Jeremiya 34 - La Bible en Otetela (Bible K'Ekila) 1991

Jeremiya Ambewula Zedekiya

¹ Diui dia Latuyalaka diakayi le Jeremiya lamʼakalokaka Nebuka-dineza, khumʼekanga ka Babilona, kame lʼalimbi andi tshe, la waulelu tshe wa lu kete waki lʼokongo andi, ndu antu tshe ta la Jerusalema ndu wa lʼesumba tshe waki lʼokongo ayo ati:

² Tshoka, tuteli Zedekiya, khumʼekanga ka Juda, wati: Latuyalaka, Unyashungu wa Isariyele, kata ati: Enda, dimi lutsha nkimo usumba one lu anya wa khumʼekanga ka Babilona. Ndi ayutshumba la dja.

³ We huhanda uma lʼanya andi. Wayukunda, wayukukimo lu anya andi. We ayenana la khumʼekanga ka Babilona lʼashu aye. Ndi ayoteketa la ye lu unyo lʼunyo. We ayutsho utsha la Babilona.

⁴ Ulungi diui dia Latuyalaka, we Zedekiya, khumʼekanga ka Juda. Latuyalaka ambuta lu dikambu diaye ati: We hudiakema la yombo.

⁵ We ayuvo la ki. Uku akawatshumbaka malashi lu dikambu dia washo, khumi ya dikanga yʼedjedja yaki la ntundu kaye, mbayuwutshumba lu dikambu diaye. Vo wayukulela vati: Yee, Khumadiondjo li! Dimi lambuta diui, mbata Latuyalaka.

⁶ Ku umvutshi Jeremiya akatela Zedekiya, khumʼekanga ka Juda, aui aso tshe la Jerusalema.

⁷ Laso ku ului wʼalimbi wa khumʼekanga ka Babilona waki lu ndo la Jerusalema la esumba tshe wa Juda wakatshikala. Wakalo la Lakishi, la Azeka, ne dia esumba eso etu mbakatshikala lʼatei wʼesumba wa Juda wakadingami kumbu.

Elanyelu ka Mbetawo lu Dikambu diʼAsi Heberu Waki Fumbi

⁸ Diui dia Latuyalaka diakayi le Jeremiya lʼokongo a lamʼakashili khumʼekanga Zedekiya mbidja lʼantu tshe waki la Jerusalema sheki ya ntshungula fumbi,

⁹ dia untu tshe ntshungula fumbi kandi ka pami ndu ka umuntu kaki usi Heberu, diaha untu ndjala la usi Juda, onangu, fumbi.

¹⁰ Ewandji tshe la antu tshe waketawo, wakoto lu sheki yako dia untu tshe ntshungula fumbi kandi ka pami ndu ka umuntu, diaha vo mbaete fumbi ntu. Vo waketawo, wakakimo.

¹¹ Keli lʼokongo diku, vo wakakadimula tukanyi, wakakaluya fumbi yʼapami ndu yʼamantu yakawatshungula, wakawaete fumbi yʼapami ndu fumbi yʼamantu ntu.

¹² Okone diui dia Latuyalaka diakayi le Jeremiya ati:

¹³ Dimi Latuyalaka, Unyashungu wa Isariyele, kata nti: Dimi laka dji la washenyu sheki lu lushi lakamatundja uma lu kete ya Edjibitu, uma lu luudu la lohombo, nti:

¹⁴ Lu ekumelu ka deku samalu, nyu tshe untu lʼuntu kakimo onangu, usi Heberu, lakayasundja le ndi, ndu lakukambelaka ulimu deku samalu. Dieli la untu ako dia mbukimo uma lʼulimu andi. Keli washenyu kununga aui ami kuyanga mpuke atui.

¹⁵ Ku elo, nyu nyambulemba etema, nyambutsha dikambu diʼusimbwi lu ashu ami, dia untu lʼuntu ntshungula unyandi. Nyu nyakadji sheki nye la ntundu kami, lu luudu latuwetaka lukumbu lami.

¹⁶ Keli nyu nyambukalula ekongokongo, nyambusuwula lukumbu lami. Nyu tshe untu lʼuntu ambukaluya fumbi kandi ka pami ndu ka umuntu yakanyatshungula uku lulangu lawo. Nyu nyambuwaete ntu fumbi yanyu yʼapami, ndu yʼamantu.

¹⁷ Okone mbata Latuyalaka ati: Nyu kumbukelami, dia nyu tshe ntshungula untu lʼuntu onangu, la untu lʼuntu unyandi. Nyendi, dimi lutsha nyusha ndjadjasela ka nyu ndjakema la tombo, elandu, la ndjala ka kasha. Dimi layunyete engo ka wononyi le waulelu tshe wa la kete.

¹⁸ Dimi layukimo antu wakadiaki sheki yami, waki kunama aui wa sheki yakawadji la ntundu kami, lamʼakawati yana ya ngombe betshi pendi ndu imʼakawetaka lʼatei a funda yayo.

¹⁹ Dimi layukimo ewandji wa Juda la ewandji wa Jerusalema, elenga, elombedi, la antu tshe wa lu kete, waketi lʼatei a funda ya yana yako ya ngombe.

²⁰ Dimi layakimo lʼanya wʼatunyi awo, lu anya a waku watuyangaka mbadiaka. Ku edu awo wayuyala mbu ya nde ya fudu ya lʼulungu la ya nyama ya la kete.

²¹ Dimi layukimo Zedekiya, khumʼekanga ka Juda, la ewandji andi lu anya wʼatunyi awo, lu anya a waku watuyangaka mbadiaka, lu anya wʼalimbi wa khumʼekanga ka Babilona, waku wakangana etali uma le nyu.

²² Nyuki, dimi layuta diui, ku vo wayukalula lʼusumba one. Vo wayolembia, wayutshumba la dja. Dimi layete esumba wa Juda atongo, aha lʼantu, mbata Latuyalaka.