Jeremiya 17 - La Bible en Otetela (Bible K'Ekila) 1991

Kolo ka Juda Kaheyi Nyimwama

¹ Kolo ka Juda kambufundama la luwulu la wulu, la sodi ka dive dia wulu dia pesopeso. To kambufundama lu pasi diʼetema awo, ndu lu seki ya lu diakelu diawo.

² Osoku mbatuhoka ndu anʼawo diakelu diawo la Wa-Ashera weli la tshina diʼetamba wʼeyuyu lu akuna wʼetali.

³ Ekungu ami wa lʼusui li, dimi layukimo ukundji anyu la ongonyi anyu diango dia dimbu, ndu ahuli anyu wa ladiku lu kete yanyu tshe, ne dia kolo yanyu.

⁴ Nyu nyayangana uma lʼetenyi kʼukito kakamanyusha. Dimi layunyukimo dia nyu nkambela atunyi anyu ulimu lu kete yahanyeyi, ne dia nyu nyakatshutshiya kele kami. To kayohetaka pundju.

⁵ Latuyalaka kata ati: Mananu kayali le untu latekamaka untu, Lateteka umunyi usuko andi, Latetoyaka utema andi uma le Latuyalaka.

⁶ Untu ako ayuyala uku ukumbu lʼusui wa shenga, Vo hawenyi ololo lama uyiwo. Keli vo watutanemaka lu ahuli wambuma lʼusui wa shenga, Lu kete ya leho, yahadjashi untu.

⁷ Untu latekamaka Latuyalaka eli la otshoko; La Latuyalaka eli elungamelu kandi.

⁸ Ndi ayuyala uku utamba wakawune lʼumamu wʼashi, Watotolaka ediu awo utsha lʼokedi. Vo hawutukaka woma lamʼatuyakaka luhaladi. Akatshi awo watutshikalaka eleselese. Vo hawutukananaka lu eleku kʼowo, Hawutukimoka nto elua.

⁹ Utema ndeka diango tshe lukesu, Vo weko kolo efula. Akona ayeya mbulimbitela?

¹⁰ Dimi Latuyalaka latendaka tukanyi, latedikaka wongo, Dia nfuta untu lʼuntu uku ditshelu diandi, Uku elua wʼetsha andi.

¹¹ Uku engwe kudami lu ekeli wakito kumumba, Osoku mbeli untu latukundjaka Ekundji uma lu mbuka ka kolo. Ndi ayetshika lʼatei a nshi yandi, Ku lʼekumelu, ndi ayuyala paka enginya.

¹² Dihuli diʼotemwelo asu eli kiti ka lutumbu, Kakediama umaka etatelu.

¹³ Latuyalaka, we keli elungamelu ka Isariyele. Waku tshe watukosekaka, wayutshama sonyi. Waku wambangana uma le ye, Wayufundama kumbu la kete, Ne dia vo wambukoseka we Latuyalaka, eteko kʼashi wa lumu.

¹⁴ We Latuyalaka, onkonoya, ku dimi layokono. Unshimbeli, ku dimi layushimbamela, Ne dia we keli lutumbu lami.

¹⁵ Enda vo watumvutelaka vati: Lendʼeli diui dia Latuyalaka, dio diashidiyami kakiane.

¹⁶ Dimi kunkohenyahenya dia ntuma kolo esadi. Dimi kunanga lushi lʼelanyelu nduku yema. We mbeyaka dikambu so. Aui tshe wakamataka waki la ntundu kaye.

¹⁷ Tuyalaki engo ka woma le mi, We eshamelu kami, lu lushi lʼelanyelu.

¹⁸ Waku watunsuyaka, wutshami sonyi, Keli dimi tambutshamaki sonyi. Vo wasaki lukumba, Keli dimi tansakaki lukumba, Uwaela lushi lʼelanyelu uwalanya lʼasui a wulu.

Lushi la Mumuya Mpumbaka Ndjala Ekila

¹⁹ Latuyalaka akamvutela ati: Tshoka, temali la suku dia Bendjamina, lene atotokaka ndu atutumbaka khumi ya dikanga ya Juda, ndu lu asuku tshe wa Jerusalema.

²⁰ Kutuwateli wati: Nyu khumi ya dikanga ya Juda, Juda tshe la asi Jerusalema tshe watotoka lu asuku ane, nyulungi diui dia Latuyalaka.

²¹ Latuyalaka kata ati: Nyewo lu etema anyu. Tanyembaki wutshu lushi la mumuya, tanyuwotshiyaki lu asuku wa Jerusalema.

²² Tanyutundjaki nduku wutshu uma lu mvudu yanyu lushi la mumuya. Tanyutshaki nduku ulimu. Keli nyukidia lushi la mumuya, uku akamadjangela washenyu.

²³ Keli vo kununga, kumpuke atui, wakayala la ete wulu diaha mbetshama.

²⁴ Okone naka nyu nyayumbukela lʼutema otoi diaha mbotshiya wutshu lu asuku wʼusumba one lushi la mumuya, naka nyayukidia lushi la mumuya diaha ntsha nduku ulimu lushi lako,

²⁵ kukhumi ya dikanga yudjashi lu kiti ka diulelu dia Davidi la ewandji awo wayotoka lu asuku wʼusumba one wahemi ladiku dia pusupusu ndu lu falasa, vo la asi Juda, la asi Jerusalema. Ku usumba one ayuyalaki la antu pundju.

²⁶ Antu wayuya uma lʼesumba wa Juda, ndu uma lʼetshimba wa Jerusalema, uma lu kete ya Bendjamina, uma lʼekidi, uma lu leke lʼekungu, ndu uma la Nengebe, dia mbela elambu wa lutshumba, elambu wa nyama, elambu wa shima, malashi la elambu wʼeukelu ka lusaka uya la luudu la Latuyalaka.

²⁷ Keli naka nyu hanyumbukela dia nkidia lushi la mumuya, diaha memba nduku wutshu, kuyanga mboto lu asuku wa Jerusalema lushi la mumuya, dimi layohetsha dja lu asuku wʼusumba. Ku yo yayutshumba mvudu ya khumʼekanga ya la Jerusalema; yo hayudimala.