Jashua 20 - La Bible en Otetela (Bible K'Ekila) 1991

Esonwelo ka Esumba wʼEshamelu

¹ Latuyalaka akatela Jashua ati:

² Uteli asi Isariyele wati: Nyuli-mbitshiya antu esumba wʼelawelu uku akamanyudiangela le Mose,

³ dia undjakanyi layudiaka untu lakindi kunkanela ndjaka, mbeya ndawo leko; dia esumba ako ndjala ahuli wʼeshamelu uma le osomboyishi wa dikila.

⁴ Undjakanyi ayulawo utsha lʼusumba omotshi wʼeshamelu. Ndi ayutemala lʼeotwelo kʼusumba; ayutusanyia dihangamendi diʼusumba dikambu diandi. Ku vo wayulungulalʼusumba, wayuwusha dihuli dia ndi mbidjase lʼatei awo.

⁵ Naka osomboyishi wa dikila ayuyelana la ndi, dihangamendi tawukimoki lʼanya andi. Ne dia ndi kundjaka unyandi la ukunda, ndu kumbuhetsha ntundu.

⁶ Ndi kadjase lʼusumba ako edja ndu lamʼayuvo olombedi wa ladiku wa lu nshi ku, ku ndi ndjemala la ntundu kʼului wʼantu. Lʼokongo diku, undjakanyi ayumo uma lʼusumba, lene akandalawo, ayukalula lʼusumba awo, ndu lu luudu landi.

⁷ Vo wdkakidia Kedeshe ka la Ngalili, lu leke lʼakuna wa la Nafetali, Shekeme lu leke lʼakuna wa Efarayima, la Kiriyate-Areba (ketawo vati: Heberona) lu leke lʼakuna wa la Juda.

⁸ Ku lu leke lʼehutwelu la Jeriko, la wedi wa Jorodana, vo wakasonola Bezere, lʼusui wa shenga, lu kete ya bamubamu, uma lu diuhu dia Rubena, Ramota ka la Ngiliyade, uma lu diuhu dia Ngada; la Ngolana ka la Bashana, uma lu diuhu dia Manase.

⁹ Oso aki esumba wakawasonwela asi Isariyele tshe ndu ongendangenda ludjashi lʼatei awo, dia untu tshe layudiaka untu lakindi kunkanela, mbeya ndawo leko, ne dia osomboyishi a dikila atukudiaka la ntundu ndi atemala la ntundu kʼului wʼantu.