Jashua 23 - La Bible en Otetela (Bible K'Ekila) 1991

Daku dia Jashua le Wudja

¹ Nshi efula yaketi uma lamʼakasha Latuyalaka asi Isariyele mumuya uma le atunyi awo tshe wakadingi. Lamʼakayala Jashua usumbi a lukusumbi,

² ndi aketi asi Isariyele tshe: dihangamendi diawo, ete wa khumbu yawo, embadi awo la elombodi awo wa ta. Ndi akawatela ati: Dimi laya usumbi a lukusumbi.

³ Nyu nyakenyi akambu tshe wakatshela Latuyalaka, Unyashungu anyu, wedja ene tshe waki la ntundu kanyu, ne dia Latuyalaka, Unyashungu anyu, kakatanyolwelaka ta.

⁴ Nyendi, lambunyusha wedja ene wutshikadi kame la kete ya wedja wakamashili ushiki, uma la Jorodana pulu ndu lʼAshi a Mediteraneya lʼedjelu, lu eukem kʼuwali, dia ndjala etenyi kʼukito ka wauhu anyu.

⁵ Latuyalaka, Unyashungu anyu, ayuwatslianya, ayuwanya uma la ntundu kanyu. Ku nyu nyayukita kete yawo, uku akandanyutela.

⁶ Okone nyuyali la dihunga, dia nama la ntsha aui tshe wufundami lu buku dia elembe wa Mose. Tanyetolaki lu lunya la pami kana la lomoso.

⁷ Tanyosohanaki la wedja ene wambutshikala lʼatei anyu. Tanyudimulaki kumbu ya ditemolatemola diawo, kuyanga ditshiba. Tanyuditemolaki, tanyudikhusamelaki.

⁸ Keli nyumamemaki Latuyalaka, Unyashungu anyu, uku akanyatshaka ndu uku atunyutshaka edja ndu elo,

⁹ ne dia Latuyalaka akatshanya wedja wa waki ndu wa wulu uma la ntundu kanyu. Nduku untu akeyi memala la ntundu kanyu edja ndu elo.

¹⁰ Untu otoi lʼatei anyu mbeyaka mbitshanya antu kinunu, ne dia Latuyalaka, Unyashungu anyu, atunyolwelaka ta, uku akandanyutela.

¹¹ Okone nyendi ololo, dia nyu mbuka Latuyalaka, Unyashungu anyu, ngandji.

¹² Keli naka nyu nyayukadimo, nyayumamema wedja ene wambutshikala lʼatei anyu, ndu naka nyu nyayutshuka anʼawo la vo ntshuka anʼanyu,

¹³ kanyeyi nyati: Latuyalaka, Unyashungu anyu, hutetemala nyutshanyia wedja ene uma la ntundu kanyu. Keli vo wayuyala otei la djunga le nyu, ohehela lu ekongo anyu la atende lu ashu anyu, edja ndu lamʼayunyushila lu kete yʼololo nye, yakanyusha Latuyalaka, Unyashungu anyu.

¹⁴ Enda, dimi luyanga ntsho lu mbuka katutshokaka antu tshe. Nyu mbeyaka lʼetema anyu ndu lu nyumu yanyu tshe nyati: Nduku dikambu diakati Latuyalaka, Unyashungu anyu, lu dikambu dianyu, diahatatshama.

¹⁵ Uku akashidiyama akambu ane wʼololo tshe le nyu, uku akanyutela Latuyalaka, Unyashungu anyu, osoku mbayundunyutumela akambu tshe wa kolo, edja ndu lamʼayunyushila lu kete yʼololo yakandanyusha.

¹⁶ Naka nyu nyayulanya sheki yakanyudjela Latuyalaka, Unyashungu anyu, ndu naka nyu nyayutotemola ditemolatemola la dikusamela, kele ka Latuyalaka kayuyala wulu le nyu. Ku nyu nyayushila esadi lu kete yʼololo nye, yakandanyusha.