Jeremiya 26 - La Bible en Otetela (Bible K'Ekila) 1991

Wambanela Jeremiya Dia Mbudiaka

¹ Lʼetatelu ka diulelu dia Jehoyakina, onʼa Josiya, khumʼekanga ka Juda, kakayi diui ne uma le Latuyalaka le Jeremiya.

² Latuyalaka kata ati: Utemali lu seke dia lukumbu la luudu lami, dimi Latuyalaka. Uteli waku wambuya uma lʼesumba tshe wa Juda dia ndjontemola lu luudu lami aui tshe wamumukudjangela dia we mbatela. Tutshikaki nduku diui.

³ Undu, vo wayulunga, wayukadimo untu lʼuntu uma lu mbuka kandi ka kolo, dia dimi nemba utema uma lʼelanyelu kakamasanguya mbatshela, ne dia etsha awo wa kolo.

⁴ Kuwateli wati: Latuyalaka kata ati: Naka nyu hanyu-mbukela dia nkendakenda lu elembe ami wakamakitsha la ntundu kanyu,

⁵ dia nunga aui wa ekambi ami amvutshi, watumunyutumelaka kʼolomo la pindju, keli nyu kumbaukela,

⁶ ku dimi layete luudu lone uku Shilo, ndu layete usumba one engo ka mananu le wedja tshe wa la kete.

⁷ Elombedi, amvutshi, la antu tshe wakuki Jeremiya ateketa aui aso lu luudu la Latuyalaka.

⁸ Laniʼakashidiya Jeremiya mvuta aui tshe wakawudjangela Latuyalaka dia ndi mvutela antu, elombedi, amvutshi, ku antu tshe wakawundi, wata vati: Mete, we ayuvo!

⁹ Okoko wana wakayatshi akambu wahatayi lu lukumbu la Latuyalaka, wati: Luudu lone layuyala uku Shilo, la usumba one wayuyala tongo tu, waha la antu? Wudja tshe wakamotela Jeremiya lu luudu la Latuyalaka.

¹⁰ Lamʼakuki ewandji wa Juda akambu ako, vo wakayi uma la luudu la khumʼekanga uya lu luudu la Latuyalaka, wakayudjase lʼeotwelo ka Suku diʼUyuyu dia luudu la Latuyalaka.

¹¹ Elombedi la amvutshi wakatela ewandji la antu tshe vati: Untu one nkukaka mvo, ne dia ndi akatshi aui wa kolo dikambu diʼusumba one, uku akanyuki lu atui anyu.

¹² Ku Jeremiya akatela ewandji tshe la wudja tshe ati: Latuyalaka kakantumi dia ndjuta aui tshe wakanyuki lu dikambu dia luudu lone la usumba one.

¹³ Okone nyolongosole mbuka yanyu la etsha anyu kakiane, nyukitanyia diui dia Latuyalaka, Unyashungu anyu. Ku ndi ayolemba utema lu elanyelu kakandati lu dikambu dianyu.

¹⁴ Keli le mi, dimi leko lu anya anyu. Nyuntsheli uku alanganyu ndu uku eli ololo lu ashu anyu.

¹⁵ Dikambu otoi, nyeyi nyati: Naka nyu nyayundjaka, nyayuyakitshiya dikila diaha la unungu lu ete anyu, nyu, usumba one, la wane wudjashi loko; ne dia mete, Latuyalaka kakantumi dia dimi nyutela aui aso tshe.

¹⁶ Ku ewandji la wudja tshe wakatela elombedi la amvutshi vati: Untu one hakuki ndjakema, ne dia ndi akatutedi aui lu lukumbu la Latuyalaka, Unyashungu asu.

¹⁷ Dihangamendi dimotshi dia wudja wakemala, wakatela ului tshe wʼantu vati:

¹⁸ Mika, usi Moreshete, akataka akambu wahatayi lu nshi ya Hezekiya, khumʼekanga ka Juda. Ndi akatela wudja wa Juda tshe ati: Latuyalaka Kanga lulimbilimbi kata ati: Siona ayufusama uku lafusa ekambo. Jerusalema ayuyala tuta diʼave La ukungu wa luudu la Latuyalaka ayuyala uku ukunda wa lʼukungu

¹⁹ Hezekiya, khumʼekanga ka Juda, la Juda tshe wakudiaki uka? Undi, ndi kumbuka Latuyalaka woma? Ndi konsengasenga Latuyalaka dia ndi mbuka ketshi? Latuyalaka konemba utema lu elanyelu kakandati dikambu diawo uka? Shu tuyanga ndjatungela unungu a wuki.

²⁰ Ndu pami kekina Uriya, onʼa Shemaya, usi Kiriyate-Jearima, akataka akambu wahatayi lu lukumbu la Latuyalaka, dikambu dia usumba one la kete nye pupu uku aui tshe wutshi Jeremiya.

²¹ Lamʼakuki khumʼekanga Jehoyakima, ndi lʼahuka andi tshe la ewandji andi tshe aui andi, khumʼekanga ak uyangi dia mbudiaka. Keli lamʼakuki Uriya lukumu loso, ndi akuki woma, akalawo, akatshu lʼEdjibitu.

²² Khumʼekanga Jehoyakima akatumi Elenatana, onʼa Akebore, ndi la antu amotshi, utsha lʼEdjibitu.

²³ Vo wakatosa Uriya uma lʼEdjibitu, wakatuya la ndi le khumʼekanga Jehoyakima, ndi akudiaki la yombo, akakadja udu andi lu waumbu wʼantu kʼantu.

²⁴ Keli lunya la Ahikame, onʼa Shafana, laki kame la Jeremiya, diaha vo mbukimo le antu dia vo mbudiaka.