Jeremiya 52 - La Bible en Otetela (Bible K'Ekila) 1991

Ekwelo ka Jerusalema

¹ Zedekiya aki la deku akumi ahendi la otoi lamʼakandayala khumʼekanga. Ndi akulela deku dikumi la otoi la Jerusalema. Lukumbu la nyangu laki Hamutala, onʼa Jeremiya, usi Libina.

² Zedekiya akatshaka akambu wa kolo lu ashu wa Latuyalaka, uku tshe kakatshaka Jehoyakima.

³ Uma lu kele ka Latuyalaka mbakayala akambu ane la Jerusalema ndu la Juda. Osoku mbakandawatshanya uma la ntundu kandi. Zedekiya akahindwela khumʼekanga ka Babilona.

Ekwelo ka Jerusalema

⁴ Lʼeleku ka divwa ka diulelu diandi, lu lushi la dikumi lu ngondo ka dikumi, Nebukadineza, khumʼekanga ka Babilona, akayi ndi la alimbi andi tshe dia ndjolosha Jerusalema. Vo wakayudinga usumba, wakatshimi ngeli lʼutshimba tshe.

⁵ Ku wakadingi usumba edja ndu lʼeleku ka dikumi la otoi ka diulelu dia khumʼekanga Zedekiya.

⁶ Lu lushi la divwa la ngondo ka nei, ndjala ka kasha kakayala wulu lʼusumba. Ma tadiakiko dia asi wudja nde.

⁷ Asi usumba wakatundula wushu lu lukumbu lʼusumba. Ku khumʼekanga la andoshi wa ta tshe wakatumbi lʼutshu lu mbuka ka la suku lʼasa peli pendi, lasuki lʼekambo ka khumʼekanga, wikalawo. Etena kako asi Kaladiya wakadingi usumba tshe. Ku andawi wakakimela mbuka kʼutsha lʼusui wa Araba.

⁸ Keli ului wʼalimbi wʼasi Kaladiya wakayelana la khumʼekanga Zedekiya, wakatuwunda lʼesui wa la Jeriko. Ku ului andi tshe wʼalimbi wakudiangana.

⁹ Ku wakandi khumʼekanga, wakatshu la ndi la Ribila, lu kete ya Hamata, le khumʼekanga ka Babilona; wakatulumbuya.

¹⁰ Khumʼekanga ka Babilona akadiaki ana apami wa Zedekiya la ntundu kandi. Ndi akadiaki ndu ewandji tshe wa Juda la Ribila.

¹¹ Khumʼekanga ka Babilona akatundula Zedekiya ashu, akukeleka molola wʼohotela, akatshu la ndi la Babilona. Ndi akatuwudja lu lukanu leko, edja ndu lushi landi la nyoi.

Lohombo la Juda

¹² Lu lushi la dikumi lu ngondo ka tanu, lʼeleku ka dikumi la divwa ka diulelu dia Nebukadineza, khumʼekanga ka Babilona, kakayi Nebuzaradana, olombodi wʼelamelu, lakemalaka la ntundu ka khumʼekanga ka Babilona la Jerusalema.

¹³ Ndi akayutshumba luudu la Latuyalaka, luudu la khumʼekanga, la mvudu tshe ya la Jerusalema. Mvudu tshe ya waki mbakandatshumbi.

¹⁴ Ului tshe wʼalimbi wʼasi Kaladiya waki kame lʼolombodi awo, wakahandjula peli dia lukumbu dia lʼutshimba wa Jerusalema.

¹⁵ Ku Nebuzaradana, olombodi wʼalami, akatole antu wakaleki wula fumbi, wane wakatshikala lʼusumba, wako wakotwela khumʼekanga ka Babilona, ndu atshikadi lʼatei wʼetshudi, lu fumbi.

¹⁶ Keli Nebuzaradana, olombodi wʼului wʼalami, akatshiki asi wudja amotshi wuleki wula, dia vo ndjala alami wa dikambo dia vinyo ndu ekambi wa dikambo.

¹⁷ Asi Kaladiya wakatshatsha dikoho diʼehotela diaki lu luudu la Latuyalaka, dikitshelu, puki ka wuki kʼohotela kaki lu luudu la Latuyalaka. Vo wakembe ehotela adio tshe utsha la Babilona.

¹⁸ Wakatole ndu puki, kasu, tosholo ta nyimaka atala, akoho, la diango tshe diʼohotela diakawatshaka ulimu.

¹⁹ Olombodi wʼalami akembe pusu ya membaka akalanga, la alonga: kene kakatshama la paunyi lʼului wa paunyi, la kene kakatshama la fesa lʼului wa fesa.

²⁰ Ehotela wʼuma lu dikoho pendi, puki ka wuki, la wuma lu difanelu dia ngombe dikumi la pendi, diakatatshi Solomona dikambu dia luudu la Latuyalaka, diaki wutshu wakiwo kumbeya mbala

²¹ Utali wa ekoho kemotshi waki kubita dikumi la enanei, utshimbedi ato waki kubita dikumi la hyendi. To kaki hwe lʼatei, la keka kato kaki pita nyei.

²² Ote wʼohotela waki ladiku diato. Vo waki lʼutali wa kubita tshanu. Lʼutshimba wʼote wʼekoho kaki ukalamandji la dikomi diʼutamba tshe ohotela utu. Osoku mbaki ndu lu ekoho ka hendi kame la dikomo diʼutamba.

²³ Dikomi diʼutamba diaki akumi divwa la samalu lu beke nei. Dikomi diʼutamba lʼutshimba wʼukalamandji diaki yediko ya lukama.

²⁴ Olombodi wʼalami akandi olombedi wa la diku Seraya, olombedi a hendi Zefaniya, kame la alami wa suku dia luudu la Latuyalaka.

²⁵ Ndi akandi ndu usi alimbi laki olombodi wʼandoshi wa ta, kame la apami esambeli waki andaki wa khumʼekanga, wakatanema lʼusumba; ndu ufundji wʼumbuledi wʼalimbi, lakasanganyaka wudja; ndu apami akumi asamalu wa lu wudja wakatanema lʼusumba.

²⁶ Nebuzaradana, olombodi wʼalami, akawaose, akatshu la wo utsha la Ribila le khumʼekanga ka babilona.

²⁷ Khumʼekanga ka Babilona akakomola, akadiaki la Ribila lu kete ya Hamata. Osoku mbakatolama Juda fumbi uma lu wudja awo.

²⁸ Lanʼeli antu wakatole Nebukadineza lu fumbi: lu eleku kʼesambeli, asi Juda nunu satu akumi ahendi la asatu.

²⁹ Lu eleku ka dikumi lʼenanei ka diulelu diandi, ndi akatole antu kama enanei akumi asatu la ahendi uma la Jerusalema.

³⁰ Lu eleku ka akumi ahendi la asatu ka diulelu dia Nebukadineza, Nebuzaradana, olombodi wʼalami akatole asi Juda kama esambeli akumi anei la atanu lu fumbi. Vo tshe waki antu nunu nei la kama shamalu.

Jehoyakina Ambukimwama Ndu Ambolemiama lu Babilona

³¹ Lu eleku kʼakumi asatu lʼesambeli ka lohombo la Jehoyakina, kaki eleku ka ntundu ka Evile-Merodaka, khumʼekanga ka Babilona. Lu eleku kako, lu lushi lʼakumi ahendi lʼatanu lu ngondo ka dikumi la ahendi kakandatundja Jehoyakina, khumʼekanga ka Juda, uma lu lukanu.

³² Evile-Merodaka akasawulaka la ndi ololo; akedia kiti kandi ka diulelu ladiku dia kiti ya khumi ya dikanga yaki kame la ndi la Babilona.

³³ Ndi akukulula ahondo andi wa lukanu, akolotsha ahondo akina. Ku Jehoyakina akalekaka ma laka khumʼekanga nshi ya lumu landi tshe.

³⁴ Khumʼekanga ka Babilona aka; wushaka ehumba andi la lushi la lushi nshi ya lumu landi tshe, edja ndu lushi landi la nyoi.