Jeremiya 35 - La Bible en Otetela (Bible K'Ekila) 1991

Kolamelu yʼAsi Rekabe

¹ Diui dia Latuyalaka diakayi le Jeremiya lu nshi ya Jehoyakima, onʼa Josiya, khumʼekanga ka Juda, ati:

² Utshu utsha le khumbu kʼasi Rekabe, utusawuli la wo. Utunyi la vo uya lu luudu ta Latuyalaka, lu luudu lomotshi la lʼetei, uyuwasha wanu wa vo no.

³ Ku dimi lakatosa Jazaniya, onʼa Jeremiya, onʼa Habaziniya, kame la anangu, anʼandi tshe la khumbu tshe kʼasi Rekabe.

⁴ Dimi lakayi la wo uya lu luudu la Latuyalaka, lu luudu la lʼetei lʼana wa Hanana, onʼa Ingidaliya, umvutshi a Unyashungu, lasuki la luudu lʼewandji leli la diku dia luudu la Maseya, onʼa Shaluma, ulami wa suku.

⁵ Dimi lakakitsha alonga wʼafuku wuludi too la wanu, ndu akoho la ntundu kʼasi khumbu ka Rekabe; lakawatela nti: Nyono wanu!

⁶ Keli vo wakati vati: Shu hatono wanu, ne dia Jonadaba, onʼa tshesu Rekabe, akatudjangela ati: Tanyonokaki wanu, nyu kana anʼanyu wʼapami pundju.

⁷ Tanyuhikaki mvudu, tanyukaki nduku wuhu. Tanyuneki ekodi wa vinyo kuyanga ndjala akanga awo. Kanyudjaseki lu mvudu yʼapema nshi ya lumu yanyu tshe, mbayunyulumba lu kete yu-djashinyu angendangenda.

⁸ Ku shu takakitanyia aui tshe wa Jonadaba, onʼa tshesu Rekabe, wakandatundjangela diaha no wanu, ndu shu ndu wadiesu, anʼasu wʼapami kana anʼasu wʼamantu, lu nshi ya lumu yasu tshe.

⁹ Shu hatutuhikaka mvudu ya shu mbidjase. Shu kema la dikambo dia vinyo, dikambo dia mbu ya nde, kuyanga wuhu.

¹⁰ Shu tatudjaseka lu mvudu yʼapema, tatukitanyiaka ndu tatutshaka akambu tshe wakatatudjedi shesu Jonadaba.

¹¹ Lamʼakayayakaka Nebukadineza, khumʼekanga ka Babilona, dia ndjalosha kete nye, shu takatanela shati: Nyeso, tutshu la Jerusalema, ne dia woma wʼului wʼalimbi wʼasi Kaladiya, ndu ne dia woma wʼului wʼalimbi wʼasi Suriya. Diako mbudjashisu la Jerusalema.

¹² Diui dia Latuyalaka diakayi le Jeremiya ati:

¹³ Utshu, utumbuli asi Juda la asi Jerusalema wati: Nyu hanyulungula wetshelu wa nkitanyia aui ami? mbambula Latuyalaka Kanga lulimbilimbi, Unyashungu wa Isariyele.

¹⁴ Ana wa Rekabe watulamaka aui wakawadjangela Jonadaba, onʼa Rekabe ati: Tanyonokaki wanu. Vo hawutonoka wanu edja ndu elo, ne dia vo watukitanyiaka olembe wa shewo. Dimi lakateketaka la nyu nshi tshe umaka pindju, keli nyu kumbukelami.

¹⁵ Ndu dimi lakanyutumelaka ekambi ami amvutshi umaka pindju, dia nyutela vati: Nyukaluli kakiane untu lʼuntu uma lu mbuka kandi ka kolo, nyolongosole akambu anyu, tanyuyelaki ditemolatemola dia ditemola, ku nyu nyayudjase lu kete yakamanyusha, nyu la washenyu. Keli nyu kumpuke atui, kumbukelami.

¹⁶ Ana wa Jonadaba, onʼa Rekabe, watulamaka olembe wakawadjela shewo, keli wudja one hawumbukela!

¹⁷ Diako mbatami, dimi Latuyalaka Kanga lulimbilimbi, Unyashungu wa Isariyele, nti: Nyendi, dimi lutsha mbela elanyelu lu Juda ndu le antu tshe wudjashi la Jerusalema. Dimi layela elanyelu kakamataka lu dikambu diawo, ne dia dimi lakateketa la wo, keli vo kununga. Dimi lakawaeti, keli vo kumbetawo.

¹⁸ Jeremiya akatela khumbu kʼasi Rekabe ati: Latuyalaka Kanga lulimbilimbi, Unyashungu wa Isariyele, kata ati: Nyu nyakakitanyia aui wa shenyu Jonadaba, nyakalamaka elembe andi tshe, nyakatshaka akambu tshe wakandanyudjangela.

¹⁹ Diako mbahahumbaki Jonadaba kanula pundju ya memalaka la ntundu kami, mbata Latuyalaka Kanga lulimbilimbi, Unyashungu wa Isariyele.