Jashua 19 - La Bible en Otetela (Bible K'Ekila) 1991

¹ Etshi ka hendi kakandama uwali le Simeyona, ne dia diuhu dia Simeyona, uku khumbu yawo. Etenyi kawo kʼukito kaki lʼatei wa etenyi kʼukito ka diuhu dia Juda.

² Etenyi kawo kʼukito kaki Bere-Sheba, Sheba, Molada,

³ Hazara-Shuala, Bala, Azeme,

⁴ Eletolada, Betule, Horoma,

⁵ Zikilange, Bete-Marakabota, Hazara-Susa,

⁶ Bete-Lebaota, la Sharuhena: esumba dikumi la esatu, kame la ngelu yawo.

⁷ Ene-Rimona, Etere la Ashana: esumba enei, kame la ngelu yawo:

⁸ kame la ngelu tshe yaki lasuki lʼesumba ako, pulu ndu la Balata-Bere, Ramata ka la Nengebe. Oso aki etenyi kʼukito ka diuhu dia Simeyona, uku khumbu yawo.

⁹ Etenyi kʼukito ka diuhu dia Simeyona kakosama uma lʼetenyi kʼukito ka diuhu dia Juda. Etenyi kʼukito ka diuhu dia Juda kakaleki, mba kose diuhu dia Simeyona etenyi kawo kʼukito, uma lʼetenyi ka diuhu dia Juda.

¹⁰ Etshi ka satu kakandama uwali le diuhu dia Zebuluna, uku khumbu yawo. Kete yawo yakakumi la Sarida.

¹¹ Ku ulelu awo wakambela utsha lʼedjelu utsha la Marala, ku vo ntukuma la Dabeshete, ndu lʼokedi watokelaka la ntundu ka Jokeneame.

¹² Vo wakakadimo uma la Sarida utsha lʼehutwelu, edja ndu lʼulelu wa Kisolote-Tabora, ku vo n beta utsha la Daberate, ku mumbela utsha la Jafia.

¹³ Uma leko, vo waked utsha lʼehutwelu lu Ngata-Hefere, lu Ete-Kazina, ku vo nsimbo utsha a Rimona, ku nteta edja ndu la Nea.

¹⁴ Vo wakakadimo lu leke la ngelʼa kushi utsha la Hanatona, wakatukume lʼukidi wa Ifita-Ele;

¹⁵ la Katata, Nahalala, Shimirona, Idala, la Betelehema: esumba dikumi la ehendi, kame la ngelu yawo.

¹⁶ Esumba eso, kame la ngelu yawo, mbaki etenyi kʼukito ka diuhu dia Zebuluna, uku khumbu yawo.

¹⁷ Eteny ka nei kakandama uwali le diuhu dia Isakara, uku khumbu yawo.

¹⁸ Kete yawo yaki Jezerele, Kesulota, Shunema,

¹⁹ Hafarayima, Shiona, Ana-harata,

²⁰ Rabita, Kishiyona, Ebeza,

²¹ Remete, Ene-Nganina, Ene-Hada, ndu la Bete-Pazeza.

²² Ulelu wakatukuma la Tabora, Shahazuma, ndu la Bete-Shemeshe, ku vo ntukume lu Jorodana: esumba dikumi la esamalu, kame la ngelu yawo.

²³ Esumba eso, kame la ngelu yawo, waki etenyi kʼukito ka diuhu dia Isakara, uku khumbu yawo.

²⁴ Etshi ka tanu kakandama uwali le diuhu dia Ashere, uku khumbu yawo.

²⁵ Kete yawo yaki Helekate, Hali, Betena, Akishafu,

²⁶ Alameleke, Amada ndu Mishala; ku vo mbeta utsha lʼedjelu lu Karamele, la Shihore-Libinate.

²⁷ Vo wakakadimo utsha lʼehutwelu lu Bete-Dagona, ku vo ntukuma la Zebuluna ndu lʼukidi wa Ifita-Ele, la ngelʼa kushi ka Bete-Emeke la ka Neyele, ku vo nsimbo lu leke la ngelʼa kushi utsha la Kabulu,

²⁸ Eberona, Rehobe, Hamona, la Kana, edja ndu la Sidona ka Wuki.

²⁹ Ulelu wakakadimo utsha la Rama, wakatukuma la Tire, usumba wakadingami la lukumbu la wulu. Ku vo mbeta utsha la Hosa, ku ntukume lʼAshi a Mediteraneya; la Mahalaba, Akizibe,

³⁰ Uma, Afeka la Rehobe: esumba akumi ahendi la ehendi, kame la ngelu yawo.

³¹ Esumba eso, kame la ngelu yawo, mbaki etenyi kʼukito ka diuhu diʼAshere, uku khumbu yawo.

³² Etenyi ka samalu kakandama uwali le diuhu dia Nafetali, uku khumbu yawo.

³³ Ulelu awo waketi uma la Helefu, uma lʼutamba wʼulungu wa la Zananima, Adami-Nekebe, ndu lu Jabinele, edja ndu la Lakuma, ku vo ntukume lu Jorodana.

³⁴ Vo wakatukadimo utsha lu leke lʼedjelu la Azenote-Tabora. Uma leko, ku vo ntutsho utsha la Hukoka, ku vo ntukuma la Zebuluna, lu leke la diku dia kushi, lʼAshere, lu leke lʼedjelu, ndu la Juda, lu leke lʼehutwelu utsha la Jorodana.

³⁵ Esumba wakadingami khumbu ene: Zidime, Zere, Hamata, Rakata, Kinerete,

³⁶ Adama, Rama, Hazora,

³⁷ Kedeshe, Ederei, Ene-Hazora,

³⁸ Yirona, Mingidala-Ele, Horema, Bete-Anata la Bete-Shemeshe: esumba dikumi la divwa, kame la ngelu yawo.

³⁹ Esumba eso, kame la ngelu yawo mbaki etenyi kʼukito ka diuhu dia Nafetali, uku khumbu yawo.

⁴⁰ Etenyi kʼesambeli kakandama uwali le diuhu dia Dane, uku khumbu yawo.

⁴¹ Kete yawo yʼukito yaki: Zora, Eshitaole, Ire-Shemeshe,

⁴² Shalabina, Aidjalona, Itila,

⁴³ Elona, Timina, Ekerona,

⁴⁴ Eleteke, Ngibetona, Balata,

⁴⁵ Jehude, Bene-Berake, Ngata-Rimona,

⁴⁶ Me-Jarakona ndu Rakona, kame la kete yeli lasuki la Jopa.

⁴⁷ Lamʼakamo kete yʼasi Dane uma tʼanya awo, vo wakatshu dia ntolo lʼasi Lesheme; wakatadiaka la tombo, wakatuyala akanga a kete, ku wakatudjase loko. Ku vo wakole Lesheme lukumbu vati: Dane, lukumbu la shewo.

⁴⁸ Esumba eso, kame la ngelu yawo, mbaki etenyi kʼukito kʼasi Dane, uku khumbu yawo.

⁴⁹ Lamʼakawashidiya nkahanya kete yʼekito uku elelu ayo, asi Isariyele wakasha Jashua, onʼa Nuna etenyi kandi kʼukito kʼatei awo.

⁵⁰ Vo wakawusha usumba wakandalombe, uku aki didjangu dia Latuyalaka. Usumba ako waki Timinate-Sera, waki lʼakuna wa Efarayima. Ndi akahiki usumba, akadjase loko.

⁵¹ Oso aki tenyi diʼekito diakakahanya olombedi Eleazara, Jashua, onʼa Nuna, la ete a wedja wʼasi Isariyele. Tenyi diako diʼekito diakakahanyema lu eukelu kʼuwali la Shilo la ntundu ka Latuyalaka, lʼeotwelo ka luudu lʼesanga-nelu la dipema. Osoku mbakawashidiya nkahanya kete.