Jakoba 4 - La Bible en Otetela (Bible K'Ekila) 1991

“Ongenyi wʼAkambu wa la Kete Ambuyaete Utunyi a Unyashungu”

¹ Lundju la ta lʼatei antu, uma lendi uyewo na? Hawuyi uma lu okomiya anyu watolokaka lʼetema anyu uka?

² Nyu la saki ka diango diaha la nyu, nyu nyatudiakanaka, nyatokomiyaka diango diahanyeyi nkundja. Nyu nyatokotanaka, nyatoloka ta. Nyu nyaha la ema, ne dia nyu hanyolombe.

³ Nyu nyatolombaka, ku hanyulungula, ne dia nyu nyatolombaka olombalomba, dia nyu ndjangenyangenya.

⁴ Nyu akanga a munanyi, nyu hanyeyi nyati: Ongenyi wʼakambu wa la kete eko utunyi a Unyashungu? Okone untu tshe lalanga ndjala ongenyi wʼakambu wa la kete, ambuyaete utunyi a Unyashungu.

⁵ Nyu nkanaka nyati: Efundelu mvutaka utata uka? Nyuma katudjaseka lʼetema asu, ntukumbulaka la kandjema?

⁶ Keli ndi atutushaka ngandji ka mamba ladiku dia ngandji ka mamba. Okone efundelu kambuta ati: Unyashungu atutunaka kanga utaku, keli atushaka one layakitshakitsha ngandji ka mamba.

⁷ Okone nyukitanyiaki aui wa Unyashungu. Nyosemaneli le uhimbanyi, ku ndi ayunyulawo.

⁸ Nyusukani le Unyashungu, ku ndi ayusukana le nyu. Nyu antu wa kolo, nyotsha anya anyu; nyedia etema anyu, nyu akanga wʼetema ehendi.

⁹ Nyuyatshumuya, nyunyangi, nyuleli. Tola tanyu takadimo lunyangu, ongenongeno anyu akadimo okei.

¹⁰ Nyuyakitshakitsha lu ashu wa Khumediandjo, ku ndi ayunyumbiya.

¹¹ Anyasu, tanyosongwanelaki. One lasongwela unyandi kuyanga lalumbuya unyandi, ndi ambosongwela elembe, ndu ambulumbuya elembe. Keli lamʼayuyulumbuya elembe, ku we kema utshi wʼelembe, we eko usambudi.

¹² Otoi keli umbidji wʼelembe la usambudi, ndi keli la wulu wa mamela la wa ndjaka. Keli we na, lalumbuya unyaye?

Nyutaki Nyati: “Naka Khumadiondjo Alanga”

¹³ Nyuyi nyu wane watutaka nyati Elo kana lui tayutsho lʼusumba a wuhu one la wuhu one, tayutshikala leko eleku tshe, tayetetaka ukanda, tayukundja waho.

¹⁴ Keli nyu hanyeyi akambu wayuyala lui. Lumu lanyu leli na? Nyu nyeko uku lungi, lateneka etenyi ka tshitshe, ku latushishoka.

¹⁵ Dieli la nyu dia mvuta nyati: Naka Khumediandjo alanga, tayuyala la lumu, ku tayutsha okone kana osoku.

¹⁶ Keli kakiane, nyu nyambutakula lu ndjatumbula kanyu. Utaku one tshe, eko kolo.

¹⁷ Okone untu leya ntsha dikambu diʼololo, keli haditshi, dikambu diako dieko kolo le ndi.