Jashua 4 - La Bible en Otetela (Bible K'Ekila) 1991

Ave Dikumi la Ahendi Wakawose Uma lu Jorodana

¹ Lamʼakashili wudja tshe nteho Jorodana, Latuyalaka akatela Jashua ati:

² Osonole apami dikumi la ahendi, pami otoi uma lu diuhu la diuhu.

³ Uwateli wati: Nyose ave dikumi la ahendi uma lu dihuli diakashikike elombedi ekulu kʼatei wa Jorodana. Nyuwaembe, kanyutakitsha lu dihuli diayunyutuhanga lʼutshu wʼelo.

⁴ Ku Jashua aketi apami ako dikumi la ahendi wakandasonola uma lʼatei wʼasi Isariyele, pami otoi uma lu diuhu la diuhu.

⁵ Ku ndi akawatela ati: Nyeti la ntundu ka oshete wa Latuyalaka, Unyashungu anyu, kʼatei wa Jorodana. Untu lʼuntu embe dive dimotshi lu diheka diandi, uku efula ka wauhu wʼasi Isariyele,

⁶ dia dikambu ne ndjala djimbitelu le nyu. Lu nshi yayayi, Lamʼayunyumbula anʼanyu vati: Na djimbitelu yakanyakitsha ave ane?

⁷ Ku nyu nyayakaluya diui nyati: Ashi wa Jorodana wakatana la ntundu kʼoshete wa sheki wa Latuyalaka. Lamʼaketi oshete ako lʼatei wa Jorodana, ashi wa Jorodana wakahimbo pi. Okone ave ane mbeli euhwelu ka dikambu diako pundju le asi Isariyele.

⁸ Asi Isariyele wakatshi uku akawatela Jashua. Vo wakatongona ave dikumi la ahendi umakʼatei wa Jorodana uku akatela Latuyalaka Jashua, uku efula ka wauhu wʼasi Isariyele. Vo wakawaembe, wakatakitsha lu dihuli diakawatuhanga lʼutshu.

⁹ Jashua akateme ndu ave dikumi la ahendi kʼatei wa Jorodana, lu dihuli diakashikike elombedi wakatembaka oshete wa sheki ekulu. Vo weko leko edja ndu elo.

¹⁰ Elombedi wakatembaka oshete, wakemala kʼatei wa Jorodana edja ndu lamʼakashili akambu tshe wakadjangela Latuyalaka Jashua dia mbatela, uku akatatedi Mose Jashua. Antu wakateho esadi esadi.

¹¹ Lamʼakashili antu tshe nteho, oshete wa sheki wa Latuyalaka la elombedi wakateho la ntundu kʼantu.

¹² Asika Rubena, asi Ngada, la etenyi ka hendi ka diuhu dia Manase waketi la ntundu kʼasi Isariyele wukimedi dihumo dia ta, uku akatawadjangedi Mose.

¹³ Lasuki lʼapami nunu akumi anei wakumedi dihumo dia ta, wakateho la ntundu ka Latuyalaka utsha lu ta, lu mandja ya Jeriko.

¹⁴ Lushi lako, Latuyalaka akedia Jashua lu ashu wa Isariyele tshe. Ku vo wakawuki woma, uku akawukaka Mose lu nshi ya lumu landi tshe.

¹⁵ Latuyalaka akatela Jashua ati:

¹⁶ Uteli elombedi wembe oshete wʼomenyi, watumbi uma lu Jorodana.

¹⁷ Ku Jashua akatela elombedi ati: Nyutumbi uma lu Jorodana.

¹⁸ Okone elombedi wakatembaka oshete wa sheki wa Latuyalaka wakatumbi uma lʼatei wa Jorodana, ku kamʼakawakitsha ekulu awo lʼukungu, ashi wa Jorodana wakakalula lu dihuli diawo; wakaluli lu ekenge awo tshe uku akiwo ntundu.

¹⁹ Antu wakatumbi uma lu Jorodana lu lushi la dikumi la ngondo ka ntundu, wakahangi la Ngilingala, la kuma ka Jeriko, lu leke lʼehutwelu ka unya.

²⁰ Jashua akeme ave ako dikumi la ahendi wakawatoshi uma lu Jorodana la Ngilingala.

²¹ Ku ndi akatela asi Isariyele ati: Lamʼayumbulaka ana washewo vati: Na djimbitelu yʼave ane na?

²² Kanyuwalimbitshiyaki nyati: Asi Isariyele wakateho Jorodana nye lu kete yʼufumbu.

²³ Ne dia Latuyalaka, Unyashungu anyu, akumia ashi wa Jorodana la ntundu kanyu edja ndu lamʼakanyateho, uku akandumia ashi wʼUduwa a Tilili la ntundu kasu, edja ndu lamʼakatashili nteho shu tshe,

²⁴ dia wedja tshe wa la kete mbeya vati: Lunya la Latuyalaka leko wulu, dia nyu mbuka Latuyalaka, Unyashungu anyu woma pundju.