Jeremiya 32 - La Bible en Otetela (Bible K'Ekila) 1991

Jeremiya Ambusumba Ekambo Keli la Anatota

¹ Diui dia Latuyalaka diakayi le Jeremiya lu eleku ka dikumi ka diulelu uia Zedekiya, khumʼekanga ka Juda. Eleku kako kaki eleku ka dikumi lʼenanei ka diulelu dia Nebukadineza.

² Lʼetena keso, ului wʼalimbi wa khumʼekanga ka Babilona wakadingi Jerusalema. Laso ku weli lu nama umvutshi Jeremiya lu lukanu, lu seke dia luudu la khumʼekanga ka Juda.

³ Zedekiya, khumʼekanga ka Juda, akudihi lu lukanu ati: Okoko wana wataye akambu wahatayi wati: Latuyalaka kata ati: Nyuki, dimi lutsha nkimo usumba one lu anya wa khumʼekanga ka Babilona, ku ndi ayuwosa?

⁴ La wati: Zedekiya, khumʼekanga ka Juda, huhanda le asi Kaladiya, keli ayukimwama lu anya wa khumʼekanga ka Babilona, ayutusawula la ndi lʼunyo lʼunyo, ayutenana la ndi la ashu?

⁵ Ndu wati: Kuyanga nyu nyayolo lʼasi Kaladiya, nyu hanyuhumo lukulu lʼolo. Khumʼekanga ka Babilona ayotola Zedekiya utsha la Babilona, ku ndi ayututshikala leko edja ndu lamʼayumenana la ndi, mbata Latuyalaka?

⁶ Jeremiya akati ati: Diui dia Latuyalaka diakayi le mi ati:

⁷ Enda, Hanamele, onʼa Shaluma, onangu sho, ayuya le ye dia ndjukutela ati: Usumbi ekambo kami keli la Anatota, ne dia we kululanyi la to dia nkisumba.

⁸ Ku Hanamele, onʼa onangu papa, akayi le mi lu seke dia lukanu uku diui dia Latuyalaka. Ndi akansengasenga ati: Usumbi ekambo kami keli la Anatota lu kete ya Bendjamina. We kululanyi la ukito ndu we kukuki nkisumba, ukisumbi. Ku dimi lakalimbitela nti: Diui dia Latuyalaka so.

⁹ Ku dimi lakasumbi ekambo kaki la Anatota uma le Hanamele onʼa onangu papa. Dimi lakali la ndi toshekele ta fesa dikumi la esambeli, lakawusha.

¹⁰ Dimi lakafundi lukumbu lami lu daka diasu, lakadimati ematelu. Dimi laketi emenyi, lakawedikela falanga yako lu kilo.

¹¹ Lʼokongo diku, dimi lakose aka tshi wa daka diasu: ne diakamatemi ematelu uku elembe la ditshelu, ndu ne diaki hwe.

¹² Ku dimi lakasha Baruka, onʼa Neriya, onʼa Maseya daka diʼesumbelu la ntundu ka Hanamele, onʼa onangu papa, ndu ka emenyi wakaki pita lu daka diako diʼesumbelu, ndu la ntundu kʼasi Juda tshe waki lu seke dia lukanu.

¹³ Dimi lakakokomiya Baruka diui la ntundu kawo nti:

¹⁴ Latuyalaka Kanga lulimbilimbi, Unyashungu wa Isariyele, kata ati: Ose akatshi ane wa daka: dikatshi dia daka diʼesumbelu diakamatemi ematelu, la ne dieli hwe. Uwadji lu mbaka dia vo ntshikala nshi efula.

¹⁵ Latuyalaka Kanga lulimbilimbi, Unyashungu wa Isariyele, kata ati: Wayusumba mvudu, dikambo, la dikambo dia vinyo lu kete nye ntu.

¹⁶ Lamʼakamashili mbisha Baruka, onʼa Neriya, daka diʼesumbelu, dimi lakalombe Latuyalaka nti:

¹⁷ Latuyalaka li, we Khumadiondjo, mete, we akatungi ulungu la kete la wulu aye wa namba, ndu la lunya laye lʼusimbwi! Nduku dikambu diukuleki wulu.

¹⁸ We keli Unyashungu a wuki, Kanga-Wulu-Tshe, lukanga lukumbu ati: Latuyalaka Kanga lulimbilimbi. We atukaka antu nunu nunu ngandji ka shikaa, we atosombo-yaka kolo ka washi le anʼawo lʼokongo awo.

¹⁹ We eko mamba lu ulakanyelu, ndu lu wulu lu ekambelu, ashu aye watendaka mbuka tshe yʼantu. We atufutaka untu lʼuntu uku mbuka yandi, uku elua wa etsha andi.

²⁰ We akatshi tulimbitelu a akambu wa mamba lu kete ya Edjibitu, edja ndu elo lu Isariyele ndu lʼatei wʼantu tshe. We akayatungela lukumbu uki welo elo.

²¹ We akatundja wudja aye Isariyele uma lu kete ya Edjibitu la tulimbitelu, akambu wa mamba, lunya la wulu ndu lʼusimbwi, kame la woma a wuki.

²² We akawasha kete nye yakayatshibela washewo dia mbasha, kete yuludi too la usanga.

²³ Vo wakoto loko, wakayikiti. Keli vo kunkitanyia diui diaye, kuyanga nkendakenda lu elembe aye. Vo kuntsha nduku dikambu diakayawadjangela dia vo ntsha, diako mbakayatumela elanyelu kene tshe.

²⁴ Nyendi ngeli; yo yambutshimama dia nembia usumba. Usumba wayukimwama lu anya wʼasi Kaladiya walosha. Vo wayolembiama la yombo, ndjala ka kasha, ndu la elandu. Aui wakayati wambutshama, weme ukʼena.

²⁵ Latuyalaka li, we Khumadiondjo, we kakamvutela wati: Usumbi ekambo la falanga, eti emenyi. Ku usumba wambukimwama lu anya wʼasi Kaladiya!

²⁶ Diui dia Latuyalaka diakayi le Jeremiya ati:

²⁷ Enda, dimi leli Latuyalaka, Unyashungu wa antu tshe. Dikambu dimotshi ndekami wulu uka?

²⁸ Diako mbata Latuyalaka ati: Enda, dimi lutsha nkimo usumba one lu anya wʼasi Kaladiya, ndu lʼanya wa Nebukadineza, khumʼekanga ka Babilona, ku ndi ayuwosa.

²⁹ Asi Kaladiya ane walosha usumba one, wayuyudja dja loko, wayutshumba kame la mvudu yakawatshumbelaka Bala elambu wa malashi ladiku diayo, yakawalambulaka ditemolatemola dikina elambu wa lutela dia mbutshami dikeli.

³⁰ Asi Isariyele la asi Juda wakatshaka paka akambu waki kolo lu ashu ami umaka nshi yawo yʼakenda. Asi Isariyele watutshaka dikishi lu anya awo paka dia mbutshami dikeli, mbata Latuyalaka.

³¹ Usumba one watotomboshaka kele kami la ududu ami umaka lushi lakawahikama edja ndu elo, dia dimi mbunya uma la ntundu kami,

³² ne dia kolo tshe yakatshaka asi Isariyele la asi Juda aki dia mbutshami dikeli, vo la khumi ya dikanga yawo, ewandji awo, elombedi awo, la amvutshi awo asi Juda la asi Jerusalema.

³³ Vo wakambuki okongo, kombelela le mi. Kuyanga dimi laka-waetshaka umaka pindju, vo kununga wetshelu ami.

³⁴ Vo wakakitsha dikishi diawo lu luudu latuwetaka lukumbu lami dia lulanya.

³⁵ Vo wakatshela Bala alunga lʼukidi wa onʼa Hinome dia ntshumbela Moleka anʼawo wʼapami la anʼawo wʼamantu lu dja, dikambu diakimi kumbatela ndu diaki kundjala lu tukanyi tami, dia vo ntsha dikambu dia wononyi wuhu oso, dia munganyia Juda.

³⁶ Kakiane Latuyalaka, Unyashungu wa Isariyele, kata okone lu dikambu diʼusumba one watanyu nyati: Vo wayukimwama lu anya wa khumʼekanga ka Babilona, wayolembiama la yombo, la ndjala ka kasha ndu la elandu, ati:

³⁷ Nyuki, dimi layasanganya uma lu wedja tshe, lene akamawatshanya, lu yenyi yami, lu kele kami ndu lʼududu ami wa mamba. Dimi layakaluya uya lu dihuli ne, layadjasha loko la lutui tshitshi.

³⁸ Vo wayuyala wudja ami, la dimi layuyala Unyashungu awo.

³⁹ Dimi layu-washa utema wame, la mbuka kame, dia vo mbukakami woma pundju, dia vo mpumo lukulu lʼololo, vo la anʼawo wayuto lʼokongo awo.

⁴⁰ Dimi layudja la wo sheki ya pundju, yaha dimi nkadimo uma le wo, dia mbatshela ololo. Dimi layudja woma ami lu etema awo diaha vo mumo uma le mi.

⁴¹ Dimi layongenangena dia mbatshela ololo, layuwaune lu kete nye shikaa lʼutema ami tshe ndu la lumu lami tshe.

⁴² Latuyalaka kata ati: Uku akamela elanyelu kene ka wuki le wudja one, osoku mbayumuwaela ololo tshe wamumalaka.

⁴³ Wayusumba dikambo lu kete nye yatanyu nyati: Yo yeli elanyelu ketu, yaha la antu kuyanga nyama. Yo yambukimwama lu anya wʼasi Kaladiya.

⁴⁴ Antu wayusumbaka dikambo la falanga, wayufundaka dakanelu, wayudimataka ematelu, wayetaka emenyi lu kete ya Bendjamina, lu ahuli wa lʼutshimba wa Jerusalema, lu esumba wa la Juda, lu esumba wa lu leke lʼakuna, lu esumba wa la Shefela, ndu lʼesumba wa la Nengebe, ne dia dimi layakaluya ekundji awo, mbata Latuyalaka.