Jeremiya 24 - La Bible en Otetela (Bible K'Ekila) 1991

Asaka Ahendi wa Fingu

¹ Lʼokongo a la nʼakatole Nebukadineza, khumʼekanga ka Babilona, Koniya, onʼa Jehoyakima, khumʼekanga ka Juda, ewandji wa Juda kame la etshudi wʼabaya la etshudi wa mbulu uma la Jerusalema utsha la Babilona, Latuyalaka akamenya asaka ahendi wa fingu wukitshami la ntundu kʼetemwelo kandi lu do.

² Lu saka dimotshi kaki fingu yuleki ololo uku fingu yatuwumbaka ntundu, keli saka dikina aki la fingu yakaleki kolo, yaki kolo wuhu waki kunkuka untu nde.

³ Latuyalaka akamumbula ati: Jeremiya, kenaye na? Ku dimi lakûkaluya diui nti: Fingu. Fingu yʼololo, yuleki ololo, ndu fingu ya kolo efula, kolo wuhu wahakuki untu nde.

⁴ Ku diui dia Latuyalaka diakayi le mi ati:

⁵ Latuyalaka, Unyashungu wa Isariyele, kata okone ati: Dimi layenaka fumbi yʼuma la Juda yakamatumi uma lu dihuli ne utsha la Kaladiya uku fingu nye yʼololo, dia mbalama ololo.

⁶ Dimi layuwaendaka dia mbatshela ololo dimi layakaluya lu kete nye. Dimi layashikike, haluwahandjula. Layuwaune, haluwakula.

⁷ Dimi layuwasha utema dia vo nimbitela vati: Dimi keli Latuyalaka. Vo wayuyala wudja ami, la dimi layuyala Unyashungu awo, ne dia vo wayukalula le mi lʼutema otoi.

⁸ Latuyalaka kata ati: Dimi layena Zedekiya, khumʼekanga ka Juda, ewandji andi, asi Jerusalema wutshikadi lu kete nye la waku wudjashi lu kete yʼEdjibitu, uku fingu yako ya kolo yahakuki untu nde, ne dia yo yeko kolo.

⁹ Dimi layuwata asulu, layatshela kolo lʼatei a waulelu tshe wa la kete dia vo ndjala engo ka dionyo, engo ka wela, engo ka mpongwela soi, la engo ka mananu lu ahuli tshe wayumutshanya.

¹⁰ Dimi layatumela yombo, ndjala ka kasha, la elandu, edja ndu lamʼayuwushila lu kete yaka-mawasha, vo la washewo.