Jakoba 5 - La Bible en Otetela (Bible K'Ekila) 1991

Ambewula Akanga wʼEngonyi la Akanga a Ndjalanga

¹ Keli nyu, akanga wʼengonyi, nyuyi, nyuleli, nyawani, ne dia asui waya ka ndjate nyu!

² Ekundji anyu wambohonda, ahondo anyu wambolema la tumumbu.

³ Paunyi yanyu la fesa yanyu yambahema alalu. Alalu ayo wayuyala uku omenyi a dikambu le nyu, wayole alimba anyu uku dja. Nyu nyambuyaumbela diango lu nshi nye yʼekumelu.

⁴ Nyulungi, difutu dia asi ulimu wakanyukambela dikambo dianyu diakanyakimela la lukesu, diambawana! Ndu alelu wa amunyi wa diango dianyu wambukuma lʼatui wa Khumadiandja Kanga lulimbilimbi.

⁵ Nyu nyakenaka olo la kete, nyakayangenyangenyaka; nyakalutsha etema anyu lu lushi lʼediakanelu.

⁶ Nyu nyakamia, nyakadiaki untu ololo, laki kunyolosha.

⁷ Anyasu, nyutetemali, edja ndu lamʼayuya Khumadiondjo. Enda, ukambi ekambo atukungelaka dinela diʼololo dia diango diakandune lu kete. Ndi atutetemalaka edja ndu lamʼayolo mvula ka ntundu la ka lʼokongo.

⁸ Ndu nyu nyutetemali, nyushikike etema anyu, ne dia eyelu ka Khumadiondjo aya suki.

⁹ Anyasu, tanyungunangunanelaki, ne dia nyu nyatukulumbuyama. Enda, Unumbushi ambemala lu asuku!

¹⁰ Anyasu, nyendi amvutshi wakataka diui lu lukumbu la Khumadiondjo, vo wayali djimbitelu ya fono la ya etetemalu.

¹¹ Nyulungi, shu mvutaka dia antu wakayakikitsha shati: Weko la otshoko. Nyu nyakuki lukumu la etetemalu ka Jobo, nyakenyi ekumelu ka Khumadiondjo, ndu uku uludi Khumadiondjo la memakana la ketshi.

Nyewo Tshibelu

¹² Anyasu, ladiku diʼakambu tshe, tanyutshibaki ulungu, kana kete, kana etshibelu kekina. Keli elu kanyu, kayali elu; kema kanyu, kayali kema, ne dia nyatukuyala la dianyelu.

Akambu Watutumbaka Uma lu Dombelo

¹³ Untu eko la asui lʼatei anyu? Ndi alombe. Untu eko la ongenongeno? Ndi imbi esambu.

¹⁴ Untu eko la hemo lʼatei anyu? Ndi eti dikumanyi dia ekelizia, vo wolombele, wukiti iso lu lukumbu la Khumadiondjo.

¹⁵ Dombelo dia mbetawo diayushimbela kanga hemo, ku Khumadiondjo ayuwulula. Naka ndi akatshi kolo, kolo yandi yayudimanyema.

¹⁶ Okone nyushwaneli kolo yanyu, nyolombaneli Unyashungu, dia nyu nkono. Elombelo kʼuntu ololo mbeyaka ntsha akambu a waki.

¹⁷ Elidja aki untu uku shu; ndi akatetemala nomba Unyashungu, ati: Toloshaki mvula, ku mvula kondo la kete deku satu la ngondo shamalu.

¹⁸ Ndi akalombe ntu, ku ulungu akalosha mvida, kete yakatumbia tumbatumba.

“Ayushimbela Lumu lʼUntu Uma lu Nyoi”

¹⁹ Anyasu, naka untu lʼatei anyu ambunganela uma lu mbuka ka mete, la omotshi ayuwungula;

²⁰ ndi eyi ati: Untu layungula untu a kolo uma lu mbuka kakandanganela, ayushimbela lumu lʼuntu ako uma lu nyoi, ndu ayukumba efula kʼakambu wa kolo.