Jashua 13 - La Bible en Otetela (Bible K'Ekila) 1991

Kete Yahatalemiama

¹ Jashua akayala usumbi wa lukusumbi. Ku Latuyalaka akawutela ati: Kakiane we ambutshunda, aya usumbi, keli kete yahayatalembia yeki efula.

² Kete yako yambutshikala nye: leke tshe lʼasi Filistiya, ndu diʼasi Ngeshure,

³ (uma lʼokedi wa Shihore, weli lu leke lʼehutwelu la Ejibitu edja ndu lʼulelu wa Ekerona, lu leke la diku dia kushi, kete yeyama uku yʼasi Kanana; embuledi etanu wʼasi Filistiya, waki leko, wa la Ngaza, Ashidode, Ashikelona, Ngata la Ekerona), ndu diʼasi Avima,

⁴ lu leke la diku dia kushi, kete tshe yʼasi Kanana, la Meara keli lu Sidona, pulu la Afoka, edja ndu lʼulelu wʼasi Amora;

⁵ kete yʼasi Ngibala la Lebanona tshe, utsha lʼehutwelu, ndu uma la Bala-Ngada keli la tshina diʼUkungu a Heremona, edja ndu lʼeotwelo ka la Hamata;

⁶ wane tshe watudjaseka lʼakuna, uma la Lebanona edja ndu la Misrifote-Mayima, asi Sidona tshe. Waso mbayumutshanya dime uma la ntundu kʼasi Isariyele. Dikambu otoi, ukahanya asi Isariyele kete nye ukito, uku akamakundjangela.

⁷ Okone ukahanya kete nye ukito le wauhu divwa la etenyi ka hendi ka diuhu dia Manase.

⁸ Asi Rubena lʼasi Ngada, la etenyi ka hendi kekina ka diuhu dia Manase, wakatalungudi etenyi kawo kʼukito kakatawasha Mose la wedi wa Jorodana, lu leke lʼehutwelu, kakatawasha Mose, ukambi wa Latuyalaka.

⁹ Uma la Aroera keli lʼumamu wʼukidi wa Arenona, la usumba weli kʼatei wʼukidi, la kete tshe ya baraubamu ya Medeba edja ndu la Dihona,

¹⁰ la esumba tshe wa Sihona, khumʼekanga kʼasi Amora, lakuledi la Heshibona, pulu ndu lʼulelu wʼasi Amona;

¹¹ Ngiliyade, la kete yʼasi Ngeshure la asi Makata; ndu Ukungu a Heremona tshe, ndu Bashama tshe edja ndu la Saleka;

¹² Diulelu tshe dia Onga ka la Bashana, lakuledi la Ashetarota ndu la Ederei (ndi ndame kakatshikala uma lʼatei wʼasi Refayima,); khumi ya disanga yako mbakalo la Mose, mbakandatshanya.

¹³ Keli asi Isariyele kumbitshanya asi Ngeshure la asi Makata. Vo wakadjase lʼatei wa Isariyele edja ndu elo.

¹⁴ Tshikima diuhu dia Lewi tu mbaki Mose kumbisha etenyi kʼukito. Elambu wa nambula lu dja le Latuyalaka, Unyashungu wa Isariyele, mbaki etenyi kawo kʼukito, uku akandawatela.

Kete ya Sangu Yakatakahanyisha Mose

¹⁵ Mose akakahanya kete le asi Rubena uku khumbu yawo.

¹⁶ Kete yawo yaki uma la Aroera weli lʼumamu wʼukidi wʼArenona, la usumba weli lʼatei wʼukidi, ndu lu kete tshe ya bamubamu ya lasuki la Madeba.

¹⁷ Heshibona la esumba awo tshe weli lu kete ya bamubamu, Dibona, Bamota-Bala, la Bete-Bala-Meona,

¹⁸ Jahaza, Kedemote, Mefate,

¹⁹ Kiriyatayima, Sibima, Zerete-Shakara weli lu dikuna dia lʼatei wʼukidi.

²⁰ Bete-Peore, ehulula wa Pisinga, Bete-Jeshimote,

²¹ mvuta ati: Esumba tshe wa lu kete ya bamubamu, la diulelu tshe dia Sihona, khumʼekanga kʼasi Amora, lakuledi la Heshibona. Mose akalembia, ndi la ewandji wa Midiyana, Evi, Rekeme, Zura, Hura, Reba, ana wa khumʼekanga Sihona, wakadjashi lu kete.

²² Asi Isariyele wakadiaki Balama, umvutshi wʼakambu wahatayi, onʼa Beore, la yombo kame la akina wakawadiaki.

²³ Jorodana kaki ulelu wa kete yʼasi Rubena. Oso aki kete yʼukito yʼasi Rubena uku khumbu yawo, esumba awo, ndu ngelu yawo.

²⁴ Mose akasha ndu diuhu dia Ngada kete yʼukito uku khumbu yawo.

²⁵ Kete yawo yaki uma la Jazera, esumba tshe wa Ngiliyade, etenyi ka hendi ka ete yʼasi Amona, edja ndu lʼAroera, lu leke lʼehutwelu la lu Raba.

²⁶ Uma la Heshibona edja ndu la Ramata-Mizipe, la Betonima, ndu uma la Manahayma, edja ndu lʼulelu wa Debire,

²⁷ Bete-Harama, Bete-Nimira, Sukota, la Zafona, esumba wa lʼukidi, etenyi kakatshikala ka diulelu dia Sihona, khumʼekanga ka Heshibona, ulelu awo waketi lu Jorodana pulu ndu la kuma kʼUduwa a Kinerete, la wedi wa Jorodana, wʼutsha lu leke lʼehutwelu ka unya.

²⁸ Oso eli kete yʼukito yʼasi Ngada uku khumbu yawo, kame la esumba awo, la ngelu yawo.

²⁹ Mose akasha etenyi ka hendi ka diuhu dia Manase kete yʼukito uku khumbu yawo.

³⁰ Kete yawo yaki uma la Mahanayima, Bashana tshe, diulelu tshe dia Onga, khumʼekanga ka Bashana, la ngelu tshe ya Jaira ya la Bashana, esumba akumi asamalu;

³¹ etenyi ka hendi ka Ngiliyade, Ashitarota la Ederei, esumba wa diulelu dia Onga ka la Bashana. Oso aki kete yʼukito yʼasi Makira, onʼa Manase, etenyi ka hendi kʼasi Makira uku khumbu yawo.

³² Oso eli kete yakakahanya Mose lu mandja ya Moaba, la wedi wa Jorodana, lu leke lʼehutwelu la Jeriko.

³³ Keli Mose kumbisha asi Lewi kete yʼukito. Latuyalaka, Unyashungu wa Isariyele, keli etenyi kawo kʼukito, uku akandawatela.