Jeremiya 50 - La Bible en Otetela (Bible K'Ekila) 1991

Etelu kʼAkambu Wahatayi lu Dikambu Dia Babilona

¹ Diui diakati Latuyalaka lʼunyo wʼumvutshi Jeremiya lu dikambu dia Babilona, lu dikambu dia kete yʼasi Kaladiya.

² Nyuteli wedja tshe lukumu, nyudianganya diui. Nyuhane ekuhu ka koi, nyuti lukumu lako. Tanyusheki nduku diui; nyuti nyati: Babilona kambosama! Bele kambutshama sonyi! Merodaka ambowediawediama! Difanelu diawo diambutshama sonyi, Dikishi diawo diambowediawediama!

³ Wudja omotshi lundjayi uma la ngelʼa kushi dia ndjolosha. Vo wayete kete yawo elanyelu, nduku untu ayudjase leko. Ndu antu ndu nyama wayulawo, wayudiangana.

⁴ Lu nshi sho, lu etena kako, asi Isariyele wayuya vo la asi Juda kame. Vo wayutshokaka lu mbuka wataleli, wayutuyanga Latuyalaka, Unyashungu awo.

⁵ Vo wayumbula mbuka kʼutsha la Siona, wayedia dundji diawo utsha leko, wata vati: Nyuyi, nyuyumamemi Latuyalaka lu sheki ya pundju, yahuhameki pundju.

⁶ Wudja ami wakayala uku limba lʼekoko lakashisho. Alami awo wakawanganyia, wakawaekekuya lu ekungu. Vo wakatatshokaka uma lʼekungu utsha lʼakuna. Vo wakuhela ukutu awo.

⁷ Waku tshe wakahumana la wo, wakamani. Atunyi awo wakataka vati: Shu kema la unungu, ne dia vo wakatshela Latuyalaka, edjaselu ka sambu kʼololo, kolo, Latuyalaka, elungamelu ka washewo.

⁸ Nyulawo uma la Babilona, nyutumbi uma lu kete yʼasi Kaladiya, nyuyali lolombo uku waumi wa mbudi watolombolaka limba la dungalunga!

⁹ Nyendi, dimi lutsha ntundjiya la mbela Babilona ului wa wedja a waki, uma lu kete ya ngelʼa kushi dia ndjolo la wo. Vo wayu-yalonga dia mbolosha, wayuwunya uma leko. Pitu yawo yeli uku yʼalimbi wa lononga, yahatetaka apadu.

¹⁰ Ku Kaladiya ayumbama dimbu Wane tshe wayuwumba, wayuluta, mbata Latuyalaka.

¹¹ Kuyanga nyu nyatongenangenaka, Nyatongenangenaka utamanya, nyu ananyishi wʼukito ami! Kuyanga nyu nyambulimbolimbo uku ngombe ka wadi lu adiyu, La mbawana uku falasa kʼumi keta wadi,

¹² Nyengenyu ayutshama sonyi. One lakanyuti ayate asulu. Nyuki, ndi ayuyala wela wa wedja tshe, Oso eli usui wa shenga, kete yambuma, ndu yʼufumbu.

¹³ Dikambu dia kele ka Latuyalaka mbahudjase antu ntu leko. Babilona ayuyala paka elanyelu ketu. One tshe layeta laawo, ayukashimo, Ayotshodia ne dia asui awo tshe.

¹⁴ Nyuyalonge lu ta lʼutshimba tshe wa Babilona dia mbolosha. Nyu ambuki wʼeta tshe, nyuwuki pitu, tanyuwukaki kandji, Ne dia vo wakatshela Latuyalaka kolo.

¹⁵ Nyuwudjeli waelu wa ta lʼutshimba tshe. Vo wambolemba; Ngeli yawo yambulanyema, peli diawo diambunyuko, Ne dia onʼeli somboya ka Latuyalaka. Nyosomboya, nyutsheli uku akandatshaka.

¹⁶ Nyushili one latukaka wehu, Ndu one latukimelaka lukuwa Lu nshi ya dinela ushiki la Babilona. Uma lu woma wa yombo yʼunanyishi, Vo tshe untu lʼuntu ayukadimo utsha le wudja awo, Wayulawo untu lʼuntu lu kete yawo.

¹⁷ Isariyele eli okoko wakanganela, wakatshanya tambwe. Khumʼekanga kʼAsuriya akuli ntundu. Kakiane Nebukadineza, khumʼekanga ka Babilona, ambotetshatetshaka weka.

¹⁸ Diako mbata Latuyalaka Kanga lulimbilimbi, Unyashungu wa Isariyele, ati: Nyendi, dimi lutsha nsuya khumʼekanga ka Babilona la wudja andi, uku akamasuya khumʼekanga kʼAsuriya.

¹⁹ Dimi layukaluya Isariyele lʼukutu andi. Ndi ayolekaka adiyu la Karamele ndu la Bashana. Dikundju diandi diayulutaka lu ekungu wa Efarayima ndu lu Ngiliyade.

²⁰ Lu nshi sho, lu etena kako, wayuyanga uhedia wa Isariyele, keli hawutani; la kolo ya Juda, keli hawuyishula, ne dia dimi layudimanyia atshikadi wayumutshika, mbata Latuyalaka.

²¹ Nyutshu utsha lu kete ya Meratayima, nyutuyilosha, Ndu utsh le asi Pekode, nyutadiaki, nyutashili ushiki. Nyututshi tshe uku aui tshe wakamanyutela, Mbata Latuyalaka.

²² Waelu wa ta wambukema lu kete, elanyelu ka wuki.

²³ Uhumo wa kete tshe wambuhimbo, wambowele. Babilona ambulanyema lʼatei a wedja.

²⁴ Dimi lakakambi djunga, we Babilona, Ku we akandama shashimuya. We akatanema, akandama, Ne dia we akasemanela la Latuyalaka.

²⁵ Latuyalaka akadihula luudu landi la diango dia ta. Ndi akatundja dihumo dia kele kandi, Ne dia Khumadiondjo, Latuyalaka Kanga lulimbilimbi eko la Ulimu wa ntsha lu kete yʼasi Kaladiya.

²⁶ Nyoto lu beke tshe lu Babilona dia mbolosha. Nyufuli apenge awo; Nyomotsha atuta wʼelanyelu uku elui wa dikanda diʼepunga; Nyulanya tshe, tanyutshikaki nduku yema.

²⁷ Nyudiaki esongo awo wa ngombe, nyehimbuli ete. Mananu le wo, ne dia lushi lawo lambusukana, Etena kʼelumbwelu kawo.

²⁸ Nyuki tukuku tʼandawi! Vo wambulawo uma lu kete ya Babilona dia ntuta lukumu lʼesombweyo ka Latuyalaka, Unyashungu asu, lu Siona, ee, esombweyo dia etemwelo kandi!

²⁹ Nyu ambuki wʼeta tshe, nyeteli Babilona ambuki wʼeta, nyu wane tshe watukimelaka eta. Nyuhangi lʼutshimba awo, untu tahandaki. Nyosomboya ne dia ulimu andi. Nyutsheli tshe uku akandatshaka, ne dia ndi akunela lʼutaku dia nsemanela la Latuyalaka, la lʼEkila lʼlsariyele.

³⁰ Diako mbayoko elongo awo wʼapami lu esese awo, la alimbi awo tshe wayudiakema lushi lako, mbata Latuyalaka.

³¹ Enda, dimi layendana la ye we kanga utaku, Ne dia lushi laye lambukuka, Etena ka we numbuyama, Mbata Khumadiondjo, Latuyalaka Kanga lulimbilimbi.

³² Kanga utaku ayutakana, ayoko, Nduku untu layuwunyiya. Dimi layongonya dja lu esumba andi, ku yo yayutshumba wa lʼutshimba awo tshe.

³³ Latuyalaka Kanga lulimbilimbi kata ati: Asi Isariyele la asi Juda wambusuyama kame. Waku tshe wakatole lu fumbi, wambakimela wulu, hawetawo mbatshungula.

³⁴ Keli utshungudi awo eli la wulu, lukumbu landi leli Latuyalaka Kanga lulimbilimbi. Ndi ayusambula dikambu diawo dia mbisha kete ki. Ndi ayohenyahenya asi Babilona.

³⁵ Yombo yambukuma dia ndosha asi Kaladiya. La asi Babilona, le ewandji awo, Ndu le akanga a yimba awo, mbata Latuyalaka.

³⁶ Yombo yambukuma dia ndosha asaki awo wʼawulu, Dia vo ndjala akanga a dinginya. Yombo yambukuma le andoshi awo wa ta dia vo ndjakema.

³⁷ Yombo yambukuma dia ndosha falasa yawo la pusupusu yawo, La andoshi wa ta wʼasi wedja weli lʼatei awo, Dia vo ndjala uku amantu. Yombo yambuya dia ndosha waumbelu awo, Diango diawo diayumbama.

³⁸ Owo ambukuma lu ekedi awo, vo wutsha muma. Yo yeli kete yuludi too la difanelu, La antu wambuyakimo le dikishi.

³⁹ Diako mbayudjase nyama ya ngala, wambulu leko. Ateki wayudjase leko. Nduku untu layudjase leko ntu pundju. Vo hawuyala wudja lu nonga la nonga pundju.

⁴⁰ Vo wayulanyema uku akamalanya Sodoma la Ngomora la esumba waki suki, dimi Unyashungu. Nduku untu layudjase leko ntu, nduku untu layulala leko, mbata Latuyalaka.

⁴¹ Nyendi, wudja wayayi uma la ngelʼa kushi, wudja a wuki, Ndu khumi ya dikanga yambunela uma lu kuma ya la kete.

⁴² Vo wambukimela eta la akonga. Vo weli akanga wʼusihi, waha la ketshi. Aui awo wambudikita uku ashi a waki. Vo wambahema lu falasa yawo, Wambuyalongosola uku untu otoi dia ndo ta, Dia nkolosha, we ona umuntu a Babilona!

⁴³ Khumʼekanga ka Babilona ambuka lukumu lawo, Ku anya andi wambokomo. Sasi diambuwunda, Kandji uku lono la umuntu lutsha mbuta.

⁴⁴ Nyendi, atunyi awo wambutumba uma lʼukunda wa la Jorodana, uku tamowe katatshu utsha lʼukutu a wulu wʼekoko. Ku dimi layuwatshanya shashimuya uma leko. Dimi layukitsha one layumosonola umbuledi awo. Akona edimi la mi? Akona ayonsonwela etena? Ulami wʼekoko akona wayemala la ntundu kami?

⁴⁵ Uma lu dikambu so, nyu-ungi tukanyi ta Latuyalaka, takanandi lu dikambu dia Babilona, ndu sangweyu diasanguyandi lu dikambu dia kete yʼasi Kaladiya, ati: Vo wayakutula ushidi uku ana wʼekoko, wayulanya edjaselu kawo.

⁴⁶ Kete yambudidima la lundju lʼeoselo ka Babilona; tukuku tawo tambukema lʼatei a wedja tshe.