Jeremiya 38 - La Bible en Otetela (Bible K'Ekila) 1991

Wambutundja Jeremiya Uma lu Shasa

¹ Shefatiya, onʼa Matana, Ngedaliya, onʼa Pashura, Jukala, onʼa Shelemiya, la Pashura, onʼa Malakiya, wakuki aui wakatela Jeremiya wudja tshe ati:

² Latuyalaka kata ati: One layutshikala lʼusumba one, ayuvo la yombo, ndjala ka kasha, kana la elandu. Keli one layutsho le asi Kaladiya, ayuka. Lumu landi layuyala engo kandi ka dimbu. Ndi ayutshikala la lumu.

³ Latuyalaka kata ati: Usumba one wayukimwama lu anya wʼului wʼalimbi wa khumʼekanga ka Babilona, ku vo wayuwosa.

⁴ Ku ewandji wakatela khumʼekanga vati: Shu tambukosengasenga shati: Wadiaki pami kene, ne dia ndi ambutekula ului wʼalimbi wambutshikala lʼusumba one ndu antu tshe, lamʼawatelandi aui wa wuhu oso. Pami kene hayangi ololo wa wudja one, paka elanyelu kawo.

⁵ Khumʼekanga Zedekiya akakaluya diui ati: Ndi uku eli lʼanya anyu, ne dia khumʼekanga heyi nyutshela nduku dikambu.

⁶ Ku vo wakose Jeremiya wakatuwudja lu difuku dia Malakiya, onʼa khumʼekanga, diaki lu seke dia luudu la lukanu. Vo wakahuluya Jeremiya la ekodi loko. Difuku diako kundjala lʼashi, paka loteke. Jeremiya akatukhundama lu loteke.

⁷ Lamʼakuki olenga Ebede-Meleke, usi Etiyopiya, laki lu luudu la khumʼekanga ati: Vo wambudja Jeremiya lu difuku laso ku khumʼekanga udjashi la suku dia Bendjamina —

⁸ Ebede-Meleke akatumbi uma lu luudu la khumʼekanga, akatutela khumʼekanga ati:

⁹ Khumemi khumʼekanga, antu ane wakatshi kolo lu akambu tshe wakawatshela umvutshi Jeremiya, lakawadji lu difuku. Ndi ayuvo la ndjala lene endi, ne dia ma kema ntu lʼusumba.

¹⁰ Khumʼekanga akatela Ebede-Meleke, usi Etiyopiya, ati: Ose antu akumi asatu lane, nyututundja umvutshi Jeremiya uma lu difuku ntundu ndi atavu.

¹¹ Ebede-Meleke akose apami ako, ku vo wakoto lu luudu la khumʼekanga la tshina dia aumbelu. Ndi akatosa betshi diʼahondo la emusu, akadihuluya le Jeremiya lu difuku la ekodi.

¹² Ebede-Meleke, usi Etiyopiya, akatela Jeremiya ati: Udji betshi diʼahondo la emusu ene lʼesi a kavu, ekodi watukukuhambula. Ku Jeremiya akatshi osoku.

¹³ Vo wakomola Jeremiya la ekodi, wakutundja uma lu difuku. Ku Jeremiya akatshikala lu seke dia luudu la lukanu.

Zedekiya Ambuyanga Elakanyelu le Jeremiya

¹⁴ Khumʼekanga Zedekiya akatumi untu dia nteta umvutshi Jeremiya, dia ndja la ndi uya le ndi lu suku dia satu dia luudu la Latuyalaka. Khumʼekanga akatela Jeremiya ati: Dimi la diui dia nkumbula. Tumbisheki nduku dikambu.

¹⁵ Jeremiya akakaluya Zedekiya diui ati: Naka dimi layukutela, we hundjaka? Kuyanga mbakutelami diui so, we hu-mbukela.

¹⁶ Ku khumʼekanga Zedekiya akatshibela Jeremiya lu usheshe ati: Uku eli Latuyalaka la lumu! lakatusha lumu, dimi halukudiaka ndu halukukimo lʼanya a waku watuyangaka nkudiaka.

¹⁷ Jeremiya akatela Zedekiya ati: Latuyalaka Kanga lulimbilimbi, Unyashungu wa Isariyele, kata ati: Naka we ayutsho le ewandji wa khumʼekanga ka Babilona, we ayuka; ndu usumba one hawutshumbama. We ayutshikala la lumu we la wa lu luudu laye.

¹⁸ Keli naka we hatshu utsha le ewandji wa khumʼekanga ka Babilona, usumba one wayukimwama lu anya wʼasi Kaladiya. Vo wayutshumba dja, la we huhanda uma lʼanya awo.

¹⁹ Khumʼekanga Zedekiya akatela Jeremiya ati: Dimi mbukaka asi Juda waketi lu wedi wʼasi Kaladiya woma, ne dia watukutunkimo lu anya awo, ku vo ntengakami.

²⁰ Keli Jeremiya akûkaluya diui ati: Vo hawukukimo. Dimi lambukosengasenga nti: Etawo diui dia Latuyalaka diukutedimi, mbayuyuhumo lukulu lʼolo, ndu mbayuyuka.

²¹ Keli naka we hetawo ntsho, Latuyalaka akamenya dikambu ne ati:

²² Enda, amantu tshe wambutshikala lu luudu la khumʼekanga ka Juda, wayotolama utsha le ewandji wa khumʼekanga ka Babilona. Amantu ako wayuta vati: Engenyi aye wakakukesi, wakakahamela. Keli kakiane, lamʼambukakatela ekulu aye lu loteke, Vo wambumo uma le ye.

²³ Wayutundja wadieye tshe la anʼaye tshe utsha le asi Kaladiya, ndu we huhanda uma lʼanya awo. We ayundama lu anya wa khumʼekanga ka Babilona, la usumba one wayutshumbama dja lu dikambu diaye.

²⁴ Zedekiya akatela Jeremiya ati: Tutelaki nduku untu aui ane, we huvo.

²⁵ Keli naka ewandji wambuka lukumu ati: Dimi lakateketshi la ye, ku vo wambuya le ye vati: Ututeli aui wakayatedi khumʼekanga, tutusheki nduku diui, ku shu hatukudiaka, ututeli ndi aui wakakutedi khumʼekanga,

²⁶ kakaluya diui wati: Dimi laki lu nsengasenga khumʼekanga nti: Tunkaluyaki lu luudu la Jonatana ntu, dimi ntukutuvo leko.

²⁷ Ewandji tshe wakayi le Jeremiya, wakayuwumbula embula. Ndi akakaluya aui pupu uku akawutela khumʼekanga. Vo wakakimo nteketa la ndi, ne dia dikambu kumbeyama.

²⁸ Jeremiya akatshikala lu seke dia luudu la lukanu, edja ndu lushi lakosama Jerusalema.