Jashua 12 - La Bible en Otetela (Bible K'Ekila) 1991

Khumi ya Dikanga Yakalembia Mose

¹ Khumi ya dikanga yakalembia asi Isariyele dia nkita kete yawo la wedi wa Jorodana lu leke lʼehutwelu, uma lʼukidi wa Aranona pulu ndu lʼUkungu a Heremona, ndu kete tshe ya Araba lu leke lʼehutwelu ka unya, nye:

² Sihona, khumʼekanga ka asi Amora, lakadjashi la Heshibona. Diulelu dia Sihona diakashimbemala umaka Aroera, weli lʼumamu wʼukidi wʼAranona, ndu uma-kʼatei wʼokedi ako, ku dio nsimbemala lu etenyi otoi ka hendi ka Ngiliyade pulu ndu lʼokedi wa Jaboka, weli lʼulelu wʼasi Amora.

³ Ku dio nsimbemala lʼusui utsha lu leke lʼehutwelu lʼuduwa wa Kinerete. Ku dio ndjeta lʼukidi wa Araba utsha la Bete-Jeshimote, lʼuduwa wa Araba wetawo vati: Uduwa a Leho, lu leke la diku dia kushi, pulu ndu lʼuhulula wa Pisinga.

⁴ La Onga, khumʼekanga ka Bashana, lakatshikala ndame uma lʼatei wʼasi Refayima, akadjase la Ashitarota ndu la Ederei.

⁵ Ndi akulela lʼUkungu a Heremona, lu Saleka, ndu lu Bashana tshe, edja ndu lʼulelu wʼasi Ngeshure lʼasi Makata, ndu lu etenyi otoi ka hendi ka Ngiliyade, lʼulelu wa Sihona, khumʼekanga ka Heshibona.

⁶ Mose, ukambi a Latuyalaka, la asi Isariyele wakalembia. Ku Mose, ukambi a Latuyalaka, akasha asi Rubena, asi Ngada la etenyi ka hendi ka diuhu dia Manase, kete sho ukito.

Khumi ya Dikanga Yakalembia Jashua

⁷ Khumi ya dikanga nye mbakalembia Jashua la asi Isariyele lu wedi one wa Jorodana lu leke lʼedjelu, umaka Bala-Ngada, lʼukidi wa Lebanona, edja ndu lʼUkungu a Halaka, lu mbuka kʼutsha la Seire (ku Jashua akasha wauhu wa Isariyele kete yawo ukito, diuhu la diuhuetenyi kawo,

⁸ lu leke lʼakuna, lʼukidi, lu Araba, lu ehulula, lʼusui wa shenga, ndu lu Nengebe, kete yʼasi Hiti, asi Amora, asi Kanana, asi Perizi, asi Hiwi la asi Jebuse).

⁹ Khumi ya dikanga yako nye: khumʼekanga ka Jeriko, otoi; khumʼekanga ka Ai, keli lasuki la Betele, otoi;

¹⁰ khumʼekanga ka Jerusalema, otoi; khumʼekanga ka Heberona, otoi;

¹¹ khumʼekanga ka Jaramuta, otoi; khumʼekanga ka Lakishi, otoi;

¹² khumʼekanga ka Engelona, otoi; khumʼekanga ka Ngazere, otoi;

¹³ khumʼekanga ka Debire, otoi; khumʼekanga ka Ngedere, otoi;

¹⁴ khumʼekanga ka Horoma, otoi; khumʼekanga ka Arada, otoi;

¹⁵ khumʼekanga ka Libina, otoi; khumʼekanga ka Adulama, otoi;

¹⁶ khumʼekanga ka Makeda, otoi; khumʼekanga ka Betele, otoi;

¹⁷ khumʼekanga ka Tapua, otoi; khumʼekanga ka Hefere, otoi;

¹⁸ khumʼekanga ka Afeka, otoi; khumʼekanga ka Lasharona, otoi;

¹⁹ khumʼekanga ka Madona, otoi; khumʼekanga ka Hazora, otoi;

²⁰ khumʼekanga ka Shimirona-Merona, otoi; khumʼekanga ka Akishafe, otoi;

²¹ khumʼekanga ka Tanaka, otoi; khumʼekanga ka Mengido, otoi;

²² khumʼekanga ka Kedeshe, otoi; khumʼekanga ka Jakineame, lu Karamele, otoi;

²³ khumʼekanga ka Dora, lu Nafata-Dora, otoi; khumʼekanga ka Ngayima, lu Ngalili, otoi;

²⁴ khumʼekanga ka Tiriza, otoi. Khumi ya dikanga yako tshe, yaki akumi asatu lʼotoi.