Jeremiya 3 - La Bible en Otetela (Bible K'Ekila) 1991

¹ Vo mvutaka vati: Naka pami amboseka wadendi, la umuntu ambumo lakandi, Ku ndi ambututshukama la pami kekina, pami kako ayukaluya ntu uka? Undi, ndu kete hayusana la dikambu diako? Nyu nyakanseke, nyakatemola ditemolatemola efula. Keli nyukaluli le mi, mbata Latuyalaka.

² Nyedia ashu anyu utsha lu ahuli wa ladiku, nyendi! Lendʼeli dihuli diakinyu kontemola ditemoletemola? Nyu nyakadikungaka lʼumamu a mbuka, Uku asi Arabiya lʼusui wa shenga. Nyu nyakasanya wudja uma lʼotemwelo anyu, la uma lu kolo kanyu.

³ Diako mbakemala mvula, mbakito kondo lu nshi ya diye. Keli fumu yanyu yeko uku yʼamantu akanga a munanyi. Nyu hanyulangi mbuka sonyi.

⁴ Nyu nyambundelela nyati: Shesu! We eko ongenyi asu uma lu nshi yʼakenda.

⁵ Nyatumbwanaka nyati: Ndi ayutuka kele pundju? Ndi ayumbuka kele edja ndu lʼekumelu? Nyulungi, nyu mvutaka osoku, Keli nyu nyakatshaka akambu wa kolo tshe wakanyeyi ntsha.

Ambosengasenga Isariyele la Juda Dia Vo Nkadimo

⁶ Latuyalaka akamumbula ntu lu nshi ya khumʼekanga Josiya ati: We akenyi kene kambutsha asi Isariyele, akanga wʼuhedia? Vo wakatshokaka ladiku diʼukungu wʼutali tshe, ndu la tshina diʼutamba tshe wʼuyuyu, dia ntotemolaka.

⁷ Dimi lakati nti: Lamʼayuwushidiya ntsha akambu ane tshe, vo wayukalula le mi, keli vo kunkalula. Dikambu dikina, anengewo, asi Juda, akanga a lukesu, wakenyi dikambu so.

⁸ Kuyanga mbakamaseke asi Isariyele, akanga wʼuhedia, ne dia etemwelo kawo ka dikishi ndu kuyanga mbakamawasha mukanda wʼesekanelu, dimi lakenyi nti: Anengewo, asi Juda, akanga a lukesu, hawuki woma. Vo wakatshu dia ntotemola ditemolatemola pupu.

⁹ Uma lu tunginyanginya tawo, mbakawasanya kete, mbakawatemola ave la etamba.

¹⁰ Kuyanga mbake-nyi anengewo, asi Juda, akanga a lukesu akambu aso tshe, vo kunkalula le mi lʼutema otoi, keli paka la lukesu, mbata Latuyalaka.

¹¹ Latuyalaka akamvutela ati: Isariyele, akanga wʼuhedia wambuleka asi Juda, akanga a lukesu, ololo.

¹² Tshoka utsha la ngelʼa kushi, utuhangohango, ututi aui ane wati: Nyu asi Isariyele, akanga wʼuhedia, nyukaluli, mbata Latuyalaka. Dimi handjunyenda la elundji ka kele ntu, Ne dia dimi leko kanga ketshi, mbata Latuyalaka. Dimi hatutshikalaka la kele kami pundju.

¹³ Dikambu otoi, nyetawo nyati: Nyu nyakampedia, dimi Latuyalaka, Unyashungu anyu, Nyakediya ekulu anyu utsha lene la lene, Utsha le ditemolatemola diʼasi wedja, la tshina diʼutamba wʼuyuyu. Ndu nyu kunkitanyia diui diami.

¹⁴ Nyu ana wʼuhedia, nyukaluli, mbata Latuyalaka, Ne dia dimi leli khumenyu. Dimi layunyosa otoi uma lʼusumba lʼusumba, Ahendi uma lu khumbu la khumbu, ku dimi layunyela uya la Siona.

¹⁵ Dimi layunyusha alami weli la etema uku wami. Vo wayunyuleshaka la ewu la yimba.

¹⁶ Latuyalaka kata ati: Lamʼayunyufulanela ndu lamʼayunyuyala la diwutshi, lu nshi sho, nyu hanyoteketa ndu dia oshete wa sheki wa Latuyalaka, hanyudimula lukumbu, kana mbuho lu tukanyi, hanyukumbula mbena, kuyanga ntsha ukina wuhu ako.

¹⁷ Lu etena keso, wayeta Jerusalema vati: Kiti ka diulelu ka Latuyalaka. Wedja tshe wayusangana la Jerusalema lu lukumbu la Latuyalaka. Vo hawuyela saki yʼetema awo wa kolo.

¹⁸ Lu nshi sho, khumbu ka Juda ayokendakendaka kame la khumbu kʼIsariyele. Vo wayuya kame uma lu kete ya la ngelʼa kushi, uya lu kete yakamasha washenyu ukito.

¹⁹ Dimi lakati nti: Ukundi ayumunyukitsha lʼatei wa anʼami Ndu ayumunyusha kete yʼololo ukito. Elengalenga kuleki dimena ka wedja? Ku lakati nti: Nyu nyayumbetaka nyati: Shesu! Nyu hanyukadimo uma le mi.

²⁰ Keli uka atumoka umuntu kanga lukesu uma le umendi, Mbakanyankesi, nyu khumbu ka Isariyele, mbata Latuyalaka.

²¹ Aui wambukema lu ahuli wa ladiku, Alelu la esengosengo wʼasi Isariyele mbewo, Ne dia vo wakalanya mbuka yawo, wakuhela Latuyalaka, Unyashungu awo.

²² Nyu ana wʼehedia, nyukaluli, Ku dimi layunyudimanyia ehedia anyu. Nyendi, shu tambuya le ye, Ne dia we keli Latuyalaka, Unyashungu asu.

²³ Mete, lundju latuyakaka uma lʼakuna, La lufungusu uma lʼekungu, yeko paka anyanya. Mete, panda ka Isariyele keko paka le ye, we Latuyalaka, Unyashungu asu.

²⁴ Ditemolatemola dia sonyi diakamani waho wʼulimu washesu uma lu nshi yasu yʼakenda: dungalunga diawo, la ngombe yawo, anʼawo wʼapami ndu wʼamantu.

²⁵ Tetami lu sonyi kasu, ufutanu asu watukumbi, ne dia shu takatshela Latuyalaka, Unyashungu asu, kolo, ndu shu ndu washesu umaka nshi yasu yʼakenda edja ndu elo. Shu kunkitanyiaka diui dia Latuyalaka, Unyashungu asu.