Jashua 14 - La Bible en Otetela (Bible K'Ekila) 1991

Ekahanyelu ka Kete ya Kanana lʼEukelu kʼUwali

¹ Okone mbakakahanya olombedi Eleazara, Jashua, onʼa Nuna, la ete wa khumbu wʼasi Isariyele kete ya Kanana ukito le asi Isariyele.

² Kete yakakaha-nyema lu eukelu kʼuwali le wauhu divwa lʼetenyi ka hendi, uku akadjangela Latuyalaka Mose.

³ Mose akatakahanyisha wauhu ahendi la etenyi ka hendi kete yʼukito la wedi wa Jorodana. Keli ndi kumbisha asi Lewi kete ukito lʼatei awo.

⁴ Asika Josefu waki wauhu ahendi, Manase la Efarayima. Diako mbakiwo kumbisha asi Lewi kete, tshikima esumba wa vo mbidjase la kete ya lʼetshimba awo, ya ndesha ngombe yawo ndu ya vo nkamba dikambo.

⁵ Uku akadjangela Latuyalaka Mose, mbakatshi asi Isariyele, ndu mbakawakahanya kete.

Wambusha Kaleba Heberona

⁶ Asi Juda wakasukana le Jashua la Ngilingala. Ku Kaleba, onʼa Jefune, usi Kenizi, akawutela ati: We mbeyaka uku akatela Latuyalaka Mose, ukambi a Unyashungu, lu Kadeshe-Baranea lu dikambu diami, ndu lu dikambu diaye.

⁷ Dimi laki la deku akumi anei, lamʼakantumi Mose ukambi wa Latuyalaka, uma la Kadeshe-Baranea dia ndjukemba kete nye. Lamʼakamakalula, dimi lakatuwu-tela aui tshe waki lʼutema ami.

⁸ Analingu wakatshu kame la mi, wakatutsha antu woma, keli dimi lakayeli Latuyalaka, Unyashungu ami, lʼutema tshe.

⁹ Okone Mose akatshibi lushi lako ati: Kete yakakamela ekulu aye, yayuyala yaye ndu ya anʼa aye pundju, ne dia we akayeli Latuyalaka, Unyashungu ami, lʼutema tshe.

¹⁰ Enda, Latuyalaka ambuntshika la lumu uku akandati. Aya deku akumi anei la tanu uma lʼetena kakandatela Mose diui ne, lamʼakatakendakendaka asi Isariyele lʼusui wa shenga. Ku kakiane, dimi laya la deku akumi enanei la tanu.

¹¹ Dimi leki ukeketadu uku akimi lamʼakantumi Most Wulu weli la mi kakiane, weko uku wulu waki la mi lu nshi yako, wa ndo ta, wa ntumba ndu wa mboto.

¹² Okone umbisha kete nye ya lu leke lʼakuna, yakati Latuyalaka lushi lako. Ne dia lʼetena keku we akuki wati: Akunguti mbuiadi leko, la esumba awo weko waki ndu wudingami kumbu. Undu Latuyalaka ayutsho la mi, ku dimi layuwatshanya, uku akandati.

¹³ Jashua akatshokola Kaleba, onʼa Jefune. Ku ndi akawusha Heberona ukito.

¹⁴ Okone Heberona akayala etenyi kʼukito ka Kaleba, onʼa Jefune, usi Kenizi, edja ndu elo, ne dia ndi akayelaka Latuyalaka, Unyashungu wa Isariyele, lʼutema tshe.

¹⁵ Ntundutundu, lukumbu la Heberona laki Kiriyate-Areba (kitshimudi ati: Usumba wa Areba). Areba ako kakaleki dikunguti lʼatei wʼasi Anaka. Umaka etena kako, kete yakayala la mumuya, aha la ta.