Jeremiya 47 - La Bible en Otetela (Bible K'Ekila) 1991

Etatelu kʼAkambu Wahatayi lu Dikambu diʼAsi Filistiya

¹ Diui dia Latuyalaka diakayi le umvutshi Jeremiya lu dikambu diʼasi Filistiya ntundu Farayo atalembia Ngaza.

² Latuyalaka kata okone ati: Nyendi, ashi wʼelula wuyayi uma lu leke la ngelʼa kushi. Vo wayuyala uku kyoko yambudja elula. Vo wayukhukhume kete ndu diango tshe dieli loko, Usumba ndu antu wudjashi loko. Antu wayulela, la asi wudja tshe wayuyandjayandja.

³ Ambutshi hawewo dia mbosa anʼawo Lamʼayuwuka kindu ya sanga ya falasa yandi, Luhelu la pusupusu yandi ya ta, la lundju lʼetshimbi. Ne dia anya awo wambokomo.

⁴ Lushi lutsha nkuka dia nshila asi Filistiya tshe ushiki, Dia ndjaka ukimanyidi tshe wutshikadi la Tura la Sidona. Latuyalaka ayudiaka asi Filistiya, Atshikadi wa lu disenga dia Kafetore.

⁵ Ngaza kambuyala shenga, Ashikelona ambulanyema. Nyu atshikadi wa lʼukidi awo, Edja ndu kaandi ayunyukimo ndjakota puta?

⁶ We yombo ya Latuyalaka, etena kakona kayuyumuya? Oto lu dihusu diaye, umuya, uyali ki!

⁷ Ukundi weyayo ntshikala ki? Latuyalaka ambuyituma dia ntolosha Ashikelona Ndu leke la lʼumamu wʼashi a waki. Leko kambunduyediya.