Jashua 11 - La Bible en Otetela (Bible K'Ekila) 1991

Elanyelu ka Jabina la Wedja Waki Kame la Ndi lu Ta

¹ Lamʼakuki Jabina, khumʼekanga ka Hazora, lukumu loso, ndi akatumi akendji le Jobaba, khumʼekanga ka Madona, le khumʼekanga ka Shimirona, le khumʼekanga ka Akishafu,

² le khumi ya dikanga yaki lu leke la ngelʼa kushi lʼakuna, lu Araba, lu leke la diku dia kushi la Kinerote, lʼukidi, lu Nafota-Dora lu leke lʼedjelu ka unya,

³ le asi Kanana wa lu leke lʼehutwelu ndu lʼedjelu ka unya, le asi Amora, le asi Hiti le asi Perizi, le asi Jebuse wa lu leke lʼakuna ndu le asi Hiwi wuladi la tshina dia Heremona, lu kete ya Mizipa.

⁴ Vo wakatumbi, vo la elui awo wʼalimbi tshe. Vo waki antu efula uku tongo ya losenga la lʼumamu wʼashi a waki. Vo waki la falasa la pusupusu efula.

⁵ Khumi ya dikanga nye tshe yakasangana kame, yakatuhanga lu ashi wa Merome dia ndo la Isariyele.

⁶ Latuyalaka akatela Jashua ati: Tuwaukaki woma, ne dia lui lʼetena kene, layakimo, vo tshe, edu etu le asi Isariyele. Kuhimbuli eshisha wa falasa yawo, kutshumbi pusupusu yawo ya ta.

⁷ Ku Jashua akayi, ndi lʼandoshi andi wa ta tshe, lʼumamu wʼashi wa Merome. Vo wakatumbela shashimuya, wakakhunguso utsha le wo.

⁸ Latuyalaka akakimo Lanya wʼasi Isariyele, ku vo wakadiaki, wakawatshanya pulu ndu la Sidona ka Wuki, pulu ndu la Misrefote-Mayima, ndu edja ndu la Mizipa lu leke lʼehutwelu ka unya. Vo wak idiaki, kumpandja nduku otoi.

⁹ Jashua akatshela uku akawudjangela Latuyalaka. Ndi akahimbula eshisha wa falasa yawo, akatshumbi pusupusu yawo ya ta.

¹⁰ Lʼetena kako, Jashua akakadimo, akalembia Hazora, akadiaki khumʼekanga kawo la yombo. Nshi kina, Hazora aki usumba a wuki wa waulelu ako tshe.

¹¹ Vo wakadiaki antu tshe waki loko la tombo, wal asbili ushiki. Nduku ekendakenda kaki la lumu kakatshikala. Ndi akatshumbi Hazora.

¹² Ku Jashua akalembia khumi ya dikanga ku tshe la esumba awo. Ndi akadiaki la yombo; akashili ushiki, uku akadjanga Mose, ukambi wa Latuyalaka.

¹³ Asi Isariyele kuntshumba esumba wakahikama lu akuna, tshikima usumba wa Hazora utu mbakatshumbi Jashua.

¹⁴ Asi Isariyele wakose diango tshe diakawambi lu esumba ako la dungalunga. Keli vo wakadiaki usika pami tshe la yombo. Vo kuntshika nduku engo kaki la lumu.

¹⁵ Uku akadjangela Latuyalaka ukambi andi Mose, mbakadjangela Mose Jashua. Ku Jashua akatshi akambu ako tshe. Ndi kuntshika nduku dikambu diakadjangela Latuyalaka Mose.

Jashua Ambosa Kete Tshe

¹⁶ Jashua akalembia kete tshe: leke lʼakuna Nengebe tshe, kete tshe ya Ngoshena, leke la lʼukidi la Araba, lu leke lʼakuna wa Isariyele la ekidi awo;

¹⁷ uma lʼUkungu a Halaka, weli lu mbuka kʼutsha la Seire, pulu ndu la Bala-Ngada keli lʼukidi wa Lebanona, la tshina diʼUkungu a Heremona. Ndi akandi khumi ya dikanga yawo tshe, akakomola, akadiaki.

¹⁸ Jashua akalo la khumi ya dikanga yako tshe etena kʼutali.

¹⁹ Nduku usumba wakakote lʼasi Isariyele lusalu, tshikima asi Hiwi, wakadjashi la Ngibiyona. Okone asi Isariyele wakalembia tshe lu ta.

²⁰ Latuyalaka ndame kakakikitsha etema awo dia vo ndo lʼasi Isariyele, dia asi Isariyele mbadiaka, aha mbauka ketshi, la mbashila ushiki, uku akadjangela Latuyalaka Mose.

²¹ Lʼetena kako, Jashua akatshu, akatudiaka asi Anaka wʼuma lu leke lʼakuna wa Heberona, wa Debire, wa Anaba, wa lu leke lʼakuna tshe wa Juda, ndu leke lʼakuna wa Isariyele. Jashua akalanya esumba awo, ndu akashili ushiki.

²² Nduku usika Anaka akatshikala lu kete ya asi Isariyele. Tshikima la Ngaza, la Ngata la la Ashidode, kakawatshikala atoi.

²³ Okone Jashua akalembia kete tshe, uku akatela Latuyalaka Mose. Ndi akayisha diuhu la diuhu dia Isariyele etenyi kawo ukito. Ku kete yakayala ki, aha la ta.