Jeremiya 15 - La Bible en Otetela (Bible K'Ekila) 1991

Kete Kahakitakita ka Latuyalaka le Juda

¹ Latuyalaka akamvutela ati: Kuyanga Mose kana Samuele ayemala la ntundu kami, dimi halolembe utema lu dikambu dia wudja one. Uwatshanya uma la ntundu kami, watshu.

² Lamʼayuwukumbula vati: Lendi ayututsho? Kakaluya diui wati: Latuyalaka kata ati: Waku wakasonwama lu nyoi, wayutsho lu nyoi; waku wakasonwama lu yombo, lu yombo; waku wakasonwama lu ndjala ka kasha, lu ndjala ka kasha; la waku wakasonwama lu fumbi, wayutsho lu fumbi.

³ Dimi layatumela wehu enei wa ananyishi, mbata Latuyalaka: yombo, dia mbadiaka; fo, dia mbalumata; fudu ya lʼulungu la nyama ya la kete, dia mbahahula la mbalanya.

⁴ Dimi layuwaete engo ka wononyi lʼatei a waulelu tshe wa la kete, ne dia akambu wakatshi Manase, onʼa Hezekiya, khumʼekanga ka Juda, lu Jerusalema.

⁵ We Jerusalema, akona ayukuka ketshi, akona ayukulela, Akona ayetola dia nkumbula kana we la wulu?

⁶ We akantuni, akakalula ekongokongo, mbata Latuyalaka. Diako mbamumusimbula lunya lami dia nkolosha la nkulanya. Dimi lambuheko nkuka ketshi.

⁷ Dimi lakafufula ia ledi la asuku wa la kete; Dimi lakavusha anʼawo, lakalanya wudja ami, Keli vo kunkadimo uma lu ditshelu diawo.

⁸ Wadi waki edu awo wakayala efula Ndeka seke ya losenga la lʼumamu wʼashi a waki. Dimi lakela unanyishi ami Dia ndjolosha amantu wakuti elongo wʼapami. Dimi lakawautsha woma la woma wa mamba shashimuya.

⁹ Umuntu lakuti ana esambeli ambokomo, ambukitshiya; Unya akawudjela eki yanyi. Ndi akutshama sonyi, akakanana. Dimi layukimo waku wakatshikala lu tombo tʼatunyi awo, Mbata Latuyalaka.

¹⁰ Nyomi li, mananu kayali le mi ne dia we kakambuti, pa, li ka tamu, kanga lundju le wudja tshe! Dimi hatosombaka hatosondjanyaka, keli antu tshe mbidjakami mananu

¹¹ Latuyalaka li, ayali nsoku! naka dimi kumbalombelaye, naka dimi kumbasengesengelaye lu dikambu diʼutunyi lu nshi ya pa ndu lu nshi yʼokei.

¹² Luwulu mbeyaka mbokola luwulu lʼuma la ngelʼa kushi ndu ohotela?

¹³ Dimi layukimo diango dianyu la engonyi anyu ukimokimo, dia vo ndjala diango dia dimbu dikambu dia kolo yanyu tshe, lu kete yanyu tshe.

¹⁴ Dimi layunyetsha lʼokongo wʼatunyi anyu utsha lu kete yahanyeyi, ne dia dja ya kele kami yamboheta, yo yayunyutshumba.

Daka Dia Latuyalaka le Jeremiya

¹⁵ We Latuyalaka mbeyaka tshe, umbuho, unami, Onsombweya waku watunsuyaka. Tutetemalaki ndjala la memakana edja ndu dimi lambuvo. Eyi wati: Lambonywama paka lu dikambu diaye.

¹⁶ Dimi lakatani aui aye, lakali. Vo wakayala ongenongeno le mi, wakangenyangenya utema ami, Ne dia watumbetaka lukumbu laye, We Latuyalaka, Unyashungu Kanga lulimbilimbi.

¹⁷ Dimi kumbidjase lʼului wʼamonyodi Kuyanga ngenangena la wo. Dimi lakadjase dime ne dia lunya laye laki le mi, Ne dia we akandudia lʼududu.

¹⁸ Dikambu kuna diatutshikalaka pa kami pundju? Okoko wana watuyalaka Puta kami kandji ketu, la hakono? We ayuyala uku eteko ka lukesu le mi, Ndu uku ashi wahemala la muma?

¹⁹ Diako mbata Latuyalaka okone ati: Naka we ayukadimo le mi, Dimi layukukaluya dia we ndjemalaka la ntundu kami. Naka we ayutaka aui wʼololo aha wʼanyanya, We ayuyala unyo ami. Vo wayukalula le ye, keli tukadimoki utsha le wo.

²⁰ Dimi layukete eheli kʼohotela le wudja one. Vo wayukolosha, keli hawukolembia, Ne dia dimi layuyala la ye Dia nkushimbela la nkutshungula, mbata Latuyalaka.

²¹ Dimi layukutshungula uma lʼanya wʼantu a kolo. Layukushimbela uma lʼanya wʼakanga a ngala.