Jeremiya 30 - La Bible en Otetela (Bible K'Ekila) 1991

Daka DiʼEkaluyelu ka Wane Weli lu Lohombo

¹ Diui dia Latuyalaka diakayi le Jeremiya ati:

² Latuyalaka, Unya-shungu wa Isariyele, kata ati: Ufundi aui tshe wakamakutela lu mukanda.

³ Uki, nshi yayuyala, yayumukaluya antu ami wʼasi Isariyele ndu wʼasi Juda wakatshu lu lohombo. Dimi layakaluya lu kete yakamasha washewo. Ku vo wayuyikita, mbata Latuyalaka.

⁴ Lanʼeli aui wakati Latuyalaka lu dikambu dia Isariyele, ndu lu dikambu dia Juda.

⁵ Latuyalaka kata ati: Shu takuki alelu wa woma, wa woma wa mamba, aha wa ki.

⁶ Nyumbwani, nyendi naka pami mbutaka ona! Ku okoko wana wenami pami tshe ahe anya Lu lukindi landi uku umuntu latata lono? Dikambu kuna diambukaso elundji kʼuntu lʼuntu?

⁷ Yee, ndi lushi lone wuki li! Nduku lukina leli uku lo. Lo leli etena ka pa le Jakoba, Keli ndi ayushimbamela uma loko.

⁸ Lushi lone, dimi layokola lokoho landi uma lu kingu kaye, layata luweti laye, lʼasi wedja hawukete fumbi ntu, mbata Latuyalaka.

⁹ Keli nyu nyayundjela dimi Latuyalaka, Unyashungu anyu, la Davidi, khumʼekanga kanyu, kayumunyiya dia nyulela.

¹⁰ Okone tukaki woma we ukambi ami Jakoba, Tateki asulu, we Isariyele, Ne dia dimi layukushimbela uma lu kete yʼetali, La tukanula taye uma lu kete yewo lu lohombo. Jakoba ayukalula, Ayuyala la mumuya ndu la ki, Ku nduku untu layohenyahenya, mbata Latuyalaka.

¹¹ Ne dia dimi leli laye dia nkushimbela, Dimi layushila wedja tshe, lene akamakutshanya ushiki, Keli dimi halukushila ushiki, Dimi layukuhangwela la sambu kʼololo. Dimi halukukimo aha nkusuya.

¹² Latuyalaka kata ati: Puta kaye heyi nkono, Ehumwelu kaye keli wulu efula.

¹³ Nduku layukoteketela, dia momba puta kaye. We kema la ekanga wukuki nkokonoya.

¹⁴ Wane wakakukaka ngandji, wambukuhela, nduku lakukanela, Ne dia dimi lakakuhumuya puta uku utunyi. Dimi lakakusuya la ngala, ne dia efula kʼehedia aye, Ndu ne dia wuki wa kolo yaye.

¹⁵ Ukundi alelaye ne dia puta kaye? Sui diaye hadieyi nshila, ne dia efula kʼehedia aye, Ne dia wuki wa kolo yaye, mbamumukutshela akambu ane.

¹⁶ Waku tshe watukolekaka, wayolema. Atunyi aye tshe otoi lʼotoi ayotolama lu fumbi. Waku watukumbaka la diango, wayumbama. Waku tshe watukundaka lu fumbi, Dimi layakimo lu fumbi.

¹⁷ Latuyalaka kata ati: Dimi layukokonoya, layomba puta yaye, Ne dia vo watuketaka engo ka mbikadja vati: Siona uku, nduku latuyikanelaka.

¹⁸ Latuyalaka kata ati: Nyuki, dimi layukaluya wane wakatolama Lu fumbi uya lu mvudu yʼapema ya Jakoba. Dimi mbukaka adjaselu andi ketshi. Usumba ayuhikama lu dikuna diawo, Ndu luudu la khumʼekanga lu dihuli diakilo.

¹⁹ Esambu wa diandu wayutumbaka uma lʼatei awo, La waelu wʼongenongeno uma le antu wangenangena. Dimi layafudia, vo hawukitakita. Dimi layuwandula, vo hawukitshakitshama.

²⁰ Anʼawo wayuyala uku nshi ya ntundu, Ului awo wa lusanganya wayushikikala la ntundu kami. Dimi layusuya waku tshe wayuwaengiya.

²¹ Uwandji awo ayuyala usikawo hita. Umbuledi awo ayutumba kʼatei awo. Dimi layusukanya, ku ndi ayuya le mi, Ne dia akona eya ndjasukanya le mi ndame? mbata Latuyalaka.

²² Nyu nyayuyala wudja ami, la dimi layuyala Unyashungu anyu.

²³ Nyuki, ngimbi ka Latuyalaka! Kele kandi kambutumba, ngimbi ka wulu. To kayusunguto lu ete wʼantu wa kolo.

²⁴ Kele ka wulu ka Latuyalaka hukitakita, Edja ndu ndi ambutsha, Ambushidiya sangweyu diʼutema andi. Nyu nyayulimbitela dikambu ne lu nshi yayayi.