Jeremiya 31 - La Bible en Otetela (Bible K'Ekila) 1991

¹ Latuyalaka kata ati: Lu etena keso, Dimi layuyala Unyashungu wa khumbu tshe ka Isariyele, La vo wayuyala wudja ami.

² Wudja wakahandi yombo, wakukama ketshi lʼusui wa shenga. Lamʼakayangi Isariyele mumuya,

³ Latuyalaka akene le ndi uma lʼetali. Dimi nkukaka ngandji, ngandji ka pundju! Diako mbatumokolamelaka nkuka ketshi.

⁴ Dimi layukuhika ntu. We ayuhikama, we umuntu lʼemuma Isariyele! We ayolota dengalenga diaye ntu, Ayutsho la ntono wenye a waku wateyaka mpuma.

⁵ We ayune ekodi wa vinyo ntu lu ekungu wa Samariya. Amunyi wayune diango, wayongenangena la diango dia dinela.

⁶ Lushi layuyala, layuhangohango alami Lu ekungu wa Efarayima vati: Nyeso, tutshu la Siona utsha le Latuyalaka, Unyashungu asu.

⁷ Latuyalaka kata ati: Nyudji waelu wʼongenongeno dikambu dia Jakoba. Nyuhangohango lʼongenongeno a wuki Dikambu dia one leli ote a wedja. Nyudianganya lukumu, nyimbi esambu wa diandu, Nyutaki nyati. Lamyalaka ambutshungula wudja andi, Atshikadi wa Isariyele.

⁸ Enda, dimi layuwaela uma lu kete ya la ngelʼa kushi, Layasanganya uma lu kuma ya kete. Lʼatei awo Keli kanga tshungu, kanga etshumbi, Umuntu kanga diemi, la one latata lono. Vo wayukalula ului a wuki lindu.

⁹ Vo wayuya wayaleli, ku dimi layakaluya la esambelu. Dimi layalombola lʼemamu wʼekedi wʼashi, Lu mbuka kʼusimbwi kahaweyi ntakana, Ne dia dimi leli umbutshi wa Isariyele. Efarayima keli onʼami lʼenundu.

¹⁰ Nyu wedja, nyuki diui dia Latuyalaka, Nyutudisanya lu asenga tshe weli etali, Nyututi nyati: One lakahandjula Isariyele, ayasanganya ntu, Ayalama uku atulamaka ulami ekoko andi,

¹¹ Ne dia Latuyalaka akatshungula Jakoba. Ndi akushimbela uma lʼanya wa one lakuleki wulu.

¹² Vo wayuya, wayuyimba esambu lʼukungu wa Siona, Wuludi too la diandu ne dia ololo wa Latuyalaka, Ne dia epunga, ashi wʼelua, la iso; Ne dia ana wʼekoko la wa ngombe. Etema awo wayuyala uku ekambo kamboloyama lʼashi. Vo hawuyuyala la lunyangu ntu nduku yema.

¹³ Ku esekaseka wʼamantu wayono wenye lʼongenongeno, Ndu elongo wʼapami la esumbi wayongenangena kame. Dimi layukadimula delu diawo ongenongeno, layasamba. Dimi layangenyangenya uma lu lunyangu lawo.

¹⁴ Dimi layulutsha etema wʼelombedi la diango diʼololo, La wudja ami wayulutshama lʼololo ami, mbata Latuyalaka.

¹⁵ Tukuku tambukema lu Rama, delu la utanda a wuki. Ratshele lu ndela anʼandi; amboseka dia mbusamba lu dikambu dia anʼandi, Ne dia vo kema.

¹⁶ Latuyalaka kata ati: Uyakimeli, tulelaki, ashu aye tawokediaki asoi. We ayufutama ne dia ulimu aye. Vo wayukalula ntu uma lu kete yʼutunyi.

¹⁷ Elungamelu keko dikambu dia nshi yayayi. Anʼaye wayukalula ntu uya lu kete yawo, mbata Latuyalaka.

¹⁸ Dimi lakuki Efarayima akiyana okone ati: We akansuya, ku dimi lakasuyama Uku yana ya ngombe yahatekela lokoho. Unkaluya, ku dimi layukalula, Ne dia we keli Latuyalaka, Unyashungu ami.

¹⁹ Mete, lamʼakamakadimo, dimi lakaleli kolo yami. Lamʼakamalimbitela munga yami, Dimi lakayakomola lu ehelohelo kami. Dimi lakuki sonyi, lakalombo, Ne dia lakembe wutshu wa dionyo wa nshi yʼolongo a pami.

²⁰ Undi, Efarayima kema onʼami a pami la ngandji? Ndi kema onʼami lulekimi nanga uka? Tena tshe diatumuhangwelaka, dimi latuwuhoka. Diako mbatulungulaka utema ami lu dikambu diandi. Dimi layuwukaka ketshi, mbata Latuyalaka.

²¹ We umuntu lʼemuma, Isariyele, eme tulimbitelu, Uhiki abaya wa menya antu mbuka, Ekamia utema aye utsha lʼosese, lu mbuka kakayatshu. Ukaluli, ukaluli, utsha lʼesumba aye ene.

²² Edja ndu kaandi ayuyukimo mbekeko, We usekaseka a umuntu wakanganela mbuka? Latuyalaka ambutunga engo kʼuyuyu la kete: Umuntu ayulamaka pami.

²³ Latuyalaka Kanga lulimbilimbi, Unyashungu wa Isariyele, kata ati: Wayutaka aui ane ntu lu kete ya Juda ndu lʼesumba ayo, lamʼayumukaluya wane wakatolama lu fumbi vati: Latuyalaka akotshokole, we edjaselu kʼakambu wʼololo, We ukungu wʼekila!

²⁴ Juda la esumba ayo tshe wayudjase loko kame, ekambi wa dikambo la alami wa dungalunga.

²⁵ Dimi layete utema wambokomo uyuyu, layangasanya utema tshe weli la lunyangu.

²⁶ Dimi lakemo, lakendi. Djo yaki dimena le mi.

Sheki yʼUyuyu

²⁷ Latuyalaka kata ati: Nyulungi, nshi yayuyala, yayumune wuhu wʼantu ndu wuhu wa nyama lu Isariyele ndu lu Juda.

²⁸ Uku akamawaendaka dia mbakula, mbahandjula, mbalembia, mbalanya, la dia mbasuya, wuhu ako mbayumuwaendaka dia mpika la dia mune, mbata Latuyalaka.

²⁹ Lu nshi sho, vo hawuta ntu vati: Washi wakali elua wʼepudi, Mbambuyala wanyu wa anʼawo okeke.

³⁰ Keli untu ndame ayuvo ne dia kolo kandi hita. Untu tshe layole elua wʼepudi, wanyu andi ndame wayuyala okeke.

³¹ Latuyalaka kata ati: Nshi yayuyala, yayumudja la khumbu ka Isariyele ndu la khumbu ka Juda sheki yʼuyuyu.

³² Aha uku sheki yakamadji la washewo lu lushi lakamakimela lʼanya dia mbatundja uma lu kete ya Edjibitu. Vo wakalanya sheki yami ku, kuyanga dimi laki uku umewo, mbata Latuyalaka.

³³ Keli onʼeli sheki yayumudja la khumbu ka Isariyele, lʼokongo wa nshi yako. Dimi lavudja elembe ami lu nyumu yawo, layefunda lu etema awo. Dimi layuyala Unyashungu awo, ku vo, wayuyala wudja ami, mbata Latuyalaka.

³⁴ Vo tshe hawulakanyanya untu la unyandi, untu lʼonangu vati: Nyulimbiteli Latuyalaka. Vo tshe wayunimbitela ndu wa waki ndu wa tshitshe, ne dia dimi layadimanyia uhedia awo, handjuho kolo kawo ntu, mbata Latuyalaka.

³⁵ Latuyalaka, latukimoka unya dia ndjala usasi la yanyi, Lakashikike ngondo la toto dia vo ndjala usasi lʼutshu, Latuhashahashaka ashi a waki diʼasukhu awo ndjikita, Ndu lukanga lukumbu lone: Latuyalaka Kanga lulimbilimbi, kata ati:

³⁶ Naka elembe ene wayushila la ntundu kami, Ku tukanula ta Isariyele tayushila, Diaha vo ndjala wudja ntu la ntundu kami pundju.

³⁷ Naka wayeya mbedika ulungu ladiku, Naka wayeya mbishula atshina wa kete lʼesi, Ku dimi layukadja tukanula ta Isariyele, Ne dia akambu tshe wakawatshi, mbata Latuyalaka.

³⁸ Nyuki, nshi yayuyala, yayuwuhikela Latuyalaka usumba, uma lʼetangelu ka Hananele pulu ndu la Suku dia Tshuku.

³⁹ Ushinga wʼedikelu wayusimbo too pulu ndu lu dikuna dia Ngareba, ku vo ndju-kadimo utsha lu leke la Ngoa.

⁴⁰ Ukidi tshe wa edu ndu wʼetuku, la esui tshe pulu ndu lu okedi wa Kidirona, edja ndu la tshuku dia Suku dia Falasa utsha lʼehutwelu ka unya wayukidiama le Latuyalaka. Vo hawunyukwama kuyanga nanyema ntu pundju.