Jashua 6 - La Bible en Otetela (Bible K'Ekila) 1991

Elembiamelu ka Jeriko

¹ Kuki yʼasuku wa Jeriko yakadihami khu uma lʼetei ndu uma lʼandja lu dikambu diʼasi Isariyele: nduku untu lakatumbi, nduku lakoto.

² Ku Latuyalaka akatela Jashua ati: Enda, lambukimo Jeriko, khumʼekanga kawo, la andoshi andi wa ta wa wulu lʼanya aye.

³ Nyu andoshi wa ta, kanyutshimbi usumba one etena otoi. Kanyutshi osoku nshi shamalu.

⁴ Elombedi esambeli kawukimeli amama wa seki ya waun wʼekoko la ntundu kʼoshete. Lu lushi lʼesambeli, kanyutshimbi usumba tena esambeli, elombedi kawutadaka amama.

⁵ Lamʼayuwuda amama shamanya, ndu lamʼayuyuka lundju lʼamama, antu tshe kawuhangohango wulu. Ku eheli ka lukumbu lʼusumba Kayunyuko mbulukutu. Ku tyu tshe untu lʼuntu ayumbela uma lu dihuli diemadindi.

⁶ Ku Jashua, onʼa Nuna, aketi elombedi, akawatela ati: Nyembe oshete wa sheki, la elombedi esambeli wakimeli amama wa seki ya waumi wʼekoko la ntundu kʼoshete wa Latuyalaka.

⁷ Ku ndi akatela antu ati: Nyeso utsha la ntundu. Nyutshimbi usumba wane wukimedi dihumo dia ta, wete la ntundu kʼoshete wa Latuyalaka.

⁸ Okone lamʼakashidiya Jashua mvutela antu akambu aso, elombedi esambeli wakatakimedi amama esambeli wa seki ya waumi wʼekoko la ntundu ka Latuyalaka, wakatakendakendaka watadi amama ako. Ku oshete wa sheki wa Latuyalaka wakatatshol aka lʼokongo awo.

⁹ Apami wakakimedi dihumo dia ta waketi la ntundu kʼelombedi watadi amama. Ku andoshi wa ta akina wakatayelaka oshete lamʼakatadaka elombedi amama.

¹⁰ Jashua akatela antu ati: Tanyuhangohangoki, tanyediaki diui kuyanga nteketa, edja ndu lushi layumunyutela nti: Nyuhangohango! Ku nyu nyayuhangohango.

¹¹ Ndi akatshimbia oshete wa Latuyalaka usumba etena otoi, ku vo wakakalula lu pangu, wakatetama leko lʼutshu.

¹² Jashua aketo kʼolomo la pindju, ku elombedi wakembe oshete wa Latuya-laka.

¹³ Elombedi esambeli akanga wʼamama wa seki ya waumi wʼekoko wakatatshokaka la ntundu kʼoshete wa Latuyalaka, wakatadaka amama. Apami waka-kimedi dihumo dia ta wakatatshokaka la ntundu kawo, ku andoshi wa ta akina wakatayelaka oshete wa Latuyalaka lamʼakatadaka elombedi amama.

¹⁴ Ndu lushi la hendi, vo wakatshimbi usumba etena otoi, ku wakakalula lu pangu. Vo wakatshi osoku nshi shamalu.

¹⁵ Lushi lʼesambeli, vo waketo kʼolomo la hyutshihutshi: wakatshimbi usumba wuhu ako tena esambeli. Lushi lako lame mbakawatshimbi usumba tena esambeli.

¹⁶ Lamʼakawatshimbi usumba etena kʼesambeli, elombedi wakadi amama. Ku Jashua akatela antu ati: Nyuhangohango! ne dia Latuyalaka ambunyusha usumba.

¹⁷ Usumba one wayukimwama le Latuyalaka, ndu antu ndu diango tshe dieli loko. Paka Rahaba, umuntu kanga luseka, la wane tshe weli kame la ndi lu luudu atu mbayutshikala la lumu, ne dia ndi akashe akendji wakatatumi.

¹⁸ Keli nyu nyewo diango diambukimwama dia nanyema, ne dia lamʼambunyudikimo, nyutukuyosa engo kemotshi lʼatei wa diango diambukimwama, ku nyu ndjete pangu ka Isariyele engo kʼelanyelu, la nkiela ohenyohenyo.

¹⁹ Keli fesa tshe, paunyi, diango diʼehotela la dia mbulu, diambukimwama le Latuyalaka, diayoto lu eumbelu ka Latuyalaka.

²⁰ Okone antu wakahangohango, ku elombedi wakadi amama. Lamʼakuki antu lundju lʼamama, antu wakahangohango wulu. Ku eheli ka lukumbu lʼusumba kakanyuko. Ku antu tshe, untu lʼuntu akambela lu dihuli diakandemadi. Vo wakoto lʼusumba, wakolembia.

²¹ Vo wakalanya usumba, wakashili diango tshe ushiki, wakadiaki apami la amantu, ana la esumbi, ngombe, ekoko ndu punda la tombo.

²² Jashua akatela apami ahendi wakayotopa kete ati: Nyoto lu luudu la umuntu kanga luseka nyutundja lʼandja, ndi la wane tshe weli la ndi, uku ikanyutshibela.

²³ Ku elongo wʼapami ako wakayi dia ndjukemba kete, wakatundja Rahaba, shi la nyangu, anangu la kene tshe kaki la ndi. Vo wakatundja wane wuto la ndi tshe. Vo wakayakitsha lʼandja a pangu ka Isariyele.

²⁴ Ku vo wakatshumbi usumba la diango tshe laki loko. Tshikima, fesa, paunyi, la diango tshe diʼehotela la dia mbulu, mbakawotshiya lu eumbelu ka luudu la Latuyalaka.

²⁵ Keli Jashua akahandja Rahaba, umuntu kanga luseka, khumbu ka shi, la kene tshe kaki la ndi. Ku Rahaba akayudjase lʼatei wa Isariyele edja ndu elo, ne dia ndi akashe akendji wakatumi Jashua dia ntukemba Jeriko.

²⁶ Jashua akadji etshi lu etena kako ati: Mananu kayali le untu layulula usumba one, Jeriko, la ntundu ka Latuyalaka. Lamʼayunduka atshina awo, onʼandi lʼenundu kavu. Ndu lamʼayundudja kuki yawo, onʼandi la pami la djihelu kavu.

²⁷ Okone Latuyalaka aki la Jashua, lukumu landi lakadiangana lu kete tshe.