Jeremiya 51 - La Bible en Otetela (Bible K'Ekila) 1991

Elumbwelu ka Eatuyalaka lu Babilona

¹ Latuyalaka kata ati: Nyuki, dimi layunyia odienge wʼelanyelu Dia ndo la Babilona la asi Kaladiya.

² Dimi layutuma afufudi Utsha la Babilona dia vo ntufufula. Vo wayete kete yawo hwe, Wayudinga lu beke tshe lushi lawo lʼelanyelu.

³ Nyoleme eta dia ndo la waku watolemaka eta, Ndu la waku watolotaka eloto wa ta! Tanyuhandjaki elongo awo wʼapami! Nyushili alimbi awo tshe ushiki.

⁴ Vo wayoko edu lu kete ya Kaladiya, Wutundotundomi la dihumo lu esese wa Babilona.

⁵ Ne dia Isariyele la Juda konsekama le Unyashungu awo, Latuyalaka Kanga lulimbilimbi, Kuyanga kete yʼasi Kaladiya yambulula too La enungu le lʼEkila lʼlsariyele.

⁶ Nyulawo uma la Babilona. Nyu tshe untu lʼuntu ashimbeli lumu landi, Nyutukudiakema lu elanyelu kawo, Ne dia etena kʼosombweyo ka Latuyalaka kambukuka. Ndi utsha mbafuta uku etsha awo.

⁷ Babilona aki uku dikoho oia paunyi Lu lunya la Latuyalaka, Diakandjuya kete tshe. Wedja wakano wanu awo, Diako mbakawayala la yimba ntshimba.

⁸ Babilona amboko shashimuya, ambuhandjo vwa. Nyusekhumi lʼalelu lu dikambu diandi. Nyotolele lodia dikambu dia puta kandi, Undu ndi ayokono.

⁹ Shu takalangi nkonoya Babilona, keli vo konkono. Nyeso, tutshiki, tutshu shu tshe untu lʼuntu utsha lakawo, Ne dia elumbwelu kawo kambukuma pulu lʼulungu, Kambediama utsha lu wangi.

¹⁰ Latuyalaka ambutenya sambu kʼololo lu dikambu diasu. Nyuyeti tutusanya ulimu wa Latuyalaka, Unyashungu asu, lu Siona.

¹¹ Nyoketemole akhuwa! Nyukimeli dingawu. Latuyalaka ambutshutshiya, ndu ambuhashahasha tukanyi ta khumi ya dikanga yʼasi Mediya, ne dia ndi ambusanguya nanya Babilona. Oso eli esombweyo ka Latuyalaka, ee, esombweyo ka etemwelo kandi!

¹² Nyuhane ekuhu ka koi lu eheli ka Babilona. Nyukikitsha wimbe wa ta, Nyukitsha alami, nyukitsha ndjalu. Latuyalaka akasanguya, Ndu ambutsha kene kakandataka lu dikambu diʼasi Babilona.

¹³ We ludjashi lasuki lʼashi a waki, Ndu kanga waumbelu efula, ekumelu kaye kambuya. Ushinga wa lumu laye wambuhimbo.

¹⁴ Latuyalaka Kanga lulimbilimbi ambuyatshiba ati: Elu, dimi layukuludia too lʼantu uku endjo, ku vo wayukudjela waelu wʼelembielo.

¹⁵ Unyashungu akatungi kete la wulu andi; Akashikike andja la yimba yandi; Akakokola ulungu la ewu kandi.

¹⁶ Lamʼatundutaka diui, ashi wa lʼulungu watudikitaka. Ndi atukutulaka wangi uma la kuma ya kete. Ndi atungadimuyaka ndjadi dikambu dia mvula. Ndi atelaka lopepe uma lu waumbelu andi.

¹⁷ Untu tshe atuyalaka enginya lu yimba yandi. Utshudi a paunyi tshe atutshamaka sonyi uma lu dikishi diandi Ne dia dikishi diandi dia lolelola dieli kashi, Dio kema la lumu.

¹⁸ Dio dieko anyanya, ulimu wa lukesu Lamʼayuya elumbwelu, Dio diayulanyema.

¹⁹ One leli ukito wa Jakoba kema uku dio, Ne dia ndi kakatungi tshe. Isariyele eli wudja andi wʼukito. Latuyalaka Kanga lulimbilimbi keli lukumbu landi.

²⁰ We eli uhumo ami, ehumo kami ka ta. La ye, mbayumotetshatetsha wedja. La ye, mbayumulanya waulelu.

²¹ La ye, mbayumotetshatetsha falasa la umbahemi ato. La ye, mbayumotetshatetsha pusupusu la one latukiahemaka.

²² La ye, mbayumotetshatetsha pami la umuntu. La ye, mbayumotetshatetsha usumbi la dikenda. La ye, mbayumotetshatetsha olongo a pami la usekaseka a umuntu.

²³ La ye, mbayumotetshatetsha ulami wʼekoko la ekoko andi. La ye, mbayumotetshatetsha ukambi wʼekambo la ngombe yandi. La ye, mbayumotetshatetsha ambuledi la elombodi awo wʼalimbi.

²⁴ Dimi layutshela Babilona lʼasi Kaladiya tshe kolo tshe kakawatshi la Siona lu ashu anyu, mbata Latuyalaka.

²⁵ Enda, dimi layendana la ye we ukungu wʼelanyelu, We latulanyaka kete tshe. Dimi layusimbula lunya lami utsha le ye. Layukungitula ladiku diʼave, Layukete ukungu wʼulungudi.

²⁶ Hawosa ave wʼatshuku Kuyanga ave wa mpika etshina uma le ye, Ne dia we ayuyala elanyelu pundju, Mbata Latuyalaka.

²⁷ Nyuhane ekuhu ka koi lu kete, Nyudi amama lʼatei a wedja. Nyolongosole wedja dia ndosha Babilona. Nyeti waulelu wa Ararata, wa Mini, ndu wa Ashikenaze. Nyosonwele olombodi dia mbolosha. Nyutshutshiya falasa le wo uku endjo wʼanganga.

²⁸ Nyolongosole wedja, Khumi ya dikanga yʼasi Mediya, elohe awo, tupita tawo tshe, La beke tshe dia diulelu diawo dia ntolosha.

²⁹ Kete yambusukasuka, yambudidima la kandji, Ne dia sangweyu dia Latuyalaka Lu dikambu dia Babilona diambushidiyama. Ndi utsha mbete kete ya Babilona tongo, aha la untu.

³⁰ Ahuka wa Babilona wambukimo ndo ta, Vo wambutshikala lʼesumba wudingami kumbu. Wulu awo wambushila, vo wambuyala uku amantu. Mvudu ya Babilona yambulungula, Tukingiti tawo tambokoko.

³¹ Undawi ambutuhumana lʼundawi ukina, Ndu dikendji diambutuhumana la dikendji dikina, Dia ntutela khumʼekanga ka Babilona lukumu vati: Usumba andi ambolembiama lu beke tshe.

³² Wambohotola atehu, wambutshumba nyanda. Alimbi wambate asulu.

³³ Latuyalaka Kanga lulimbilimbi, Unyashungu wa Isariyele kata ati: Ona umuntu a Babilona eko uku dihuli diʼesuswelu Lu etena katuwususulaka. Yema tshitshe mbambutshikala, Ku etena ka dinela nkuka le ndi.

³⁴ Nebukadineza, khumʼekanga ka Babilona, Akampatula, akananya. Ndi akambete mbaka ka hwe. Ndi akamene usudia uku atomenaka shimiamba. Ndi akaludia dikhundju diandi La diango diaki la mi diʼololo; akambitshanya.

³⁵ Usi Siona ati ati: Akambu wa ngala wakayala le mi ndu le asi khumbu kami, Kawuyali ndu le Babilona. Jerusalema ati ati: Dikila diami diayali lʼete wʼasi Kaladiya.

³⁶ Diako mbata Latuyalaka ati: Enda, dimi lutsha nsambula dikambu diaye, Ndu lutsha nyosombweya. Dimi layumia ashi a waki wa Babilona, Layumia ndu teko diawo.

³⁷ Babilona ayuyala tuta diʼelanyelu, Edjaselu ka wambulu, engo ka nkashimo, Ndu engo ka mpongwela soi. Nduku untu ayuyala leko.

³⁸ Vo wayudikita kame uku tambwe, Wayukhungula uku ana wa tambwe.

³⁹ Lamʼayuwohetshahetshama, dimi layatshela dambu; Dimi layuwadjuya dia vo ngenangena La ndala djo ya pundju aha memo, mbata Latuyalaka.

⁴⁰ Dimi layalombola uku ana wʼekoko utsha lʼediakelu, Uku ekoko a waumi, la mbudi ya waumi.

⁴¹ Hai, Babilona ambosama! Engo kuleki nemo lu kete tshe ambolembiama! Ndi wuhu ambulana Babilona lʼatei a wedja li!

⁴² Ashi a waki wambumbela la diku dia Babilona, Asukhu a wulu wambukhukume.

⁴³ Esumba awo wambulanyema. Kete yambuyala wumu ndu shenga, kete yahadjashi untu. Nduki untu ayeta leko.

⁴⁴ Dimi layusuya Bele lu Babilona, Layukituhuya kene kakatamene. Wedja hawutshokaka utsha le to ntu. Eheli ka Babilona kambunyuko.

⁴⁵ Nyu wudja ami, nyutumbi uma lʼatei awo, Nyu tshe untu lʼuntu ashimbeli lumu landi Dia mpanda kele ka wulu ka Latuyalaka.

⁴⁶ Tanyukaki woma, tanyateki asulu, Ne dia kumu yayunyuka lu kete, Ne dia lu eleku kemotshi kumu motshi yayuya, Ku lʼeleku kekina kumu kina. Akambu wa ndjawudi wayuyala lu kete, Ku umbuledi omotshi ayolo la umbuledi ukina.

⁴⁷ Uma lu dikambu ne, nshi yayuyala, Yayumulanya dikishi dia Babilona. Wudja awo tshe wayukumbama la sonyi. Antu awo wayukalema edu lʼatei awo.

⁴⁸ Ku ulungu la kete, la tshe weli loko Wayimba esambu wʼongenongeno dikambu dia Babilona, Ne dia ananyishi wayuya le wo Uma lu leke la ngelʼa kushi, Mbata Latuyalaka.

⁴⁹ Andjakemi wa Isariyele li, Babilona ayudiakema Uku akawadiaki antu wa lu kete tshe!

⁵⁰ Nyu waku wakahandi yombo, nyutshu, Tanyutshimbatshimbaki! Nyuho Latuyalaka uma lu kete yʼetali, Nyudji tukanyi lu dikambu dia Jerusalema.

⁵¹ Shu tambolombo la sonyi, Ne dia tambuka lukumu la dionyo. Dundji diasu diambukumbama la sonyi, Ne dia asi wedja wamboto lu ahuli wʼekila Wa lu luudu la Latuyalaka.

⁵² Nyuki, nshi yayuyala, Yayumulanya dikishi diawo dia lolelola, La ahumwami wayukhuma akhumu lu kete yawo tshe, Mbata Latuyalaka.

⁵³ Kuyanga Babilona ayumbela pulu ndu lʼulungu, Ayuyalongoswela ngeli ya wulu, Kana ayuyahikela kumbu yʼetali, Dimi layutumela ananyishi, Mbata Latuyalaka.

⁵⁴ Nyuki lundju lʼalelu loso uma la Babilona, Lundju lʼelanyelu ka wuki uma le asi Kaladiya.

⁵⁵ Latuyalaka ambulanya Babilona, Ambolembohaya tukuku tadawo. Asukhu wʼananyishi wambudikita uku ashi a waki, Wukama lundju lawo.

⁵⁶ Unanyishi ambukuma le ndi, le Babilona! Ahuka awo wambundama, eta awo wambowele, Ne dia Latuyalaka keli Unyashungu. Ndi katufutaka antu uku elimu awo. Mete ndi ayasomboya.

⁵⁷ Dimi layudjuya ewandji awo la akanga a yimba awo, Ambuledi awo, elombodi awo wʼalimbi La andoshi awo wa ta wanu. Ku vo wayulala djo ya pundju, hawuyemo ntu, Mbata Khumʼekanga, lukanga lukumbu leli Latuyalaka Kanga lulimbilimbi.

⁵⁸ Latuyalaka Kanga lulimbilimbi kata ati: Peli dia waki dia lukumbu la Babilona diayunyuko, Kuki yawo yʼetali yayutshumbama. Antu wayukamba ukambakamba, Wayuheko dikambu dia dja.

⁵⁹ Aui aso mbakatela umvutshi Jeremiya, Seraya, onʼa Neriya, onʼa Masea, lamʼakandatshu ndi la Zedekiya, khumʼekanga ka Juda, utsha la Babilona lu eleku ka nei ka diulelu diandi. Seraya aki olombodi wa ekambi wa lu luudu la khumʼekanga.

⁶⁰ Jeremiya akafundi elanyelu tshe wayuya lu Babilona lu buku. Aui oso tshe wakafundama lu dikambu dia Babilona.

⁶¹ Jeremiya akatela Seraya ati: Lamʼayuyukuma la Babilona, kutali aui ane tshe ololo.

⁶² Kutolombe wati: Latuyalaka li, we akati diui dikambu dia dihuli ne, dia dilanya, diaha antu mbidjase loko pundju, kana antu kuyanga nyama! Dio diayuyala tongo pundju.

⁶³ Lamʼayuyushidiya mbala buku ne, kudikeleke kame la dive, kudikadja kʼatei a ndjali ka Eyufarate.

⁶⁴ Kuti wati: Ukuku mbayudita Babilona, huteha, ne dia elanyelu kayumuwela, vo wayoko balakata. Ekumelu kʼaui wa Jeremiya keso.