Jashua 18 - La Bible en Otetela (Bible K'Ekila) 1991

Ekahanyelu ka Kete le Wauhu Wakatshikala

¹ Ului tshe wʼasi Isariyele wakamote kame la Shilo, wakahiki luudu lʼesanganelu la dipema leko. Vo wakalembia kete.

² Laso ku wauhu esambeli wʼasi Isariyele watakundja etenyi kawo kʼukito.

³ Jashua akambula asi Isariyele ati: Edja ndu kaandi ayunyukimo utshimbutshimbu dia mbosa kete yakanyusha Latuyalaka, Unyashungu a washenyu?

⁴ Nyosonole apami asatu asatu uma lu diuhu la diuhu, dimi kandjatumi. Vo kawuneli, kawutukinduli kete, kawutusanguli usatu wʼekahanyelu, kawuyumvuteli.

⁵ Kawuyikahanya lu beke esambeli. Asi Juda wayudja la wo ulelu la diku dia kusbi, la khumbu ka Josefu wayudja la wo ulelu la ngelʼa kushi.

⁶ Kanyusanguli kete lu beke esambeli; kanyumbela usatu ako. Dimi kandjunyukia uwali la ntundu ka Latuyalaka, Unyashungu asu.

⁷ Keli asi Lewi hawuyala la etenyi kʼukito lʼatei anyu, ne dia ulimu wʼolombedi wa Latuyalaka mbeli etenyi kawo kʼukito. Asi Ngada, la asi Rubena la etenyi ka hendi kʼasi Manase, wakatalungudi etenyi kawo kʼukito la wedi wa Jorodana, lu leke lʼehutwelu, kakatawasha Mose, ukambi wa Latuyalaka.

⁸ Lamʼakayangi apami ako munela dia ntusangula usatu wa kete, Jashua akawatela ati: Nyutshu, kanyutukinduli kete. Kanyutusanguli usatu ayo; kanyukaluli le mi. Dimi kandjunyukia uwali la ntundu ka Latuyalaka lindu, la Shilo.

⁹ Apami ako wakatshu, wakatukindula kete, wakasangula usatu ayo lu buku, wakayikahanya lu beke esambeli uku esumba ayo. Vo wakakalula la pangu le Jashua la Shilo.

¹⁰ Ku Jashua akawaukia uwali la ntundu ka Latuyalaka la Shilo. Jashua akakahanya asi Isariyele kete, akasha diuhu la diuhu etenyi kawo.

¹¹ Etenyi kʼukito kakandama uwali le asi Bendjamina, uku khumbu yawo, kaki lʼasi etenyi ka diuhu dia Juda la etenyi ka diuhu dia Josefu.

¹² Ulelu awo wa lu leke la ngelʼa kushi wakatatela uma la Jorodana, ku vo manda la ngelʼa kushi ka Jeriko utsha lu leke lʼakuna lu leke lʼedjelu, ku vo ntukume lʼusui wa shenga wa Bete-Avena.

¹³ Ku vo ndjukadimo utsha la diku dia kushi lʼumamu wa Luza (letawo vati: Betele); ku vo ndjuhulo la Atarota-Adara, lʼukungu weli la diku dia kushi dia la Ngele a Bete-Horona.

¹⁴ Ulelu wakasimbo lu leke lʼedjelu, ku vo ntukadimo utsha la diku dia kushi diʼukungu welanedi la Bete-Horona; ku vo ntukume la Kiriyate-Bala (ketawo vati: Kiriyate-Jearima), usumba wʼasi Juda. Osoku mbaki ulelu awo lu leke lʼedjelu.

¹⁵ Lu leke la diku dia kushi, ulelu wakatatela uma la kuma ka Kiriyate-Jearima. Ku vo mbeta uma leko utsha lʼEferona edja ndu lu eteko kʼAshi a Nefetoa.

¹⁶ Vo wakahulo la kuma kʼukungu welanedi la ukidi wa onʼa Hinome, lu ukidi wʼasi Refayima la ngelʼa kushi, ku vo ndjuhulo lʼukidi wa Hinome, lu leke la diku dia kushi dia Jebuse, edja ndu la Ene-Rongele.

¹⁷ Vo wakelela la ngelʼa kushi utsha la Ene-Shemeshe, ku la Ngehʼlote, kelanedi la edelu ka Adumima, ku vo ntuhulo la dive dia Bohana, onʼa Rubena.

¹⁸ Vo waketi lu leke la ngelʼa kushi, la shodi ya Bete-Araba, ku ntuhulc lu Arab,

¹⁹ ku vo nsimbo utsha lu leke la ngelʼa kushi ka Bete-Hongela, ku ntukume lu shodi ya Bete-Hongela. Ulelu ako waka-tukume lu shodi yʼUduwa a Leho ya la ngelʼa kushi, utsha lu kitu ka Jorodana la diku dia kushi. Osoku mbaki ulelu wa lu leke la diku dia kushi.

²⁰ Jorodana kaki ulelu awo lu leke lʼehutwelu. Oso aki etenyi kʼukito kʼasi Bendjamina, uku khumbu yawo, la elelu wa lʼutshimba tshe.

²¹ Esumba wa diuhu dia Bendjamina, uku khumbu yawo, waki; Jeriko, Bete-Hongela, Emeke-Kirize,

²² Bete-Araba, Zemaravima, Betele,

²³ Avima, Para, Oftra,

²⁴ Kefare-Amoni, Ofeni, la Ngeba: esumba dikumi la ehendi kame la ngelu yawo.

²⁵ Ngibiyona, Rama, Berote,

²⁶ Mizipe, Kefira, Moza,

²⁷ Re-keme, Iripele, Tarala,

²⁸ Zela, Ha-Elefu, Jebuse (yetawo vati: Jerusalema), Ngibeya, la Kiriyate-Jearima: esumba dikumi la enei kame la ngelu yawo. Oso aki etenyi kʼukito ka diuhu dia Bendjamina uku khumbu yawo.