Joani 12 - La Bible en Otetela (Bible K'Ekila) 1991

Mariya Ambukita Jesu Malashi la Betaniya

¹ Nshi shamalu yekiko la ntundu ka Elekanelu, Jesu akayi la Betaniya, lene aki Lazaro, lakandulula uma lu nyoi.

² Ku vo wakukatela ma dia dikolo leko. Mata akakambela ulimu. Keli Lazaro aki omotshi a wane waki la ndi lu mesa.

³ Mariya akose livere otoi la malashi wa narado wʼushinga wulu, akakiti Jesu lu akaka. Ndi akukitula akaka la divu diandi. Luudu lakaluli too la upumu wa malashi.

⁴ Keli umbeki andi omotshi, Judasi Isakariyote, ona Simona, one laki la dikambu dia mbufunga, akambula ati:

⁵ Okoko wana wakiwo kunsundja malashi one lu denariyo kama shatu, dia mbisha akanga a weula?

⁶ Ndi akati diui so, aha ne dia ndi akakanelaka akanga a weula; keli ne dia ndi aki uvi, ndu aki la tapa diakandosaka diango diakawakitshaka loko.

⁷ Ku Jesu akati ati: Nyuwete, ankitshiya malashi one, edja ndu lushi layuwunkhunde.

⁸ Ne dia nyu la akanga a weula nshi tshe lʼatei anyu keli nyu kema la mi nshi tshe.

Wambuyanga Ndjaka Ndu Lazaro

⁹ Lamʼakenyi ului a wuki wʼasi Juda vati: Jesu eko leko, vo wakayi, aha lu dikambu diandi ntu, keli dia ndjaka ndu Lazaro lakandulula uma lu nyoi.

¹⁰ Keli elombedi a waki wakambwana dia vo ndjaka ndu Lazaro,

¹¹ ne dia uma lu dikambu diandi asi Juda efula wakatshu, waketawo Jesu.

Jesu Ambukuma la Jerusalema la Lutumbu

¹² La wedi a pindju, ului a wuki wʼantu wakayi lu dambu, wakuki vati: Jesu kayayi la Jerusalema.

¹³ Vo wakose wanga wʼatuku, wakatshu dia ntulungula. Vo wakahangohango vati: Hosana! One luyi lu lukumbu la Khumadiondjo, ee, Khumʼekanga ka Isariyele, atumbwami!

¹⁴ Lamʼakenyi Jesu osongo a punda, ndi akahema ladiku diawo, uku ufundami ati:

¹⁵ Ona umuntu a Siona, tukaki woma. Enda, Khumʼekanga kaye ambuya, ayahemi ladiku dia osongo a punda.

¹⁶ Ambeki wa Jesu kumbeya akambu aso ntundu. Keli lamʼakandatumbwama, vo wakuho vati: Akambu aso wakafundama dikambu diandi. Ndu vo wakushela akambu ako.

¹⁷ Ului wʼantu waki kame la ndi, lamʼakandeti Lazaro uma lu diumbu ndu lamʼakandawulula uma lu nyoi, wakasanya dikambu diako.

¹⁸ Dia dikambu so mbakatshu ului wʼantu dia ntulungula, ne dia vo wakuki vati: Ndi akatshi djimbitelu sho.

¹⁹ Ku Afarise wakatanela vati: Nyendi okone wahanyushimbi; enda, wa la kete tshe wambuyela.

Aui wa Jesu wa Ndjihelu la Ntundu kʼAntu

²⁰ Asi Ngirika amotshi waki lʼatei a wane wakatshu dia ntotemola lu dambu.

²¹ Vo wakayi le Filipo, usi Betesayida ka la Ngalili, wakôlombe vati: Khumadiondjo, shu nangaka mena Jesu.

²² Filipo akatshu, akatutela Andere. Filipo la Andere wakatshu, wakatutela Jesu.

²³ Jesu akâkaluya diui ati: Unya ambukuka dia Onʼa untu ntumbwama.

²⁴ Mete, mete, kanyutelami nti: Naka lotongo lʼupunga haloko lu kete, la haluvu, lo layuyala lame. Keli naka lo lambuvo, lo layoto tongo efula.

²⁵ One lalanga lumu landi, ambulushisha. One latuna lumu landi la kete nye, ayululama utsha lu lumu la pundju.

²⁶ Naka untu ambunkambela ulimu, ndi andjeli. Ukambi ami ayuyala lene ayumuyala. Naka untu ayunkambela ulimu, Papa ayolemia.

²⁷ Kakiane utema ami ambudidima. Kayumuta na? Papa, unshimbeli uma lu unya one. Keli dimi lakayi lu unya one dia dikambu ne.

²⁸ Papa, utumbuli lukumbu laye. Ku diui diakayi uma lʼulungu ati: Dimi lambulutumbula, layulutumbula ntu.

²⁹ Ului wʼantu wakemadi lawo, wakuki diui diako, wakati vati: Dikhungula so. Akina vati: Dikendji dia Unyashungu dimotshi mboteketshi la ndi.

³⁰ Jesu akâkaluya diui ati: Diui so hadiuyi dikambu diami, keli dikambu dianyu.

³¹ Elumbwelu ka kete nye keko kakiane. Kakiane umbuledi a kete nye ayukadjema.

³² Ku lamʼayumunyama uma lu kete, layukutula antu tshe uya le mi.

³³ Ndi akati osoku, dia mbaewuya dia wuhu a nyoi kayunduvo.

³⁴ Ului wʼantu wakûkaluya diui vati: Takuki uma lʼelembe vati: Kristu atuyalaka pundju. Ya ukundi ataye wati: Dieli la Onʼa untu munyiyama? Akona oso eli Onʼa untu?

³⁵ Ku Jesu akawatela ati: Yanyi yayuyala etenyi ka tshitshe ketu lʼatei anyu. Nyutetetshi lamʼekinyu la yanyi, udjima atukunyutana. One leteta lu udjima, heyi lene atandatshu.

³⁶ Lamʼekinyu la yanyi, nyetawo dia nyu ndjala ana wa yanyi. Akambu aso mbakati Jesu, ku ndi akatshu akatuwashama.

Euhwelu ka Dikambu Dia Jesu

³⁷ Keli kuyanga mbakandatshaka tulimbitelu efula osoku la ntundu kawo, vo kumbetawo.

³⁸ Ne dia nshidiya diui dia umvutshi Isaya diakandati ati: Khumadiondjo, akona aketawo diui diasu? Le na akenama lunya la Khumadiondjo?

³⁹ Dia dikambu ne mbakiwo kumbetawo, ne dia Isaya akati ati:

⁴⁰ Ndi akuli ashu awo, akakikitsha etema awo, Ne dia vo ntawenaki la ashu awo, taweyaki la etema awo. Tawukadimoki dia dimi mbakonoya.

⁴¹ Akambu aso mbakati Isaya ne dia ndi akenyi lutumbu landi. Ndi akati dikambu diandi.

⁴² Keli embuledi efula wakawetawo. Keli vo kundjashula, ne dia Afarise watukatundja uma lʼetemwelo;

⁴³ ne dia vo wakaleki nanga lutumbu lʼuma le antu uleki lʼuma le Unyashungu.

Jesu Ambuta Ntu Dikambu Diakandayi la Kete

⁴⁴ Jesu akahangohango ati: One lambetawo, hambetawo dime, keli ambetawo one lakantumi.

⁴⁵ One latomenaka, atenaka lakantumi.

⁴⁶ Dimi lakayi uku yanyi la kete, Dia untu tshe layumbetawo, tayalaki lu udjima.

⁴⁷ Naka untu ayuka aui ami, ku ndi hakitanyia, dimi halulumbuya. Ne dia dimi kundja dia ndjulumbuya wa la kete, keli dia ndjashimbela.

⁴⁸ One latuna, lahalungula aui ami, ndi eko la one layulumbuya. Diui diatami, mba, ulumbuya lushi lʼekumelu.

⁴⁹ Ne dia dimi kundjata dime. Keli Papa lakantumi, kakambisha olembe uku ayumuta ndu wuhu wayumoteketa.

⁵⁰ Dimi mbeyaka nti: Olembe a Papa eko lumu la pundju. Akambu watami, dimi latuwataka uku akamvutela Papa.