Jeremiya 14 - La Bible en Otetela (Bible K'Ekila) 1991

Akendji lu Dikambu Dia Langi

¹ Diui dia Latuyalaka diakayi le Jeremiya lu dikambu dia langi ati:

² Juda aya lʼutanda, kuki yʼesumba awo yambolemba. Antu wambudjase la kete wolotshi akutu. Tukuku ta Jerusalema tambumbela.

³ Ewandji watutumaka anʼawo lu ashi. Vo watukumaka lu eshima, keli hawututanaka ashi. Vo watukalulaka mbaka tshu. Vo watukaka sonyi, watukananaka, watukumbaka ete awo.

⁴ Ekambi wa dikambo watukaka sonyi, watukumbaka ete. Kete yatatateka ne dia mvula halo. Diako mbatukaka ekambi wa dikambo sonyi, Matuwukumbaka ete.

⁵ Lufumbo atutaka lʼusui, Keli atosekaka anʼalo ne dia adiyu kema.

⁶ Mangana yatemalaka lu akuna wa hwe hwe, Yo yatawanaka uku mbulu; Ashu ayo watuyalaka eungungi ne dia adiyu kema.

⁷ Kuyanga kolo yasu yambutamia, we Latuyalaka, Ukambeli lukumbu laye ulimu, Ne dia ehedia asu weko efula. Shu takakutshela kolo.

⁸ We elungamelu ka Isariyele, ushimbedi awo lu nshi ya pa, Ukundi ukukiye ndjala uku ongendangenda lu kete, Ndu uku umbetshi a mbuka, letola dia mpanga lushi otoi?

⁹ Ukundi ukukiye ndjala uku untu luka woma, Uku dihuka diaheyi nshimbela antu? Latuyalaka li, we eko lʼatei asu! Watutetaka lu lukumbu laye: tututshikaki!

¹⁰ Latuyalaka kata lu dikambu dia wudja one ati: Vo wakalangi dia mbekeko, hawushimbi ekulu awo. Diako mbahamalungula dimi Latuyalaka. Dimi layuho ehedia awo, layasuya ne dia kolo yawo.

¹¹ Latuyalaka akamvutela ati: Tolombelaki wudja one dia vo mpumo lukulu lʼolo.

¹² Lamʼakilawo ma, dimi haluka esengosengo awo. Lamʼalambulawo elambu wa lutshumba la wa shima, dimi halelungula. Keli dimi layadiaka la yombo la ndjala ka kasha ndu la elandu.

¹³ Dimi lakati nti: Yee! Khumadiondjo Latuyalaka! Mete, amvutshi wakawatela vati: Nyu hanyudiakema la yombo, kuyanga mvo la ndjala ka kasha. Keli Latuyalaka ayunyusha ki ka mete lu dihuli ne.

¹⁴ Latuyalaka akamvutela ati: Amvutshi watutaka kashi lu akambu wahatayi lu lukumbu lami. Dimi kumbatuma, kumbalakanya, kuyanga nteketa la wo. Vo watunyutelaka akambu wahatayi uma lu enelo ka kashi, uma lʼesakelu ka diwulu, uma lʼengo kʼanyanya ndu uma lu lukesu lʼetema two.

¹⁵ Okone lu dikambu diʼamvutshi ako watutaka akambu wahatayi lu lukumbu lami, wakimi kuntuma, ndu watutaka vati: Yombo la ndjala ka kasha hawuyala lu kete nye, mbatami dimi Latuyalaka nti: Amvutshi ako wayudiakema la yombo la ndjala ka kasha.

¹⁶ Ndu antu watuwutelaka akambu wahatayi, wayukadjema lu esese wa Jerusalema dikambu dia ndjala ka kasha la yombo. Nduku untu ayuyala leko dia mbakhunde: vo, wadiewo, anʼawo wʼapami kuyanga anʼawo wʼamantu. Dimi lajakaluya kolo yawo lu ete awo.

¹⁷ Uwateli diui ne wati: Ashu ami wakediaki asoi ndu la yanyi ndu lʼutshu. Tawuhimboki nkela Ne dia ona umuntu a wudja ami lʼemuma Ambuhumo puta ka wuki, puta ka wulu kahangone.

¹⁸ Naka lambutsho lʼusui, Menyi ku edu wʼantu a waku wakadiakemi la yombo; Naka lamboto lʼusumba, Menyi ku antu wambushila la ndjala, Ne dia ndu umvutshi ndu olombedi watetetaka lu kete Ku waha la ewu.

¹⁹ Undi, we ambutuna Juda pundju? Utema aye ambenga Siona diengekhu? Ukundi akayatokomola wuhu wahateyi nkono? Shu takalungamela ki, keli ololo kundja; Ndu etena kʼekonwelo, ku woma wa mamba wambutunda.

²⁰ Latuyalaka li, shu tambushula kolo yasu Ndu ehedia a washesu, Ne dia shu takakutshela kolo!

²¹ Tutengaki diengekhu ne dia lukumbu laye, Tulanyaki nemo dia kiti ka lutumbu laye. Uho sheki yaye le su, tuyilanyaki.

²² Lʼatei a ditemolatemola dia lu wedja, Kemotshi mbeyaka ndosha mvula? Ulungu mbeyaka ntuma mvula? One latsha akambu ane, aha we Latuyalaka, Unyashungu asu? Shu tatukitshaka elungamelu kasu le ye, Ne dia we katutshaka akambu ane tshe.