Jashua 9 - La Bible en Otetela (Bible K'Ekila) 1991

Lukesu Asi Ngibiyona

¹ Lamʼakakumi lukumu lako le khumi ya dikanga yʼasi Hiti, yʼasi Amora, yʼasi Kanana, yʼasi Perizi, yʼasi Hiwi ndu yʼasi Jebuse yaki la wedi wa Jorodana lu leke lʼakuna ndu lʼukidi wa lʼumamu tshe wʼAshi a Mediteraneya pulu ndu la Lebanona,

² vo wakasangana, wakadji sheki kame dia ndo la Jashua la asi Isariyele.

³ Keli lamʼakuki asi Ngibiyona, uku akatshela Jashua Jeriko la Ai,

⁴ vo wakatshi lukesu. Vo wakahe paya yʼemusu la atapa wa dikuhu diʼedjedja wakawadji alaka ladiku dia punda yawo.

⁵ Vo wakalote sabata yʼemusu yaki la alaka, ndu ahondo wʼemusu. Vo wakatoshi konga diambuma ndu diaya lungi, dia ndjala pamba ya lokendo.

⁶ Vo wakatshu le Jashua la pangu ka la Ngilingala, ku wakawutela, ndi la asi Isariyele vati: Shu tambuya uma lu kete yʼetali. Kakiane, nyokote la su lusalu.

⁷ Ku asi Isariyele wakakaluya diui vati: Undu, nyu mbidjase lʼatei asu, ukundi ukukisu nkota la nyu lusalu?

⁸ Ku vo wakatela Jashua vati: Shu teko ekambi aye. Ku Jashua akawambula ati: Nyu wa na? Ndu uma lendi uyenyu?

⁹ Ku vo wakûkaluya diui vati: Uma lu kete yʼetali mbuyesu, shu ekambi aye, lu dikambu dia lukumu la Latuyalaka, Unyashungu anyu. Shu takuki lukumu landi la akambu tshe wakandatshi lʼEdjibitu,

¹⁰ ndu uku akandatshela khumi ya dikanga hyendi yʼasi Amora la wedi wa Jorodana; Sihona, khumʼekanga ka Heshibona, la Onga, khumʼekanga ka Bashana, lakadjashi la Ashitorata.

¹¹ Ku dihangamendi diasu la asi kete yasu tshe wakatutela vati: Nyukimeli diango dia nde dia lokendo, nyutshu, kanyutuhumani la wo. Kanyutuwateli nyati: Shu teko ekambi anyu; nyokote la su lusalu.

¹² Shu takunela uma lu kete yasu la konga ne dieki dja, keli kakiane nyendi, dio diambuma, diaya lungi lutu.

¹³ Nyendi, atapa wa dikuhu wa wanu ane, shu takataludisha lakasu weki eyuyu, ku kakiane wambatate. Ahondo asu la sabata yasu yaya emusu etu, ne dia lokendo lʼutali.

¹⁴ Asi Isariyele wakunganela konga diawo, ku vo kumumbula Latuyalaka.

¹⁵ Jashua akayala la wo ki, akakote la wo lusalu, akalakana la wo dia mbatshika la lumu. Ewandji wʼului wakatshibela.

¹⁶ Nshi shatu lʼokongo wʼekotelo kawo ka lusalu, asi Isariyele wakuki lukumu vati: Antu ako asukanyi asu mbewo, vo mbidjase lʼatei asu.

¹⁷ Asi Isariyele wakunela, wakatukuma lʼesumba awo lushi la satu. Esumba awo ene: Ngibiyona, Kefira, Berote la Kiriyate-Jarima.

¹⁸ Asi Isariyele kumbadiaka, ne dia ewandji wʼasi Isariyele wakatshibela le Latuyalaka, Unyashungu wa Isariyele, dia mbatshika la lumu. Ku ului tshe wʼantu wakangunangunela ewandji ako.

¹⁹ Keli ewandji tshe wakakaluya ului tshe wʼantu diui vati: Shu takatshibela le Latuyalaka, Unyashungu wa Isariyele; okone nyu hanyeyi mbananda.

²⁰ Keli tayatshela okone, ndu tayatshika la lumu, ne dia kele ka Latuyalaka katukuyala le su, ne dia etshibelu kakatatshibela.

²¹ Vo wayu-tshikala la lumu, mbakawatela ewandji. Keli vo wayuyala amunyi wa kunyi la amembi wʼashi wʼasi Isariyele tshe, uku akawatela ewandji.

²² Jashua akawaeti, akawambula okone ati: Okoko wana wakanyatukesi, wakanyatutela nyati: Shu teko asi etali lamʼudjashinyu lʼatei asu?

²³ Kakiane nyambudjama mananu, pundju nyu hanyumoki lu lohombo la munaka kunyi la membaka ashi wa luudu la Unyashungu ami.

²⁴ Ku vo wakakaluya Jashua diui vati: Wakatutela uku akadjangela Latuyalaka, Unyashungu aye, ukambi andi Mose dia nyusha kete tshe, la dia ndjaka akanga a kete tshe uma la ntundu kanyu. Ne dia shu takanyuki woma shad: Tutukudiakema, diako mbakatatshi dikambu diku.

²⁵ Kakiane shu teko lʼanya aye: ututsheli uku alangaye ndu uku ayuyala ololo lu ashu aye.

²⁶ Ndi akatshela osoku, akashimbela uma lʼanya wʼasi Isariyele. Okone vo kumbadiaka.

²⁷ Ku Jashua akawasha ulimu wa muna kunyi la memba ashi wʼului wʼantu, ndu wʼediakelu ka Latuyalaka, lu dihuli diayundosonola. Elimu ako mbatuwutshaka edja ndu elo.