Jeremiya 6 - La Bible en Otetela (Bible K'Ekila) 1991

Dianyelu dia Jerusalema la Juda

¹ Nyu asi Bendjamina, nyumo uma lʼatei wa Jerusalema, Nyuyashimbeli, nyutudi amama la Tekoa. Nyuteme djimbitelu ya mbewula antu la Bete-Hakereme! Ne dia elanyelu lu ndjayi uma la ngelʼa kushi, elanyelu ka mamba.

² Dimi layulanya ona umuntu a Siona, Leli dimena la elundji ka yooyoo.

³ Alami wayuya la dungalunga diawo uya le ndi. Vo wayuyeme mvudu yawo yʼapema lʼutshimba andi. Vo tshe wayulesha dungalunga diawo untu lʼuntu lu dihuli diandi.

⁴ Nyuyalongosole dia ndo la ndi! Nyuyeti tutshu, tututateli ta unya lʼatei ote. Ndi dikambu dia lunyangu le su li! ne dia unya ambeta. Aledi wa dikolo wambutalo.

⁵ Nyeso tutshu lʼutshu, tutuhandjuli mvudu yandi ya khumʼekanga.

⁶ Ne dia Latuyalaka Kanga lulimbilimbi kata ati: Nyunyukuli etamba awo; nyutshimeli Jerusalema ngeli. Dieli la usumba one nsuyama. Wengiya utu mbeli lʼatei awo.

⁷ Uku atutundjaka eteko ashi ato, mbatuwutundjaka kolo yawo. Kumu ya ndjaudi la yʼelanyelu yatukemaka lʼatei awo. Kandji la puta yatenamaka la ntundu kami tena tshe.

⁸ Jerusalema li, ulungi wetshelu; Utema ami atukumamitwana la ye! Dimi ntukukete tongo tu, aha lʼuntu.

⁹ Latuyalaka Kanga lulimbilimbi kata okone ati: Nyokonole atshikadi wa Isariyele, Uku atuwokonolaka elua wa vinyo. Uwahe lunya laye ntu, uku atunyinginyaka umumbi wʼelua ekodi.

¹⁰ Le na ayumoteketa, ndu ayumudja omenyi dia vo mpukama? Atui awo watalongoswama, vo haweyi mbuka. Diui dia Latuyalaka diambuyala engo ka dionyo le wo; Vo hawudingenangena.

¹¹ Diako mbamumulula too la ududu wa Latuyalaka, Handjeya mbukike ntu. Utshululi ladiku diʼana weli lʼosese, Ladiku diʼelongo wʼapami wusanganyi kame, Ne dia umi la wadi wayosama kame, Ndu ekumanyi la usumbi wa lukusumbi kame.

¹² Mvudu yawo, dikambo diawo, La wadiewo wayukimwama le akina, Ne dia dimi layusimbula lunya lami Ladiku dia kete nye, mbata Latuyalaka.

¹³ Ndu wa tshitshe ndu a waki, Vo tshe weli akanga a lukaki. Ndu umvutshi ndu olombedi, Vo tshe watutshaka lukesu.

¹⁴ Vo watombaka puta ya wudja ami yema tshitshe, Ku vo mvuta vati: Ambushila, ambushila! ku to katashili.

¹⁵ Vo wakuki sonyi lamʼakawatshi akambu wa wononyi? Kema, vo konombo, kumbuka sonyi nduku yema! Diako mbayuwoko lʼatei a waku watokokaka. Vo wayolemba lamʼayumasuya, mbata Latuyalaka.

¹⁶ Latuyalaka kata okone ati: Nyemali lu mbuka, nyendi, Nyumbuli mbuka yʼedjedja lenʼeli mbuka kʼololo. Nyokendekende loko, ku nyu nyayutana ki lu etema anyu. Keli vo wakakaluya diui vati: Shu hatokendakenda loko.

¹⁷ Dimi lakakitsha alami lasuki la wudja aye nti: Nyuhukami lundju la dimama! Keli vo wakakaluya diui vati: Shu hatuhukama.

¹⁸ Okone nyu wedja nyuhukami. Nyu ului wʼantu, nyulungi kene kayuyala le wo!

¹⁹ Kete li, uhukami! Ulungi, dimi lutsha mbela elanyelu le wudja one, Ulua wa tukanyi tawo, Ne dia vo kumpukama aui ami. Vo wakonyola elembe ami.

²⁰ Uhumba akona weli la mi wa diango diʼepumu uma la Sheba, La malashi uma lu kete yʼetali? Dimi halungula elambu anyu. La elambu anyu wa lutshumba hawongenyangenya.

²¹ Diako mbata Latuyalaka ati: Enda, dimi layukitsha etamba wa ntakanya la ntundu ka wudja one. Loko kayuwutakanaka, ndu washi ndu ana kame; Usukanyi ndu ongenyi wayulanyema.

²² Latuyalaka kata ati: Nyulungi, wudja omotshi wuyayi uma lu kete ya la ngelʼa kushi; Wudja a wuki wambunela uma lu kuma ka kete.

²³ Vo watukimelaka uta la dikonga, Vo weli akanga wʼusihi, waha la ketshi. Aui awo watudikitaka uku ashi a waki. Vo watahemaka la diku dia falasa, Watuyalongosolaka uku untu otoi katatshu utsha lu ta, Dia ndjukolosha we ona umuntu a Siona.

²⁴ Lamʼakatuki lukumu loso, anya asu wakakomo, Sasi dia woma diakatundi, kandji uku umuntu latata lono!

²⁵ Tanyutshokaki utsha lu dikambo, tanyetaki lu mbuka, Ne dia yombo yʼutunyi la woma wa mamba weko lʼutshimba tshe.

²⁶ We ona umuntu a wudja ami, olote akutu, ukidimo lʼutuku; Uleli utanda uku wʼona pami etoi, okedia asoi wʼokei, Ne dia unanyishi ayuya shashimuya le su.

²⁷ Dimi lambukete etangelu la lungeli lʼatei a wudja ami, Dia we mbalimbitela la mbedika ditshelu diawo.

²⁸ Vo tshe weli akanga wʼuhindudi, watengolaka la amamanyishi. Vo weko ohotela la luwulu, Vo tshe watutshaka kolo.

²⁹ Wambufufa khuka wulu, luwulu lambutshumbama. Vo wambena pa anyanya dia ledia, Keli akedi hawumo.

³⁰ Watuwaetaka vati: Fesa yʼanyanya, Ne dia Latuyalaka akatuni.