Jeremiya 36 - La Bible en Otetela (Bible K'Ekila) 1991

Etshumbelu ka Buku Dia Wombo

¹ Lʼeleku ka nei ka diulelu dia Jehoyakima, onʼa Josiya, khumʼekanga ka Juda, diui dia Latuyalaka ne diakayi le Jeremiya ati:

² Ose wombo wa buku, ufundi aui tshe wakamakutelaka lu dikambu dia Isariyele, dia Juda, ndu dia wedja tshe uma lu lushi lakamateketa la ye, lu nshi ya diulelu dia Josiya edja ndu elo.

³ Ku lamʼayuka khumbu ka Juda lukumu la elanyelu tshe kamumusanguya mbatshela, undu, vo wayuka-dimo untu lʼuntu uma lu mbuka kandi ka kolo, ku dimi layadimanyia ehedia awo la kolo kawo.

⁴ Ku Jeremiya aketi Baruka, onʼa Neriya. Baruka akatafundaka aui wakawukaka Jeremiya lu buku, aui tshe wakatela Latuyalaka Jeremiya.

⁵ Jeremiya akatela Baruka ati: Dimi one ukelekami; haleyi ntsho utsha la luudu la Latuyalaka.

⁶ Kutshu weme, kutaleli wudja aui tshe wa Latuyalaka, wakamakutela, wakiye lu nfunda lu luudu la Latuyalaka lushi lʼekilelu ka ma. Kutuwateli ndu asi Juda tshe wayuya uma lu esumba awo.

⁷ Undu, vo wayuyakitshakitsha lʼosengosengo la ntundu ka Latuyalaka. Undu, vo tshe untu lʼuntu ayukalula uma lu mbuka kandi ka kolo, uma lʼaui wakati Latuyalaka. Kele kandi la ududu andi wambufulanela le wudja one.

⁸ Baruka, onʼa Neriya, akatshi akambu tshe wakawutela umvutshi Jeremiya. Ndi akatala aui wa Latuyalaka lu buku lu luudu la Latuyalaka.

⁹ Lʼeleku ka tanu ka diulelu dia Jehoyakima, onʼa Josiya, khumʼekanga ka Juda, lu ngondo ka divwa, asi Jerusalema tshe la antu tshe wakayi uma lʼesumba wa Juda uya la Jerusalema. Vo wakadjanga lushi lʼekilelu ka ma la ntundu ka Latuyalaka.

¹⁰ Baruka akalela antu tshe aui wʼuma le Jeremiya lu buku u luudu la Latuyalaka, lu luudu la lʼetei la Ngemariya, onʼa ufundji Shafana, lu seke dia lukumbu dia ladiku, lu eotwelo ka Suku diʼUyuyu dia luudu la Latuyalaka.

¹¹ Lamʼakuki Mikaya, onʼa Ngemariya, onʼa Shafana, aui tshe wa Latuyalaka waki lu buku,

¹² ndi akahulo utsha lu luudu la khumʼekanga, lu luudu la lʼetei lʼufundji. Ndi akatani ewandji ene tshe wudjashi: ufundji Elishama, Delaya, onʼa Shemaya, Elenatana, onʼa Akebore, Ngemariya, onʼa Shafana, Zedekiya, onʼa Hananiya, la ewandji ekina tshe.

¹³ Mikaya akatuwatela aui tshe wakanduki lamʼakalelaka Baruka antu lu buku.

¹⁴ Ku ewandji tshe wakatumi Jehudi, onʼa Netaniya, onʼa Shelemiya, onʼa Kushi, le Baruka dia ntuwutela ati: Ose buku diakiye lu mbalela wudja, uyi. Okone Baruka, onʼa Neriya, akakimela buku lu lunya, akatshu le wo.

¹⁵ Vo wakawutela vati: Udjase, utalelidio. Ku Baruka akawalela.

¹⁶ Lamʼakawuki aui aso tshe, vo wakandama la woma, wakatela Baruka vati: Shu tayututela khumʼekanga aui aso tshe.

¹⁷ Vo wakambula Baruka vati: Ututeli okone akiye lu nfunda aui ane tshe lamʼakindi lu nkutela.

¹⁸ Baruka akakaluya diui ati: Ndi akamvutela aui ane tshe lʼunyo, ku dimi lakafundi lu buku ne lʼashi a mukanda.

¹⁹ Ku ewandji wakatela Baruka vati: Tshoka, tuyashe, ndu we ndu Jeremiya. Untu teyaki lene enyu.

²⁰ Lʼokongo diku, vo wakatshu le khumʼekanga lu seke, keli vo wakatatshiki buku lu luudu la lʼetei lʼufundji Elishama. Vo wakatusanyia khumʼekanga aui tshe.

²¹ Khumʼekanga akatumi Jehudi dia ntosa buku. Ku ndi akatudiosa uma lu luudu la lʼetei lʼufundji Elishama. Ndi akayudialela khumʼekanga la ewandji tshe waki la le khumʼekanga.

²² Laso ku khumʼekanga udjashi lu luudu landi lu nshi ya tshitshi, lu ngondo ka divwa. Dja yakahetaka la ntundu kandi.

²³ Lamʼakali Jehudi akatshi anei kana asatu, khumʼekanga akati buku la lukuwa landi, akadikadja lu dja yakandukaka, ku dio diakalungula tshe.

²⁴ Khumʼekanga kumbate asulu, kana mbatshatsha ahondo andi, ndi kuyanga ekambi andi wakuki aui aso tshe.

²⁵ Elenatana, Delaya, la Ngemariya, wakasengasenga khumʼekanga vati: Tutshumbaki buku, keli ndi kumbaukela.

²⁶ Khumʼekanga akatela Jeramele, onʼa khumʼekanga, Seraya, onʼa Aziriyele, la Shelemiya, onʼa Abidele, ati: Nyutundi ufundji Baruka la umvutshi Jeremiya, keli Latuya-laka akawashe.

²⁷ Lamʼakatshumbi khumʼekanga buku diaki la aui wakafundi Baruka, wakawutela Jeremiya, diui dia Latuyalaka diakayi le Jeremiya ati:

²⁸ Ose buku dikina ufundi aui tshe waki lu buku diakatshumbi Jehoyakima, khumʼekanga ka Juda.

²⁹ Kuti diui ne lu dikambu dia khumʼekanga ka Juda wati: Latuyalaka kata ati: We akatshumbi buku ne, ata wati: Okoko wana wufundami aui aso loko ati: Khumʼekanga ka Babilona ayuyulanya kete nye, ayushila ndu antu ndu nyama ushiki?

³⁰ Diako mbata Latuyalaka lu dikambu dia Jehoyakima, khumʼekanga ka Juda, ati: Nduku onʼandi ayudjase lu kiti ka diulelu ka Davidi. Udu andi ayukalema lu lahaladi la yanyi ndu lu tshitshi kʼutshu.

³¹ Dimi layusuya, ndi la anʼandi la ekambi andi, ne dia uhedia awo. Dimi layuwaela, vo asi Jerusalema la asi Juda, elanyelu tshe kakamataka dikambu diawo, ae dia vo kunanga mbukelami.

³² Ku Jeremiya akose buku dikina, akasha ufundji Baruka, onʼa Neriya. Ku ndi akatafundaka aui tshe wakawutela Jeremiya, waki lu buku diakatshumbi Jehoyakima, khumʼekanga ka Juda. Wakahe ndu aui akina efula wa wuhu ako.