Jakoba 1 - La Bible en Otetela (Bible K'Ekila) 1991

Ambatumela Moyo

¹ Jakoba, ukambi a Unyashungu la Khumadiondjo Jesu Kristu, Le wauhu dikumi la ahendi wakahandjo: Moyo.

Nyolombiaki la Mbetawo

² Anyami, nyali ongenongeno tshe lamʼayunyutana wehu efula wʼehimba;

³ nyeyi nyati: Ehimbelu ka mbetawo kanyu Katutungaka etetemalu.

⁴ Etetemalu aluwanya ulimu ato, dia nyu nduwana la nkukiama, uku wane wahahumbi engo.

⁵ Naka omotshi ambuhumba yimba, ndi alombe Unyashungu, katushaka antu tshe diango la lukahu, hahangwela, ku ndi ayuwushayo.

⁶ Keli ndi alombe la mbetawo, aha la tamu, ne dia untu ladja tamu, eko uku sukhu diʼashi a wuki, diasukuyama la diasutshasutshama la loheledi.

⁷ Untu uku takanaki ati: Layulungula engo uma le Khumadiondjo;

⁸ untu uku eko la etema ehendi, atahahoka lu akambu andi tshe.

Wane Wukitshikitshi Wangenengene

⁹ Unyasu lukitshikitshi, angenengene lamʼayuwuwumbiya,

¹⁰ ndu kanga ongonyi angenengene lamʼukitshakitshawo, ne dia ndi ayushisho uku dembo diʼadiyu.

¹¹ Ne dia unya atandaka la luhaladi la wulu, atolengiyaka adiyu, ku alembo awo watokokaka la kete, dimena diawo diatushilaka. Osoku mbayuyala ndu kanga ongonyi lu akambu andi.

Ehimba Hawuyi Uma le Unyashungu

¹² Untu lakikitala lʼehimba eko la otshoko, ne dia lamʼayunduleka ehimba wulu, ndi ayulungula dembo dia kusu dia lumu, diakalaki Khumadiondjo wane wulanga.

¹³ Untu tataki lamʼayunduhimbama ati: Dimi lambuhimbama uma le Unyashungu, ne dia Unyashungu hahimbama la akambu wa kolo, ku ndi hahimbi untu.

¹⁴ Keli untu lʼuntu atuhimbamaka lamʼakutwamandi ndu lamʼahimbamandi la saki kandi ndame ka kolo.

¹⁵ Ku saki kako, lamʼatshoto diemi, to kayuta kolo; ku kolo, lamʼulato, to kayuta nyoi.

¹⁶ Anyami wa ngandji, tanyudimbiyamaki.

¹⁷ Mboya tshe kʼololo la Kʼuluwanyi katuyakaka uma lʼulungu, Katuhuloka uma le Shi yanyi, lahakadimo, leli pupu pundju.

¹⁸ Dia lulangu landi mbakandatutungi la diui diandi dia mete, dia shu ndjala elua wa ntundu wa ditungelu diandi tshe.

Nyuyali Atshi wa Diui, Aha Ambuki Atu

¹⁹ Anyami wa ngandji, nyeyi akambu ane. Keli untu tshe uki esadi, la ati okoke. Tukaki kele esadi,

²⁰ ne dia kele Kʼantu heyi nkimanyia ololo a Unyashungu.

²¹ Okone nyunya akambu wa sonyi la wa kolo tshe. Nyetawo diui diunewo lʼetema anyu la memakana; dio mbeya nshimbela nyumu yanyu.

²² Keli nyuyali atshi wa diui, aha ambuki atu, watuyadimbiyaka.

²³ Naka untu eko umbuki a diui, la haditshi, ndi eko uku untu lenda elundji kandi lu lulindu.

²⁴ Ne dia lamʼayaendandi lu lulindu, ndi atumoka, kema edja ku ndi ambuhela didjidji diandi.

²⁵ Keli lenda elembe wʼololo wa ndjadjasela, ndu latetemala loko, aha umbuki a diui ladiuhela, keli utshi a diui mbendi. Untu ako ayotshokwama lu etsha andi.

Otemwelo wa Pudipudi Ndu Waha la Vadi

²⁶ Naka untu ambuyakana ati: Otemodi wʼololo mbendi, Keli hashimbi lulimi landi, ndi ambuyadimbiya lʼutema andi. Otemwelo andi eko anyanya.

²⁷ Otemwelo weli pudipudi, waha la vadi lu ashu a Unyashungu Shesu, weko okone: ntsho dia ntenda ana wa tshiki la wadi waki edu lu asui awo, la dia untu ndjalama diaha ndi ndjala la akambu wa kolo wa la kete.