Joani 10 - La Bible en Otetela (Bible K'Ekila) 1991

Wela wa Lukumbu lʼEkoko

¹ Mete, mete kanyutelami nti: One lahoto lu suku dia lukumbu lʼekoko, lambela amakina, uvi la opotodi mbendi.

² Keli one latotoka lu suku, eko ulami wʼekoko.

³ Ulami a suku atudihulaka; ekoko watukaka diui diandi. Ndi atetaka ekoko andi kumbu, atelombolaka utsha lʼandja.

⁴ Lamʼatundutundjaka ekoko andi tshe, ndi atetaka la ntundu kawo. Ekoko watuyelaka, ne dia vo mbeyaka diui diandi.

⁵ Vo hawuyeli untu ukina, keli vo wavulawo, ne dia vo haweyi diui dia antu akina.

⁶ Wela oso mbakawaukela Jesu, keli vo kunshihudia akambu wakandawatela.

Ulami wʼOlolo wʼEkoko

⁷ Jesu akawatela ntu ati: Mete, mete kanyutelami nti: Suku diʼekoko mbemi.

⁸ Tshe wakayi la ntundu kami, weko evi la apotodi. Keli ekoko kumbaukela.

⁹ Suku mbemi: layoto le mi ayushimbamela, ayotoka, ayutumbaka, ayutanaka adiyu wa nde.

¹⁰ Uvi hayi uyaya, atuyakaka paka dia mvua, dia ndjaka mdu dia nanya. Dimi lakayi dia antu ndjala la lumu, la dia vo ndjala la lo efula.

¹¹ Dimi leko ulami wʼololo wʼekoko. Ulami wʼololo wʼekoko atuvwelaka ekoko.

¹² Ufutami, laha ulami, laha kanga ekoko, lamʼayundena laundu ayayi, ayutshika ekoko, ayulawo; laundu ayehandjula.

¹³ Ndi ayulawo, ne dia ndi eko ufutami; ndi hakanela ekoko.

¹⁴ Dimi leko ulami wʼololo wʼekoko. Dimi mbeyaka ekoko ami, ndu vo mbeyakami.

¹⁵ Uku ambeya Papa, mbaweyami. Dimi lambukimo lumu lami lu dikambu dia ekoko ami.

¹⁶ Dimi leko la ekoko ekina waha lu lukumbu lone. Dieli la mi dia mbeia ndu vo. Vo wayuka diui diami, wayuyala ului otoi ndu ulami otoi.

¹⁷ Dia dikambu so mbananga Papa, ne dia dimi lambukimo lumu lami dia losa ntu.

¹⁸ Nduku untu lampotolalo, keli dime lambulukimo. Dimi la wulu wa lukimo, ndu la wulu wa losa ntu. Olembe oso mbakamalungula uma le Papa.

Antu Wambudja Tamu Ntu lu Dikambu Dia Jesu

¹⁹ Asi Juda wakatana ntu ne dia aui wa Jesu.

²⁰ Efula kawo wakati vati: Ndi eko la odienge; ndi ambudjo dadi. Ukundi alunganyu aui andi?

²¹ Akina wakati vati: Aui aso kema wa kanga odienge. Odienge mbeyaka nsenya akanga a tutshungu?

Lu Dambu diʼEkidielu ka Etemwelo

²² Dambu diʼEkidielu kʼetemwelo diakayala la Jerusalema.

²³ Aki nshi ya tshitshi, Jesu akatakendakendaka lu etemwelo lu mbalasa ka Solomona.

²⁴ Ku asi Juda wakawumbula vati: Edja ndu kaandi ayuyukimo ntutshimbiatshimbia? Naka we keli Kristu, utuhunweli.

²⁵ Jesu akâkaluya diui ati: Dimi lakanyutela, ku nyu hanyumbetawo. Elimu watshami lu lukumbu la Papa, vo mbamvuta.

²⁶ Keli nyu hanyumbetawo ne dia nyu kema wa lu ekoko ami.

²⁷ Ekoko ami watukaka diui diami. Dimi mbaeyaka, vo watundjelaka.

²⁸ Dimi mbashaka lumu la pundju. Vo hawuvo pundju. Nduku untu ayuwahotola uma lu lunya lami.

²⁹ Papa lakambishawo, kuleki tshe. Nduku untu leli la wulu wa mbahotola uma lu lunya la Papa.

³⁰ Dimi la Papa teko otoi.

³¹ Asi Juda wakatongona ave ntu dia mbuka.

³² Jesu akâkaluya diui ati: Dimi lakanyenya etsha efula wʼololo uma le Papa. Dikambu diakona diutshim, diambukanyu ave?

³³ Asi Juda wakûkaluya diui vati: Shu hatukuki ave ne dia etsha aye wʼololo, keli ne dia lotengo laye; ndu ne dia we untu, ambuyafanya la Unyashungu.

³⁴ Jesu akâkaluya diui ati: Undi, hafundami lʼelembe ati: Dimi lakati nti: Nyu nyeko ditemolatemola?

³⁵ Naka ndi aketi wane wakayakaka diui dia Unyashungu le wo ati: Ditemolatemola (afundelu haweyama ndjakema).

³⁶ Ku nyu mvutaka dia one lakakidia Papa, lakandatumi la kete, nyati: We ambotenga Unyashungu; ne dia dimi lakati nti: Dimi leko Onʼa Unyashungu?

³⁷ Naka dimi hatutshaka elimu wa Papa, tanyumbetawoki.

³⁸ Keli naka dimi latuwa-tshaka, kuyanga nyu hanyumbetawo, nyetawo etsha eku. Dia nyu mbeya la nimbitela nyati: Papa eko lʼutema ami, la dimi leko lʼutema a Papa.

³⁹ Vo wakayangi mbunda ntu, ku ndi akahoso uma lʼanya awo.

Jesu Ambukalula la Wedi a Jorodana

⁴⁰ Jesu akatshu ntu la wedi a Jorodana, lene akabatizaka Joani ntundu. Ndi akahangi leko.

⁴¹ Antu efula wakayi le ndi; wakati vati: Mete, Joani kuntsha nduku djimbitelu. Keli akambu tshe wakati Joani dia untu one, waki mete.

⁴² Efula wakawetawo leko.