Jeremiya 10 - La Bible en Otetela (Bible K'Ekila) 1991

Ditemolatemola la Unyashungu

¹ Nyu khumbu ka Isariyele, Nyulungi aui wanyutela Latuyalaka.

² Latuyalaka kata ati: Tanyukuyaki ditshelu dia wedja, Tanyukaki tulimbitelu ta lʼulungu woma, Ne dia wedja watutukaka woma;

³ Ne dia ditshelu dia wedja dieli anyanya, Antu watokotala utamba lʼukunda, ku utshudi ndjoselaka la kaku.

⁴ Vo watuweteka dimena la fesa la paunyi, Watokokomeka seti la uhumo diaha vo nsukasuka.

⁵ Ditemolatemola ne dieli uku dikoho dia losela, dio hadiutoteketaka; Vo watudiembaka, ne dia dio hadieyi nkendakenda. Tanyudiukaki woma, ne dia dio hadieyi ntsha nduku kolo, Ndu dio kema la wulu wa ntsha ololo.

⁶ Latuyalaka li, nduku ledimi la ye! We eko wuki, ndu lukumbu laye leko wuki uma lu wulu aye.

⁷ We Khumʼekanga ka wedja, akona ahahumbi nkuka woma! We kukuki mbukama woma; Ne dia lʼatei wʼakanga a yimba tshe wa wedja, Ndu lʼatei a waulelu awo tshe, nduku ledimi la ye.

⁸ Ditemolatemola tshe dieli anyanya, diaha la yimba. Wetshelu awo weli paka anyanya. Dio dieli paka etamba.

⁹ Utshudi la utshudi a paunyi wakatshuli fesa Yakawela uma la Tarashishi, la paunyi yʼuma la Ufaza. Eloto wa ditemolatemola waki udima la engingi. Vo tshe weli ulimu wakatshi okolongi a yimba.

¹⁰ Latuyalaka keli Unyashungu a mete. Ndi keli Unyashungu a lumu, khumʼekanga ka pundju. Lamʼukandi kele, kete ndjidimaka, La wedja haweyi memba wutshu wʼududu andi.

¹¹ Nyuwateli nyati: Ditemolatemola diaki kuntunga ulungu la kete, diayushisho uma la kete ndu uma lʼesi ulungu.

¹² Unyashungu kakatungi kete la wulu andi, Ndi kakashikil e andja la yimba yandi. Ndi kakakokola ulungu la ewu kandi.

¹³ Lamʼatundutaka diui, ashi wa lʼulungu watudikitaka. Ndi atukutulaka dinga diʼashi uma la kuma ya kete. Ndi atungadimuyaka ndjadi dikambu dia mvula. Ndi atelaka lopepe uma lu waumbelu andi.

¹⁴ Untu tshe atuyalaka enginya lu yimba yandi. Utshudi a paunyi tshe atutshamake sonyi Uma lʼekishi kandi ka losela, Ne dia dikishi diandi dia lolelola dieli kashi, dio kema la lumu.

¹⁵ Dio dieli anyanya, ulimu wa lukesu. Lamʼayuya elumbwelu, dio diayulanyema.

¹⁶ One leli ukito wa Jakoba, kema uku dio, Ne dia ndi kakatungi diango tshe. Isariyele eli wudja andi wʼukito. Latuyalaka Kanga lulimbilimbi keli lukumbu landi.

Ukiyanu lu Dikambu Dia Elanyelu ka Juda

¹⁷ We ludingami lʼatunyi, Usanganya diango diaye dia ntumba uma lu kete nye.

¹⁸ Latuyalaka kata ati: Enda, dimi luyanga mbikadja asi kete nye lu etena kene. Dimi yahenyahenva dia vo mbuka wutshu wa dikambu ne.

¹⁹ Yee! lambowediawediama la sui ne! Puta kami keko kandji efula. Keli dimi lakati nti: Ohenyohenyo one wambuya le mi, Dieli la mi dia mbemba.

²⁰ Luudu lami la dipema lambulana. Ekodi alo wambuhimbohimbo. Anʼami wankatshiki, vo kema ntu. Dimi nduku lʼuntu leme luudu lami la dipema, Ndu leme apema ami ntu.

²¹ Alami wʼekoko wambuyala dipoka, Hawutumbulaka Latuyalaka. Diako mbahawangone, ndu mbambudiangana ekoko awo tshe.

²² Nyulungi lohokoso la lukumu loso. Lohokoso la wulu loso layayi uma lu leke la ngelʼa kushi, Dia ndjete esumba wa Juda elanyelu, edjaselu ka wambulu.

²³ Latuyalaka li, dimi mbeyaka nti: Untu hakendakendaka lu mbuka uma lu wulu andi! Lamʼatundokendakendaka, ndi ndame heyi nombola ekulu andi.

²⁴ We Latuyalaka, unsuya, keli la sambu kʼololo, Aha lu kele kaye, we utukumbete anyanya.

²⁵ Utshulweli wedja wahatukeyaka ududu aye, Ndu khumbu yahatetaka lukumbu laye, Ne dia vo wakali Jakoba, wakuli, wakumani tshe, Ndu wakalanya edjaselu kandi.