Jeremiya 18 - La Bible en Otetela (Bible K'Ekila) 1991

Ukingi la Diwumba

¹ Diui diakayi le Jeremiya uma le Latuyalaka ati:

² Uneli, utshu utsha lu luudu lʼukingi a puki. Dimi layutukukia aui ami leko.

³ Lamʼakamakumi lu luudu lʼukingi a puki, lakutani atsha eshingito wa diwumba.

⁴ Lamʼakatate mbaka lu anya wʼukingi, ndi akose diwumba diako, akatshi kekina kakayuyala ololo lu ashu andi.

⁵ Diui dia Latuyalaka diakayi le mi ati:

⁶ Nyu khumbu ka Isariyele, dimi haleyi nyutsha uku akatshi ukingi a puki one? mbata Latuyalaka. Nyu wudja wa Isariyele nyulungi, uku eli diwumba lu anya wʼukingi, mbenyu lu anya ami.

⁷ Etena tshe kayumuta diui dikambu dia wudja kana diulelu, dia dinya, dihandjula, kana dilanya,

⁸ naka wudja ako wakamataka aui wayukadimo uma lu kolo yawo, dimi layolemba utema dia kolo kakamasanguya mbatshela.

⁹ Etena tshe kayumuta diui dikambu dia wudja kana diulelu, dia mbuhika la mbushikike,

¹⁰ naka wudja ako wayutsha kolo la ntundu kami, diaha nkitanyia aui ami, dimi layukadimo uma lʼololo wakamasanguya mbatshela.

¹¹ Okone, kakiane otekete lʼasi Juda la wane wudjashi la Jerusalema wati: Latuyalaka kata ati: Nyulungi, lambolongosola elanyelu dikambu dianyu. Dimi lambusanguya dia nyutshela kolo. Nyukaluli untu lʼuntu uma lu mbuka kandi ka kolo, nyolongosole mbuka yanyu la ditshelu dianyu.

¹² Keli vo mvutaka vati: Dikambu so anyanya! Shu tayuyelaka paka tukanyi tasu, shu tshe tayutshaka uku saki yʼetema asu wa kolo.

¹³ Diako mbata Latuyalaka okone ati: Nyumbuli wedja, akona wakuki akambu wa wuhu oso? Usekaseka wʼemuma Isariyele akatshi dikambu dia kolo kuleki.

¹⁴ Lungi lʼekama la tshitshi la Lebanona nshilaka lu ave lʼekungu wa Heremona? Ashi watokelaka lu ekedi wʼuma lʼekungu wʼetali mumaka uka?

¹⁵ Wudja ami wambumbuhela, Wambutshumbela ditemolatemola malashi. Vo wakatakana lu ditshelu diawo Lamʼakawakendakendaka lu mbuka yʼedjedja. Vo waketetaka lu tuwuka, lu mbuka yahatalongoswama.

¹⁶ Wakete kete yawo engo ka woma. Engo ka mpongwela soi pundju. Wane tshe watetetaka loko, watukashimoka, Watutshindjaka ete.

¹⁷ Dimi layadianganya la ntundu kʼutunyi awo Uku la lopepe lʼuma lʼehutwelu. Dimi layuwauka okongo, haluwaenda lu nshi yawo ya pa.

Tuseki tʼAntu la Dombelo Dia Umvutshi

¹⁸ Vo wakatanela vati: Nyeso, tudjeli Jeremiya sheki, ne dia elembe hawushisho le elombedi, alaka le akanga a yimba, kuyanga aui le amvutshi. Nyuyeti, tutudiaki lʼaui, tatulungaki aui andi nduku yema.

¹⁹ Latuyalaka li, umpukami, Ulungi aui a waku wama la mi.

²⁰ Undi, kolo ayuyala difutu lu akambu wʼololo? Vo wakatshimi difuku dia ndjakami. Uho uku akamemalaka la ntundu kaye Dia mbateketela akambu wʼololo, Dia nkadimula kele kaye uma le wo

²¹ Okone ukimo anʼawo dia vo mvo la ndjala ka kasha. Akimo dia vo ndjakema la yombo. Wadiewo wayali aha la ana, ndu wadi waki edu. Waumewo wadiakemi, elongo awo wʼapami wadiakemi la yombo lu ta.

²² Alelu watumbi uma lu mvudu yawo, Lamʼayuwayela andoshi wa ta shashimuya dia mbalosha, Ne dia vo wakatshimi difuku dia mundami, Wakashe tulunga ta munda ekulu ami.

²³ Latuyalaka li, we mbeyaka tuseki tawo tshe ta ndjakami. Tadimanyiaki ehedia awo, Kuyanga minya kolo yawo uma la ntundu kaye. Vo walanyemi la ntundu kaye. Uwalumbuya paka lu etena kaye ka kele.