Jashua 7 - La Bible en Otetela (Bible K'Ekila) 1991

Kolo ka Akana

¹ Asi Isariyele wakayala lʼuhedia lamʼakawadji ashu lu diango diakakimwama. Akana, onʼa Karami, onʼa Zabedi, onʼa Zara, uma lu diuhu dia Juda, akose engo kemotshi lʼatei a diango diakakimwama. Ku kele ka Latuyalaka akafulanela le asi Isariyele.

² Jashua akatumi antu uma la Jeriko utsha la Ai keli lasuki la Bete-Avene, lu leke lʼehutwelu ka unya la Betele; akawatela ati: Nyutshu la ntukemba kete. Ku antu ako wakatshu la ntukemba Ai.

³ Vo wakakalula le Jashua, wakayuwutela vati: Kema uhumba wʼantu tshe ntsho leko. Apami nunu pendi kana nunu satu nkukaka ndo lʼasi Ai. Tenyaki wudja tshe pa, ne dia vo weko paka djui ya tshitshe.

⁴ Okone lasuki lʼapami nunu satu wakatshu, keli vo wakatulawo asi Ai.

⁵ Asi Ai wakadiaki lasuki lʼantu akumi asatu la asamalu, wakayelana la wo uma lʼeotwelo pulu ndu la Shebarima, watadiaki lamʼakawatahuloka. Ku alimba wʼantu wakakomo, etema awo wakayala ashi atu.

⁶ Jashua akatshatsha ahondo andi, akako ekhukhumadi la ntundu kʼoshete wa Latuyalaka. Ndi akakolama edja ndu dikolo, ndi la dihangamendi dia Isariyele. Vo wakatela kete lʼete.

⁷ Ku Jashua akaleli ati: Ayii! Khumemi Latuyalaka, dikambu kuna diakayatehuya wudja one Jorodana aia ndjutukimo lʼanya wʼasi Amora, dia vo ntudiaka? Utututshikala la wedi wa Jorodana li!

⁸ Khumemi li! kukukimi mvuta, lamʼakuki usi Isariyele atunyi awo ekongo!

⁹ Lamʼayuka asi Kanana la asi kete nye tshe lukumu lone, vo wayutudinga, wayushisha lukumbu lasu la kete. Ku ngandi ayuyutsha dia lukumbu laye la wuki?

¹⁰ Ku Latuyalaka akatela Jashua ati: Emali. Na dikambu dietamiye ekhukhu-madi okone?

¹¹ Isariyele wakatshi kolo; wakadiaki sheki yakamadji la wo. Vo wakose diango dimotshi uma lʼatei a diango diakakimwama; wakadivi, wakatshi lukesu, wakadishe lʼatei a diango diawo.

¹² Diako mbaheyi asi Isariyele memala la ntundu kʼatunyi awo. Vo wakuki atunyi awo ekongo, ne dia vo wakayala engo kʼelanyelu. Dimi haleyi ndjala la nyu ntu, tshikima nyu nyambulanya diango diku diakakimwama uma lʼatei anyu.

¹³ Emali, ukidia antu; uwateli wati: Nyuyakidia dikambu dia lui, ne dia Latuyalaka, Unyashungu wa Isariyele, kata ati: Isariyele li, diango diakakimwama tadiuyalaki lʼatei anyu. Nyu hanyeyi memala la ntundu kʼatunyi anyu, tshikima nyu nyambutanyisha diango diku diakakimwama uma lʼatei anyu.

¹⁴ Kanyuyi la pindju uku wauhu anyu. Ku diuhu diayunda Latuyalaka diayuya uku khumbu yawo. Ku khumbu kayunda Latuyalaka, wayuya uku mvudu yawo. Ku luudu layunda Latuyalaka, wayuya pami la pami.

¹⁵ Ku one lakose diango diakakimwama, ayutshumbama lu dja, ndi la kene tshe keli la ndi, ne dia ndi akalanya sheki ya Latuyalaka, ndu ndi akatshi dikambu dia sonyi lu Isariyele.

¹⁶ Ku Jashua aketo kʼolomo la pindju; akasukanya asi Isariyele uku wauhu awo. Ku diuhu dia Juda diakandama.

¹⁷ Ndi akasukanya diuhu diako. Ku khumbu ka Zera kakandama. Ndi akasukanya luudu la luudu la lu khumbu kako. Ku Zabedi akandama.

¹⁸ Ndi akasukanya pami la pami ka lu luudu landi, ku Akana, onʼa Karami, onʼa Zabedi, onʼa Zera, uma lu diuhu dia Juda, akandama.

¹⁹ Ku Jashua akatela Akana ati: Onʼami, lambukosengasenga nti: Utumbuli Latuyalaka, Unyashungu a Isariyele, uwanduli. Kakiane umvuteli dikambu diakayatshi, tumbisheki.

²⁰ Akana akûkaluya diui ati: Mete, dimi lakatshela Latuyalaka, Unyashungu wa Isariyele, kolo. Dimi lakatshi okone:

²¹ Lamʼakamenyi koti dia dimena lʼatei a diango dia dimbu diʼuma la Shinare, shekele kama hyendi ya fesa, la etenyi ka paunyi keli la wutshu wa shekele akumi atanu, ku dimi lakadikomiya, lakadiose. Ulungi, diango diako nkhundama lu kete lʼatei a luudu lami la dipema, ku fesa la tshina.

²² Jashua akatumi antu utsha lu luudu la dipema la Akana, ku vo wakatutana diango diako diukhundami lu luudu landi, ku fesa la tshina.

²³ Vo wakatundja diango diako uma lu luudu, wakadiela le Jashua la asi Isariyele tshe, ku wakatudikitsha la ntundu ka Latuyalaka.

²⁴ Jashua la asi Isariyele tshe wakose Akana onʼa Zera la fesa, koti, etenyi ka paunyi, ndu anʼandi wʼapami la wʼamantu, ngombe yandi, punda ya-ndi, ekoko andi, luudu landi la dipema, ndu tshe kaki la ndi, wakatole lʼukidi wʼAkora.

²⁵ Jashua akawumbula ati: Ukundi akayatela ohenyohenyo? Elo, Latuyalaka ambukela ohenyohenyo. Ku ului tshe wa Isariyele wakawuki ave. Vo wakatshumbi, wakawauki ave.

²⁶ Vo wakakitsha ului a wuki wʼave ladiku dia udu wa Akana. Vo weko edja ndu elo. Ku Latuyalaka akumo kele kandi ka wulu. Uma lu dikambu diako, mbatuwetaka dihuli diako edja ndu elo vati: Ukidi wʼAkora (kitshimudi ati: Ohenyohenyo).