kuna diahameyi nkuyela kakiane? Dimi layukimo lumu lami dikambu diaye.

³⁸ Jesu akûkaluya diui ati: We kayukimo lumu laye lu dikambu diami? Mete, mete, kakutelami nti: Lekeka lateki, we ayumanguna tena satu.