Jashua 17 - La Bible en Otetela (Bible K'Ekila) 1991

¹ Etenyi kʼukito kakandama uwali le asi Manase kene. Ndi aki onʼa Josefu lʼenundu. Makira, onʼa Manase lʼenundu, shi Ngiliyade, akakundja kete ya Ngiliyade la ya Bashana, ne dia ndi aki ondoshi wa ta.

² Okone eukelu kʼuwali kaki lu dikambu diʼana wa Manase akina uku khumbu yawo. Ana wa Abiyezere, ana wa Heleke, ana wa Asiriyele, ana wa Shekeme, ana wa Hefere, la ana wa Shemida. Oso eli ana wʼapami wa Manase, onʼa Josefu, uku khumbu yawo.

³ Keli Zelofekade, onʼa Hefere, onʼa Ngiliyade, onʼa Makira, onʼa Manase, kumbuta ana apami, paka amantu atu. Kumbu ya anʼandi wʼamantu nye: Mala, Noa, Hongela, Milika, la Tiriza.

⁴ Vo wakayutela olombedi Eleazara, Jashua, onʼa Nuna, la ewandji, vati: Latuyalaka akatela Mose dia ndi ntusha etenyi kʼukito lʼatei wʼanengesu. Ku ndi akawasha etenyi kʼukito lʼatei wʼanangu shewo, uku akati Latuyalaka.

⁵ Tenyi dikumi diakandama lʼuwali le Manase ladiku dia kete ya Ngiliyade la Bashana yeli la wedi wa Jorodana,

⁶ ne dia ana wʼamantu wa Manase wakakundja etenyi kawo kʼukito kame la anʼandi wʼapami. Osoku kete ya Ngiliyade yakayala yʼana wʼapami akina wa Manase.

⁷ Kete ya Manase yaki uma la Ashere utsha la Mikimetate, keli lasuki la Shekeme. Ku ulelu ayo wakakadimo utsha lu lunya la pami utsha le asi Ene-Tapua.

⁸ Kete ya Tapua yaki yʼasi Manase, keli usumba wa Tapua wakakami lʼulelu wʼasi Manase, waki wʼasi Efarayima.

⁹ Ku ulelu wakahulo lʼokedi wa Kana, lu leke la diku dia kushi. Esumba ene wʼasi Efarayima waki lʼatei wʼesumba wʼasi Manase. Ulelu wa Manase waketi la ngelʼa kushi kʼokedi, wakatukume lu Ashi a Mediteraneya.

¹⁰ Kete ya Efarayima yaki la diku dia kushi, la kete ya Manase la ngelʼa kushi. Ku kete yawo yakatukume lu Ashi a Mediteraneya. Kete yako yakatudja la Ashere ulelu lu leke la ngelʼa kushi, la Isakana lu leke lʼehutwelu.

¹¹ Asi Manase waki la esumba ene lʼatei wa kete ya Isakara la ya Ashere: Bete-Sheana la ngelu ya lʼokongo awo, Ibileame la ngelu ya lʼokongo awo, asi Dora la ngelu ya lʼokongo awo, asi Ene-Dora la ngelu ya lʼokongo awo, asi Tanaka la ngelu ya lʼokongo awo, lʼasi Mengido la ngelu ya lʼokongo awo; Nafata keli wa satu.

¹² Asi Manase kumbeya mbitshanya akanga wʼesumba ene. Osoku asi Kanana wakashikikala lu kete yako.

¹³ Lamʼakayala asi Isariyele la wulu, vo wakete asi Kanana lʼokongo awo, dia vo mbalambulaka elambu, keli vo kumbatshanya.

¹⁴ Ku diuhu dia Josefu wakambula Jashua vati: Ukundi akayatusha etenyi kame ketu ndu leke lame lutu, lamʼesu wudja a wuki, ndu lamʼeli Latuyalaka lu ntotshokola edja ndu kakiane?

¹⁵ Ku Jashua akakaluya diui ati: Naka wudja a wuki oso wenyu, nyutshu lʼukunda, nyutotete, mbayunyuyala la dihuli leko lu kete yʼasi Perizi la asi Refayima, ne dia lu leke lʼakuna wa Efarayima eko pika le nyu.

¹⁶ Ku diuhu dia Josefu wakûkaluya diui vati: Leke lʼakuna halukuka le su. Ndu pusupusu ya ta ya mbulu yeko le asi Kanana tshe wudjashi lʼukidi. Yo yeko ndu le wane wudjashi la Bete-Sheana, ndu wa lu ngelu ya lʼokongo awo, ndu le wane wudjashi lʼUkidi a Jezerele.

¹⁷ Jashua akatela asika Josefu, Efarayima la Manase, ati: Nyu nyeko wudja a wuki, ndu nyu la wulu efula. Nyu hanyuyala la leke lame lutu.

¹⁸ Leke lʼakuna layuyala lanyu, kuyanga ukunda mbeko, nyu nyayoteta. Ekundjelu kʼuma loko kayuyala kanyu. Ntu, nyu nyayu-tshanya asi Kanana, kuyanga mbewo la pusupusu ya ta ya mbulu ndu la wulu efula.