Jeremiya 25 - La Bible en Otetela (Bible K'Ekila) 1991

Deku Akumi Esambeli DiʼAsui

¹ Diui diakayi le Jeremiya lu dikambu diʼasi Juda tshe lu eleku ka nei ka diulelu dia Jehoyakima, onʼa Josiya, khumʼekanga ka Juda (eleku kako kaki eleku ka ntundu ka Nebukadineza, khumʼekanga ka Babilona).

² Diui diako mbakatela umvutshi Jeremiya wudja tshe wa Juda la waku tshe wakadjashi la Jerusalema, ati:

³ Lʼatei wa deku akumi ahendi la satu ne, umaka eleku ka dikumi lʼasatu ka diulelu dia Josiya, onʼa Amona, khumʼekanga ka Juda, edja ndu kakiane, diui dia Latuyalaka diatuyakaka le mi. Dimi latunyutelakadio umaka pindju, keli nyu kumbuka.

⁴ Keli nyu kumbuka kana mpuke atui dia nunga aui wa Latuyalaka, kuyanga ndi akanyutumelaka amvutshi andi umaka pindju wata vati:

⁵ Nyukaluli nyu tshe untu lʼuntu uma lu mbuka kandi ka kolo, ndu uma lu kolo kʼetsha anyu. Nyudjase lu kete yakanyusha Latuyalaka, nyu la washenyu, uma lu nshi yʼedjedja edja ndu pundju.

⁶ Tanyuyelaki ditemolatemola dia ditemola la dikhusamela. Tanyumbukiaki yenyi la ditemolatemola diakanyatshi lʼanya anyu, ku dimi halunyutshela nduku kolo.

⁷ Keli nyu kumbukelami, dia nyu mbukiami yenyi la ditemolatemola diakanyatshi lʼanya dia nyutungela elanyelu, mbata Latuyalaka.

⁸ Diako mbata Latuyalaka Kanga lulimbilimbi ati: Ne dia nyu kununga aui ami,

⁹ dimi layeta wedja tshe wa la ngelʼa kushi, ndu ukambi ami Nebukadineza, khumʼekanga ka Babilona. Dimi layaela uya lu kete nye dia ndjolosha asi kete nye ndu wedja ene tshe wadingi. Dimi layashila ushiki, layuwaete engo ka nkashimo, engo ka dionyo, la elanyelu ka pundju.

¹⁰ Dimi layukumiya waelu wʼongenongeno la waelu wʼonge-nongeno a wuki, kimbu yʼutshuki la kimbu yʼutshukami, mindju wa toshi la esasi wa tala.

¹¹ Kete nye tshe yayuyala elanyelu ketu, engo ka nkashimo, la wedja ene tshe wayuyala lʼokongo wa khumʼekanga ka Babilona deku akumi esambeli.

¹² Keli lamʼayushila deku akumi esambeli so, dimi layusuya khumʼekanga ka Babilona la wudja andi, ne dia kolo kawo. Dimi layusuya kete yʼasi Kaladiya, layuyete elanyelu pundju, mbata Latuyalaka.

¹³ Dimi layutshela kete ku uku aui tshe wakamati lu dikambu diayo, aui tshe wufundami lu buku ne, wakataka Jeremiya lu dikambu dia wedja tshe.

¹⁴ Ne dia wedja wa wulu la khumi ya dikanga ya waki wayuwaetsha ndu vo lʼokongo awo, la dimi layatshela uku etsha awo, ndu uku elimu wʼanya awo.

Dikoho Dia Kele Dikambu Dia Wedja

¹⁵ Okone Latuyalaka, Unyashungu a Isariyele, akamvutela ati: Ose dikoho dia wanu wa kele kami uma lu lunya lami, kutanoshaka wedja tshe wayumukutuma.

¹⁶ Vo wayono, wayusukosuko, wayuyala uku akanga wʼaladi, ne dia yombo yayumutuma lʼatei awo.

¹⁷ Okone dimi lakose dikoho uma lu lunya la Latuyalaka, lakanosha wedja tshe wakandantumi:

¹⁸ Jerusalema la esumba wa Juda, khumi ya dikanga yawo la ewandji awo, dia mbaete elanyelu, engo ka nkashimo, engo ka dionyo ndu engo ka mananu uku wenamawo elo;

¹⁹ Farayo, khumʼekanga kʼEdjibitu, ekambi andi, ewandji andi, la wudja andi tshe;

²⁰ la asi wedja tshe wakadjashi lʼatei awo, khumi ya dikanga tshe ya kete ya Uze, la khumi ya dikanga tshe ya kete yʼasi Filistiya, yʼAshikelona, ya Ngaza, ya Ekerona, la atshikadi wa Ashidode;

²¹ Edome, Moaba, la asi Amona;

²² khumi ya dikanga tshe ya Tura, khumi ya dikanga tshe ya Sidona, ndu khumi ya dikanga ya la asenga wa lu ashi a waki;

²³ Dedana, Tema, Buza la waku tshe watunyaka avu awo aketo;

²⁴ khumi ya dikanga tshe yʼArabiya la khumi ya dikanga tshe ya antu wa wehu wehu wudjashi lʼusui wa shenga;

²⁵ khumi ya dikanga tshe ya Zimiri, khumi ya dikanga tshe ya Elama, khumi ya dikanga tshe yʼasi Mediya;

²⁶ khumi ya dikanga tshe ya la ngelʼa kushi ya la suki ndu ya lʼetali, otoi lʼotoi; waulelu tshe wa lʼandja weli ladiku dia kete; ku khumʼekanga ka Babilona ayono lʼokongo awo.

²⁷ Kutuwateli wati: Latuyalaka, Unyashungu wa Isariyele, Kanga lulimbilimbi kata ati; Nyono, nyudjo, nyutundja fulu, nyoko aha mbeto, ne dia yombo yayu mutuma lʼatei anyu.

²⁸ Naka vo wayutuna nungula dikoho uma lʼanya aye dia no, kuwateli wati; Latuyalaka Kanga lulimbilimbi kata ati: Dieli la nyu dia no.

²⁹ Kakiane dimi lambutatela ulimu wʼelanyelu lʼusumba watuwetaka lukumbu lami, ku nyu hanyusuwi nduku yema? Nyu hanyuhanda ne dia dimi layunyetela yombo uma le wa la kete tshe, mbata Latuyalaka Kanga lulimbilimbi.

³⁰ Okone utaki aui ane tshe dikambu diawo; uwateli wati: Latuyalaka ayudikita uma ladiku. Ndi ayulimolimo uma lʼedjaselu kandi kʼekila. Ndi ayudikitela wa lʼukutu andi wulu. Ndi ayuhangwehangwela wa la kete tshe Uku wane wahina elua lu yundja.

³¹ Lundju latukumaka pulu ndu lʼekumelu ka kete, Ne dia Latuyalaka eko la wedja tamu. Ndi ayulumbuya wasena tshe, Ayukimo antu wa kolo lu yombo, mbatandi.

³² Latuyalaka Kanga lulimbilimbi kata ati: Nyuki, elanyelu kayuyala le wudja la wudja. Ngimbi ka wulu kayuya uma la kuma ya kete.

³³ Lushi lako, wane wayudiakema le Latuyalaka, wayukalema kalakala uma la kuma kemotshi ka kete pulu ndu la kuma kekina. Vo hawulelama, hawembama, hawukhundema. Vo wayuyala uku tumi ladiku dia kete.

³⁴ Nyu alami wʼekoko, nyudi tukuku, nyuleli, Nyu elombodi wa dungalunga, nyungito lu etuku! Ne dia nshi yʼedianganyelu La ediakamelu kanyu yambukuka. Nyu nyayudiakema uku ekoko wʼushinga a wulu.

³⁵ Nduku dihuli dia mbishama le alami wʼekoko! Nduku panda le elombedi wa dungalunga!

³⁶ Nyulungi, tukuku tʼalami wʼekoko toso, Akhumu wa elombodi wa dungalunga aso, Ne dia Latuyalaka ambulanya ahuli Watuwuleshaka dungalunga diawo.

³⁷ Ekutu awo wa ki wambulanyema La kele ka wulu ka Latuyalaka.

³⁸ Ndi akatshiki edjaselu kandi uku atutshikaka tambwe dihuli diakatetami, Ne dia kete yawo yambuyala shenga tshu Uma lu yombo ya Latuyalaka, la uma lʼududu wa kele kandi.