Jakoba 2 - La Bible en Otetela (Bible K'Ekila) 1991

Nyukani Ngandji Kaha la Shonodi

¹ Anyami, tanyukimelaki mbetawo ka Khumesu Jesu Kristu, Khumadiondjoko lutumbu, kame la shonodi le antu.

² Naka untu omotshi ayoto lʼetemwelo kanyu udji lohete la paunyi lu luhita la olotshi ahondo wʼololo, ku ndu kanga wula lolotshi ahondo wa kolo ayoto;

³ lamʼayunyetawo untu lolotshi ahondo wʼololo nyati: Uyudjase lu eihuli diʼololo ne; ku lamʼayunyutela kanga wula nyati: Emala lene, kana udjase la tshina dia kihuna kʼekulu ami,

⁴ laso nyu kema la shonodi lʼatei anyu uka? Nyu hanyuyala uku embadi weli la tukanyi ta kolo?

⁵ Anyami wa ngandji, nyuhukami. Unyashungu konsonola akanga a weula la kete dia ndi mbangonya lu mbetawo, la dia vo ndjala ekito wa diulelu diakandalaki wane wulanga uka?

⁶ Keli nyu nyambonyola kanga wula. Akanga wʼengonyi waha wane wanyahamela, ndu nyukutula lu dumbwelu uka?

⁷ Vo waha wane watenga lukumbu lone la kenemo lanyetawo uka?

⁸ Naka nyu nyambukitanyia olembe wuleki ekina wuki lu efundelu, ati: Ulangi unyaye uku ayalangaye, laso nvu nyambutsha ololo.

⁹ Naka nyu nyambuyala la shonodi le antu, nyu nyambutsha kolo, nyambamiama uku andjaki wʼelembe.

¹⁰ Untu tshe lakitanyia elembe tshe, lamʼayundutakana lʼolembe otoi, wayuwamia uku undjaki wʼelembe tshe.

¹¹ Ne dia one lakati ati: Tunanaki, kakati ndu ati: Tudiakaki. Okone naka we hunanyi, keli ambudiaka untu, we ambuyala undjaki wʼelembe.

¹² Okone nyutaki ndu nyutshaki uku antu wayulumbuyama lu elembe wa ndjadjasela.

¹³ Ne dia elumbwelu kaha la ketshi kayuyala le one lahukana ketshi; ketshi kambuleka elumbwelu wulu.

“Mbetawo Kaha la Etsha Mvokaka”

¹⁴ Anyami, waho akona weli le untu naka ndi ambuta ati: Dimi la mbetawo, keli ndi kema la etsha? Mbetawo keso kayeya mbushimbela?

¹⁵ Naka onengesu a pami kana kadiyesu eko utakataka, ndu la uhumba wa mbu ya nde la lushi la lushi,

¹⁶ lamʼayuwatela omotshi ati: Nyutshu la ki, nyutuki dja, nyutuluti mbu ya nde; keli ndi hawasha ehumba wʼalimba awo, lendi eli waho na?

¹⁷ Osoku mbetawo kaha la etsha ambuyavwela.

¹⁸ Untu omotshi ayuta ati: We la mbetawo, dimi la etsha. Omenya mbetawo kaye kaha la etsha, ku dimi layukenya mbetawo kami la etsha ami.

¹⁹ We ambetawo wati: Unyashungu eko otoi; we ambutsha ololo. Ndu edienge mbatetawoka pupu — watudidimaka.

²⁰ Keli we untu kʼuntu, we heyi wati: Mbetawo kaha la etsha keli anyanya?

²¹ Tshesu Abarahama kunyindjama lu etsha andi lamʼakandakimo onʼandi Isaka lʼediakelu uka?

²² We menaka wati: Mbetawo kandi kakakimanyiama la etsha andi, ndu mbetawo kandi kakaluwanyema ne dia etsha andi.

²³ Ku efundelu kakashidiyama ati: Abarahama aketawo Unyashungu. Wakawadiya mbetawo kandi uku ololo andi; wakaweti vati: Ongenyi a Unyashiungu.

²⁴ Okone nyu nyambena nyati: Untu nyindjamaka dia etsha andi, keli hayindjama dia mbetawo ketu.

²⁵ Okone ndu Rahaba, kanga munanyi, kunyindjama pupu lu etsha andi lamʼakandalungula akendji, ku akatumi lu mbuka kekina?

²⁶ Uku atuvokaka dimba diaha la lumu, okone ndu mbetawo kaha la etsha mvokaka.