Jeremiya 27 - La Bible en Otetela (Bible K'Ekila) 1991

Djimbitelu ya Koho

¹ Lʼetatelu ka diulelu dia Zedekiya, onʼa Josiya, khumʼekanga ka Juda, diui ne diakayi le Jeremiya uma le Latuyalaka.

² Latuyalaka akamvutela ati: Uyatsheli lokoho la ushinga, uyadjilo lu kingu.

³ Utumi diui le khumʼekanga ka Edome, le khumʼekanga ka Moaba, le khumʼekanga kʼasi Amona, le khumʼekanga ka Tura, ndu le khumʼekanga ka Sidona lu anya wʼakendji watuyakaka la Jerusalema le Zedekiya, khumʼekanga ka Juda.

⁴ Uwasha okende one le akhumewo wati: Latuyalaka, Unyashungu wa Isariyele, Kanga lulimbilimbi kata ati: Dieli la nyu dia ntutela akhumenyu aui ane nyati:

⁵ Dimi Latuyalaka, lakatungi kete, ndu antu ndu nyama yeli ladiku diayo la wulu ami wa mamba ndu la lunya lami lʼusimbwi, lambuyikimo le wane walangami yisha.

⁶ Kakiane dimi lambukimo kete nye tshe lu anya wʼukambi ami Nebukadineza, khumʼekanga ka Babilona. Lambuwusha ndu nyama ya lʼukunda dia yo mbukambela ulimu.

⁷ Wedja tshe wayuyala lʼokongo andi, ndi, onʼandi la ukana andi edja ndu lamʼayukuka etena ka kete yandi. Ku wedja efula la khumi ya dikanga ya waki wayolembia.

⁸ Naka wudja omotshi, naka diulelu dimotshi hawetawo dia ndjala lʼokongo wa Nebukadineza, khumʼekanga ka Babilona, ndu hawetawo mbidja kingu yawo lu lokoho landi, dime layusuya wudja ako, la yombo, ndjala ka kasha, la elandu edja ndu lamʼayumashila ushiki, mbata Latuyalaka.

⁹ Keli nyu tanyukelaki amvutshi anyu, asaki wʼawulu anyu, amenyi anyu wʼalo, ambeyi anyu wa diango dia lʼulungu la akanga wʼaloho anyu, watunyutelaka vati: Nyu hanyuyala lʼokongo wa khumʼekanga ka Babilona!

¹⁰ ne dia vo watunyutelaka akambu wahatayi wa kashi, dia nyunya uma lu kete yanyu, la dia dimi nyutshanya ndu dia nyu ntuvo.

¹¹ Keli wudja wayetawo mbidja kingu yawo lu lokoho la khumʼekanga ka Babilona dia ndjala lʼokongo andi, wudja ako mbayumutshika lu kete yawo. Vo wayuyikambaka, wayudjaseka loko, mbata Latuyalaka.

¹² Dimi lakatela Zedekiya, khumʼekanga ka Juda, aui aso tshe nti: Nyetawo mbidja kingu yanyu lu lokoho la khumʼekanga ka Babilona, dia ndjala lʼokongo andi, ndi la wudja andi, mbayunyulumba.

¹³ Okoko wana wukukinyu mvo, we la wudja aye, la yombo, la ndjala ka kasha ndu la elandu uku akateketshi Latuyalaka dikambu dia wudja wahetawo ndjala lʼokongo wa khumʼekanga ka Babilona?

¹⁴ Tulungaki aui wʼamvutshi watukutelaka vati: Nyu hanyuyala lʼokongo a khumʼekanga ka Babilona, ne dia vo watukutelaka akambu wahatayi wa kashi.

¹⁵ Latuyalaka kata ati: Dimi kumbatuma, keli vo watutaka akambu wahatayi wa kashi lu lukumbu lami, dia dimi nyutshanya la dia nyu ntuvo, nyu la amvutshi ako watunyutelaka akambu wahatayi wa kashi.

¹⁶ Dim lakatela elombedi la antu ane tshe nti: Latuyalaka kata ati: Tanyulungaki aui wʼamvutshi anyu watunyutelaka akambu wahatayi wa kashi, vati: Nyuki, wayukaluya diango diʼulimu dia luudu la Latuyalaka esadi uma la Babilona, ne dia kashi kanyutelawo.

¹⁷ Tanyulungaki, nyuyali lʼokongo a khumʼekanga ka Babilona, mbayunyulumba. Okoko wana wukuki usumba one nanyema?

¹⁸ Naka amvutshi mbewo, naka diui dia Latuyalaka dieko le wo, vo wanyolombele Latuyalaka Kanga luli-mbilimbi kakiane, dia diango diʼulimu diambutshikala lu luudu la Latuyalaka ndu dia la Jerusalema tadiembamaki utsha la Babilona.

¹⁹ Latuyalaka Kanga lulimbilimbi kata lu dikambu dia dikoho, puki ka wuki, dikitshelu, la diango diʼulimu dikina diambutshikala lʼusumba one,

²⁰ diaki kontola Nebukadineza, khumʼekanga ka Babilona, lamʼakandatole Jekoniya, onʼa Jehoyakima, khumʼekanga ka Juda, ndi la dihangamendi tshe dia Juda ndu dia Jerusalema fumbi, uma la Jerusalema utsha la Babilona.

²¹ Latuyalaka Kanga lulimbilimbi, Unyashungu wa Isariyele, kata lu dikambu dia diango diʼulimu diambutshikala lu luudu la Latuyalaka, lu luudu la khumʼekanga ka Juda, ndu lu Jerusalema ati:

²² Dio diayotolama utsha la Babilona, diayututshikala leko edja ndu lushi layumutudiyanga. Ku layutudiosa, layudikaluya lu dihuli ne, mbata Latuyalaka.